Continuation du discours de Panurge, a la louange des presteurs et debteurs. Chapitre IIII.

Au contraire representez vous un monde autre, on quel un chascun preste, un chascun doibve, tous soient debteurs, tous soient presteurs. O quelle harmonie sera parmy les reguliers mouvemens des Cieulz. Il m’est advis que je l’entends aussi bien que feist oncques Platon. Quelle sympathie entre les elemens. O comment Nature se y delectera en ses oeuvres et productions. Ceres chargée de

bleds: Bacchus de vins: Flora de fleurs: Pomona de fruictz: Juno en son aër serain seraine, salubre, plaisante. Je me pers en ceste contemplation. Entre les humains Paix, Amour, Dilection, Fidelité, repous, banquetz, festins, joye, liesse, or, argent, menue monnoie, chaisnes, bagues, marchandises, troteront de main en main. Nul proces, nulle guerre, nul debat: nul n’y sera usurier, nul leschart, nul chichart, nul refusant. Vray Dieu, ne sera ce l’aage d’or, le regne de Saturne ? L’idée des regions Olympicques: es quelles toutes autres vertus cessent: Charité seule regne, regente, domine, triumphe. Tous seront bons, tous seront beaulx, tous seront justes. O monde heureux. O gens de cestuy monde heureux. O beatz troys et quatre foys. Il m’est advis que je y suis. Je vous jure le bon Vraybis, que si cestuy monde, beat monde ainsi a un chascun prestant, rien ne refusant eust Pape foizonnant en Cardinaulx, et associé de son sacré colliege, en peu d’années vous y voiriez les sainctz plus druz, plus miraclificques, a plus de leçons, plus de veuz, plus de bastons, et plus de chandelles, que ne sont tous ceulx des neufz eveschez de Bretaigne. Exceptez seulement sainct Ives. Je vous prie considerez comment le noble Patelin voulant deifier et par divines louenges mettre jusques au tiers ciel le pere de Guillaume Jousseaulme, rien plus ne dist sinon, Et si prestoit, Ses denrées, a qui en vouloit. O le beau mot. A ce patron figurez nostre microcos me, id est, petit monde, c’est l’home, en tous ses membres, prestans, empruntans, doibvans, c’est a dire en son naturel. Car nature n’a créé l’home que pour prester et emprunter. Plus grande n’est l’harmonie des cieux, que sera de sa police. L’intention du fondateur de ce microcosme, est y entretenir l’ame, laquelle il y a mise comme hoste: et la vie. La vie consiste en sang. Sang est le siege de l’ame. Pourtant un seul labeur poine ce monde, c’est forger sang continuellement. En ceste forge sont tous membres en office propre: et est leur hierarchie telle que sans cesse l’un de l’autre emprunte, l’un a l’autre preste, l’un a l’autre est debteur. La matiere et metal convenable pour estre en sang transmué, est baillée par nature: Pain et Vin. En ces deux sont comprinses toutes especes des alimens. Et de ce est dict le companage en langue Goth. Pour icelles trouver, praeparer, et cuire, travaillent les mains, cheminent les piedz, et portent toute ceste machine: les oeilz tout conduisent. l’appetit en l’orifice de l’estomach moyenant un peu de melancholie aigretté, que luy est transmis de la ratelle, admonneste de enfourner viande. La langue en faict l’essay: les dens la maschent: l’estomach la reçoit, digere, et chylifie. Les venes mesaraïcques en sugcent ce qu’est bon et idoine: delaissent les excremens. les quelz par vertus expulsive sont vuidez hors par expres conduictz: puys la portent au foye. il la transmue de rechef, et en faict sang. Lors quelle joye pensez vous estre entre ces officiers, quand ilz ont veu ce ruisseau d’or, qui est leur seul restaurant? Plus grande n’est la joye des Alchymistes, quand apres longs travaulx, grand soing et despence, ilz voyent les metaulx transmuez dedans leurs fourneaulx. Adoncques chascun membre se praepare et s’esvertue de nouveau a purifier et affiner cestuy thesaur. Les roignons par les venes emulgentes en tirent l’aiguosité, que vous nommez urine, et par les ureteres la decoullent en bas. Au bas trouve receptacle propre, c’est la vessie, laquelle en temps oportun la vuide hors. La ratelle en tire le terrestre, et la lie, que vous nommez melancholie. La bouteille du fiel en soubstraict la cholere superflue. Puys est transporté en une autre officine pour mieulx estre affiné, c’est le Coeur. Lequel par ces mouvemens diastolicques et systolicques le subtilie et enflambe, tellement que par le ventricule dextre le mect a perfection, et par les venes l’envoye a tous les membres. Chascun membre l’attire a soy, et s’en alimente a sa guise: pieds, mains, oeilz, tous: et lors sont faictz debteurs, qui paravant estoient presteurs. Par le ventricule gausche il le faict tant subtil, qu’on le dict spirituel: et l’envoye a tous les membres par ses arteres, pour l’autre sang des venes eschauffer et esventer. Le poulmon ne cesse avecques ses lobes et souffletz le refraischir. En recongnoissance de ce bien le Coeur luy en depart le meilleur par la vene arteriale. En fin tant est affiné dedans le retz merveilleux, que par apres en sont faictz les espritz animaulx, moyenans les quelz elle imagine, discourt, juge, resoust, delibere, ratiocine, et rememore. Vertus guoy je me naye, je me pers, je m’esguare, quand je entre on profond abisme de ce monde ainsi prestant, ainsi doibvant. Croyez que chose divine est prester: debvoir est vertus Heroïcque.

Encores n’est ce tout. Ce monde prestant, doibvant, empruntant, est si bon, que ceste alimentation parachevée, il pense desja prester a ceulx qui ne sont encores nez: et par prest se perpetuer s’il peult, et multiplier en images a soy semblables, ce sont enfans. A ceste fin chascun membre du plus precieux de son nourrissement decide et roigne une portion, et la renvoye en bas: nature y a praeparé vases et receptacles opportuns, par les quelz descendent es genitoires en longs ambages et flexuositez reçoit forme competente, et trouve lieux idoines tant en l’home comme en la femme, pour conserver et perpetuer le genre humain. Ce faict le tout par prestz et debtes de l’un a l’autre: dont est

dict le debvoir de mariage. Poine par nature est au refusant interminée, acre vexation parmy les membres, et furie parmy les sens: au prestant loyer consigné, plaisir, alaigresse, et volupté.