Le festin et banquet acheve, la royne commanda oster les tables affin qu’on danceast et ballast pour passer temps, et incontinent qu’elles furent levees elle dansa une basse dance a quatre parties, je vous promectz qu’il la faisoit fort bon veoir, car elle avoit bonne contenance, elle menoit ung fallot lequel faisoit merveilles de dancer et saulter sur ung pied de boys, je ne scay pas si c’estoit son mary, car je ne les vy pas coucher ensemble, toutesfoys tant y a qu’il y avoit plusieurs petites lanternes fort jeunes, et encor en bas eage, a ceste cause je croy qu’elles estoient filles des grandes, il y en avoit en la cuisine d’aultres vielles qui estoient