Or pource que les Geographes et Cosmographes font grosse estime d’icelles isles nous les voulumes bien perlustrer et visiter toutes de une part et d’aultre. Et en ce faisant nous trouvasmes en icelles isles troys grandz fleuves comme le rosne ou le rin, d’une merveilleuse estimation.

Car l’ung est de vin blanc, le meileur que jamais homme goustast.

Le second est de vin clairet le plus excellent qu’il est possible de trouver en tout le monde.

Le tiers est de vin vermeil qui passe en bonte tous les vins Bastardz, tous les Ambrosiades, Malvoysies et tous les ypocras qui fussent jamais.

Et y a du long d’iceulx fleuves des hayes d’arbres comme rosiers, aux quelz croissent les petitz Gasteaulx, Craquelins, Eschauldez, et petitz choulx, les plus frians et savoureux que jamais homme goustast.

Et pareillement le mestier, et les oublies de toutes sortes, Et ne couste sinon a prendre et a cueillir come vous feriez les roses sur ung rosier.

Sur les bortz et rives d’iceulx fleuves vous trouvez les Godetz et les tasses de beauvais, arrangez pour boire sans avoir la peine de vous mettre a genoulx, le cul en hault comme font les Bergiers quant ilz boyvent en ung ru, ou en une fontaine quant ilz sont aulx champs,

Et d’avantaige pour emporter d’iceulx vins il y a de grandz arbres plains d’estocz aux quelz pendent les Flaccons, Barilz et bouteilles de toutes sortes, lesquelz chascun peult amplir d’icelluy vin et emporter la ou il veult, toutesfoys les meileurs pour ce faire sont noz beaulx flaccons de beauvaiz qui sont azurez et bons a merveilles, et se garde mieulx le vin en iceulx longuement fraiz et sans corrumpre comme j’ay tousjours ouy dire a ceulx de nostre ville de Beauvaiz, et a ceulx de Saniguie, et de LHeraule, qui sont les lieux la ou on les faict.