Comment le seigneur de Humevesne plaidoie davant Pantagruel. Chap. xij.

Lors commenca le seigneur de Humevesne ainsi que s'ensuit.Monsieur et messieurs, si l'iniquite des hommes estoit aussi facilement veue en jugement categoricque comme on congnoist mousches en laict, le monde, quatre beufz ne seroit tant mange de ratz comme il est, et seroient aureilles maintes

sur terre, qui en ont este rongees trop laschement. Car combien que tout ce que a dit partie adverse soit de dumet bien vray quand a la lettre et histoire du factum, toutesfoys messieurs la finesse, la tricherie, les petitz hanicrochemens, sont cachez soubz le pot aux roses. Doibs je endurer que a l'heure que je mange au pair ma souppe sans mal penser ny mal dire l'on me vienne ratisser et tabuster le cerveau me sonnant l'antiquaille, et disant, qui boit en mangeant sa souppe, quand il est mort il n'y voit goutte. Et saincte dame combien avons nous veu de gros cappitaines en plein camp de bataille, alors qu'on donnoit les horions du pain benist de la confrarie, pour plus honnestement se dodeliner, jouer du luc sonner du cul, et faire les petiz saulx en plate forme? mais maintenant le monde est tout detravé de louchetz des balles de lucestre, l'un se desbauchez, l'aultre cinq quatre et deux et si la court n'y donne ordre, il fera aussi mal glener ceste annee, qu'il feist ou bien fera des goubeletz. Si une pauvre personne va aux estuves pour se faire enluminer le museau de bouzes de vache ou acheter bottes de hyver, et les sergeans passans, ou bien ceulx du guet receuvent la decoction d'un clystere, ou la matiere fecale d'une celle persee sur leurs tintamarres, en doibt l'on pourtant roigner les testons et fricasser les escutz elles de boys? Aulcunesfoys nous pensons l'un mais Dieu faict l'aultre, et quand le soleil est couché, toutes bestes sont a l'ombre, je n'en veulx estre creu, si je ne le prouve hugrement par gens de plain jour. L'an trente et six achaptant un courtault d' Alemaigne hault et court d'assez bonne laine et tainct en grene, comme asseuroyent les orfevres, toutesfoys le notaire y mist du cetera. Je ne suis poinct clerc pour prendre la lune avecques les dentz, mais au pot de beurre ou l'on selloit les instrumens Vulcaniques le bruyt estoit, que le boeuf sale faisoit trouver le vin sans chandelle et feust il caiche au fond d'un sac de charbonnier, houzé et bardé avecques le chanfrain et hoguines requises a bien fricasser rusterie, c'est teste de mouton, et c'est bien ce qu'on dict en proverbe, qu'il faict bon veoir vaches noires en boys brusle, quand on jouist de ses amours. J'en fis consulter la matiere a messieurs les clercs, et pour resolution conclurent en Frisesomorum qu'il n'est tel que faucher lesté en cave bien garnie de papier et d'ancre, de plumes et ganivet de Lyon sur le Rosne tarabin tarebas: car incontinent que un harnoys sent les aulx, la rouille luy mangeue le foye, et puis l'on ne faict que rebecquer torty colli fleuretant le dormir d'apres disner, et voyla qui faict le sel tant cher. Messieurs ne croyez que au temps que ladicte bonne femme englua la pochecuilliere pour le record du sergeant mieulx apanager et que la fressure boudinalle tergiversa par les bourses des usuriers, il n'y eust rien meilleur a soy garder des Canibales, que prendre une liasse d'oignons liee de troys cens naveaulx, et quelque peu d'une fraize de veau du meilleur alloy que ayent les alchistunes, et bien luter et calciner ces pantoufles mouflin mouflart avecques belle saulce de raballe et soy mucer en quelque petit trou de taulpe, saulvant tousjours les lardons. Et si le dez ne vous veult aultrement ambezars, ternes du gros bout. guare daz, mettez la dame au coing du lict, fringuez la toureloura la la, et bevez a oultrance: depiscando grenoillibus a tout beaulx houseaulx coturnicques, ce sera pour les petitz oysons de mue qui s'esbatent au jeu de foucquet, attendant battre le metal, et chauffer la cyre aux bavars de godale. Bien vray est il que les quatre beufz desquelz est question, avoyent quelque peu la memoire courte, toutesfoys pour scavoir la game ilz n'en craignoyent courmaran ny quanard de Savoye, et les bonnes gens de ma terre en avoyent bonne esperance, disant ces enfans deviendront grands en Algorisme, ce nous sera une rubrique de droict, nous ne pouvons faillir a prendre le loup, faisans nos hayes dessus le moulin a vent duquel a este parlé par partie adverse. Mais le grand diole y eut envie: et mist les Allemans par le derriere, qui firent diables de humer her tringue, tringue, de doublet en case. Car il n'y a nulle apparence de dire que a Paris sur petit pont geline de feurre, et feussent ilz aussi huppez que duppes de marays, sinon vrayement qu'on scacrifiast les pompetes au moret fraichement esmoulu de lettres versalles ou coursives ce m'est tout un, pourveu que la tranchefille n'y engendre les vers. Et posé le cas que au coublement des chiens courans, les marmouzelles eussent corne prinse devant que le notaire eust baille sa relation par art Cabalisticque, il ne s'ensuit (saulve meilleur jugement de la court) que six arpens de pre a la grand laize feissent troys bottes de fine ancre sans souffler au bassin, considere que aulx funerailles du Roy Charles l'on avoit en plain marché la toyson pour deux et ar j'entens par mon serment de laine, Et je voy ordinairement en toutes bonnes cornemuses que quand l'on va a la pipee, faisant troys tours de balay par la cheminee, et insinuant sa nomination: l'on ne faict que bander aux reins et soufler au cul, si d'adventure il est trop chault, et qu'ille luy bille, incontinent les lettres veues, les vaches luy furent rendues. Et an fut donne pareil arrest a la martingalle l'an dix et sept pour le maulgou vert de Louzefougerouse, a quoy il plaira a la court d'avoir esguard. Je ne dis vrayement qu'on ne puisse par equité desposseder en juste tiltre ceulx qui de l'eaue beniste beuvroyent comme on faict d'un rancon de tisserant dont on faict les suppositoires a ceulx qui ne voulent resigner, sinon a beau jeu bel argent. Tunc messieurs quid juris pro minoribus? Car lusance commune de la loy Salicque est telle, que le premier boute feu qui escornifle la vache qui mousche en plein chant de Musicque, sans solfier les poinctz des savatiers, doibt en temps de godemarre sublimer la penurie de son membre par la mousse cuillie alors qu'on se morfond a la messe de minuict pour bailler l'estrapade a ces vins blancs d' Anjou, qui font la jambette collet a collet a la mode de Bretaigne.Concluent comme dessus avecques despens, dommaiges, et interestz. Apres, que le seigneur de Humevesne eut achevé, Pantagruel dist au seigneur de Baisecul Mon amy voulez vous rien replicquer? A quoy respondit Baisecul. Non monsieur: car je n'en ay dict que la verite: et pour dieu donnons fin a nostre different: car nous ne sommes icy sans grand frais.