Comme en une isle il y a des gens que l’on nomme Andouilles de .xij. piedz de long, lesquelles arracherent le nez a aulcuns des gens de Bringuenarilles. Chapitre XII.

Environ l’heure de mynuict que nous pensions estre encor en la mer d’iceulx farouches le vent nous fut si agreable que nous veismes aborder es isles de Luquebaralideaulx es quelles habitent les Andouilles, qui sont grandes environ de douze piedz de long, et de aulteur, et ont des dens fort tranchans et agus et vont paistre par grandes troppes parmy icelles isles comme grues ou moutons, et d’abordee qu’elles nous veirent descendre hors de nostre naef elles vindrent contre nous par grande impetuosite saultant en l’air comme mytaines en sorte qu’elles arracherent le nez a d’aulcuns de mes gens, a cause qu’elles ne les povoient prendre par les

aureilles ny par les cheveulx pource qu’ilz n’en n’avoient point, au moyen de quoy ilz demeurerent tous camus, dont ilz estoient fort honteux, toutesfoys nous prismes couraige, et a grandz coups d’espees a deux mains nous les trenchions a travers du corps, pource qu’elles n’avoient nulz os et les mismes toutes en fuite, si non celles que nous tuasmes, car elles demourerent mortes, et n’eust este ung gros fleuve de moustarde qui vient d’une fontaine, laquelle sourd de dessoubz ung rocher de pierre grise, de la couleur de moustarde, la plus forte que jamais homme goustast, lequel fleuve court par le milieu, et tout a travers d’icelles isles, nous les eussions toutes mises a mort, mais elles se jecterent dedans icelluy fleuve duquel elles ont acoustume de boyre, et nouerent oultre.

Aulcuns de mes gens se jecterent apres pour les suyvir, et principalement ceux a qui elles avoient arrache le nez, car ilz estoient fort animez contre elles, mais pource que iceluy fleuve est de moustarde la plus forte que je vey jamais, et qu’elle leur entroit en nouant dedans les trous des narines, ilz furent contrainctz de soy retirer pour ce qu’ilz ne povoient souffrir ny endurer la force de la moustarde dudict fleuve, et qu’ilz avoient les nez de nouveau arrachez.