Des fruictz et biens croissant de terre.Chapitre. iiii.

Je trouve par les calcules de Albumasar, on livre de la grande conjunction et ailleurs, que ceste annee sera bien fertile avecques planté de tous biens

a ceulx qui auront de quoy. Mais le hobelon de Picardie, craindra quelque peu la froidure, l'avoine fera grand bien es chevaux: il ne fera gueres plus de lart que de pourceaux a cause de Pisces ascendent, il sera grand annee de caquerolles. Mercure menasse quelque peu le persil, mais ce nonobstant il sera a pris raisonnable Le soucil et l'ancholye croistroient plus que de coustume, avecques abondance de poyres d'angoisse. De bledz, de vins, de fruitages et legumages on n'en veit oncques tant si les soubhaytz des pauvres gens sont ouys.