De l'estat d'aulcunes gens. Chapitre. v.

La plus grande folie du monde est de penser qu'il y ait des astres pour les Roys, Papes, et gros seigneurs, plustost que pour les pauvres et souffreteux, comme si nouvelles estoilles avoient este creez depuis le temps du deluge, ou de Romulus, ou Pharamond a la nouvelle creation des Roys: Ce que

Triboulet, ny cailhette, ne diroient: qui ont este tousfoys gens de hault scavoir et grand renom. Et par adventure en l'arche de Noe, ledict Triboulet estoit de la lignee des Roys de Castille, Et cailhette du sang de Priam, mais tout cest erreur, ne procede que par deffault de vraye foy catholicque. Tenant doncques pour certain que les astres se soucient aussi peu des Roys, comme des gueux, et des riches comme des maraux, je laisseray es aultres folz pronosticqueurs a parler des Roys et riches, et parleray des gens de bas estat.

Et premierement des gens soubmis a Saturne, comme gens despourveuz d'argent, jaloux, resveurs, mal pensans, soubsonneux, preneurs de taulpes, usuriers, rachapteurs de rentes, tyreurs de rivetz, tanneurs de cuirs, tuilliers, fondeurs de cloches, composeurs d'empruns, rataconneurs de bobelins, gens melancholicques, n'auront en ceste annee tout ce qu'ilz vouldroient bien, ilz s'estudiront

a l'invention saincte croix, ne getteront leur lart aux chiens: et se grateront souvent la ou il ne leur demange poinct.

A Jupiter comme cagotz, caffars, botineurs, porteurs de rogatons, abbreviateurs, scripteurs, copistes, Bulistes, Dataires, chiquaneurs, caputons, Moines, hermites, hypocrites, chatemittes, Sanctorons, Patepellues, Torticollis, Barbouilleurs de papiers, Prelinguans, Esperrucquetz, clercz de greffe Dominotiers, Maminotiers, Patenostriers, Chaffoureus de parchemim, Notaires, Raminagrobis, portecolles promoteurs, se porteront selon leur argent Et tant mourra de gens d'esglise, qu'on ne pourra trouver a qui conferer les benefices, en sorte que plusieurs en tiendront deux, troys, quatre, et davantaige. Caffarderie fera grande jacture de son antique bruyt, puis que le monde est devenu maulvais garson, et n'est plus gueres fat, ainsi comme dict Avenzagel.

A Mars comme Bourreaux, Meutriers,

adventuriers, Brigans, Sergeans, records de tesmoings, gens de guet, Mortepayes, arracheurs de dens, coupeurs de couilles, Barberotz, bouchiers, faulx monnoieurs, Medicins de trinquenique Tacnins et Marranes, Renieurs de dieu, allumetiers, Boutefeux, Ramonneurs de cheminées, Franctaupins, charbonniers, alchimistes, coquassiers, grillotiers, chercuitiers, Bimbelotiers: Manilliers, Lanterniers, maignins, feront ceste annee de beaulx coups, mais aulcuns d'iceulx seront fort subjectz a recepvoir quelque coup de baston a l'emblée. Un des susdictz sera ceste annee faict evesque des champs donnant la benediction avec les piedz aux passans.

A Sol comme beuveurs, Enlumineurs de museaulx, ventres a poulaine, brasseurs de biere, Boteleurs de foing, Portefaix, Faulcheurs, recouvreurs, crocheteurs, emballeurs, bergiers, bouviers, vachiers, porchiers, oizilleurs, jardiniers, grangiers, cloisiers, Gueux de

l'hostiare, gaignedeniers, degresseurs de bonnetz: emboureurs de bastz, loqueteurs, claquedens, crocquelardons, generalement tous portans la chemise noée sus le dos: seront sains et alaigres et ne auront la goutte es dentz quand ilz seront de nopces.

A Venus comme putains, maquerelles marioletz, Bougrins, bragars, Napleux, eschancrez, ribleurs rufiens, caignardiers, Chamberieres d'hostelerie, Nomina mulierum desinentia in iere, ut Lingiere, advocatiere, taverniere, buandiere, frippiere, seront ceste annee en reputanation, mais le Soleil entrant en Cancer et aultres signes se doibvent garder de verolle, de chancre, de pisses chauldes, poullains grenetz etc. Les nonnains a poine concepvront sans operation virile, bien peu de pucelles auront en mamelles laict.

A Mercure, comme pipeurs, trompeurs, affineurs, theriacleurs, larrons meusniers, bateurs de pavé, maistre es ars,

decretistes, crocheteurs, harpailleurs, rimasseurs, basteleurs, joueurs de passe passe, enchanteurs, vielleurs, poetes, escorcheurs de latin, faiseurs de Rebus papetiers, cartiers, bagatis, escumeurs de mer feront semblant de estre plus joyeulx que souvent ne seront, quelque foys riront lors que n'en auront talent, et seront fort subjectz a faire bancques rouptes s'ilz se trouvent plus d'argent en bourse que ne leur en fault.

A la Lune, comme bisouars, veneurs, chasseurs, asturciers, faulconniers, courriers, sauniers lunatiques, folz, ecervelez acariastres, esvantez, courratiers, postes, laquays, nacquetz, verriers, estradiotz, riverans, matelotz, chevaucheurs de escurye, alleboteurs, n'auront ceste annee gueres d'arrest. Toutesfoys ne iront tant de Lifrelofres a sainct Hiaccho comme feirent l'An D.xxiiii. Il descendra grand abundance de micquelotz des montaignesde Savoye, et de Auvergne : mais Sagitarius les menasse des

mules aux talons.