Comment Rondibilis medicin conseille Panurge. Chapitre XXXI.

Panurge continuant son propous, dist. Le premier mot que dist celluy qui escouilloit les moines beurs a Saussignac, ayant escouillé le frai Cauldaureil, feut: aux aultres. Je diz pareillement: aux aultres. Cza monsieur nostre maistre Rondibilis depeschez moy? Me doibs je marier ou non? Par les ambles de mon mulet (respondit Rondibilis) je ne sçay

que je doibve respondre a ce probleme. Vous dictez que sentez en vous les poignans aiguillons de sensualité. Je trouve en nostre faculté de Medicine, et l’avons prins de la resolution des anciens Platonicques, que la concupiscence charnelle est refrenée par cinq moyens. Par le vin. Je le croy, dist frere Jan. Quand je suys bien yvre, je ne demande qu’a dormir. J’entends (dist Rondibilis) par vin prins intemperamment. Car par l’intemperance du vin advient au corps humain refroidissement de sang, resolution des nerfs, dissipation de semence generative, hebetation des sens, perversion des mouvemens. Qui sont toutes impertinences a l’acte de generation. Defaict vous voyez painct Bacchus Dieu des Yvroignes, sans barbe, et en habit de femme, comme tout effoeminé, comme eunuche et escouillé. Aultrement est du vin prins temperement. L’antique proverbe nous le designe, on quel est dict: que Venus se morfond sans la compaignie de Ceres et Bacchus. Et estoit l’opinion des anciens, scelon le recite Diodore Sicilien, mesmement des Lampsaciens: comme atteste Pausanias, que messer Priapus feut filz de Bacchus et Venus.

Secondement par certaines drogues et plantes, les quelles rendent l’home refroidy, maleficié, et impotent a generation. L’experience y est en Nymphaea Heraclia, Amerine, Saule, Chenevé, Periclymenos, Tamarix, Vitex, Mandragore, Cigüe, Orchis le petit, la peau d’un Hippopotame, et aultres: les quelles dedans les corps humains tant par leurs vertus elementaires, que par leurs proprietez specifiques, glassent et mortifient le germe prolificque: ou dissipent les espritz, qui le doibvoient conduire aux lieux destinez par nature: ou oppilent les voyes et conduictz, par les quelz povoit estre expulsé. Comme au contraire nous en avons qui eschauffent, excitent, et habilitent l’home a l’acte Venerien. Je n’en ay besoing (dist Panurge) Dieu mercy, et vous nostre maistre. Ne vous desplaise toutesfoys. Ce que j’en diz, n’est par mal que je vous veuille.

Tiercement (dist Rondibilis) par labeur assidu. Car en icelluy est faicte si grande dissolution du corps, que le sang

qui est par icelluy espars pour l’alimentation d’un chascun membre, n’a temps, ne loisir, ne faculté de rendre celle resudation seminale, et superfluité de la tierce concoction. Nature particuliairement se la reserve, comme trop plus necessaire a la conservation de son individu, qu’a la multiplication de l’espece et genre humain. Ainsi est dicte Diane chaste, laquelle continuellement travaille a la chasse. Ainsi jadis estoient dictz les Castres, comme castes: es quelz continuellement travailloient les Athletes et soubdars. Ainsi escript Hippocrates lib. de aëre, aqua, et locis, de quelques peuples en Scythie, les quelz de son temps plus estoient impotens que Eunuches, a l’esbatement Venerien: par ce que continuellement ilz estoient a cheval et au travail. Comme au contraire disent les Philosophes, Oysiveté estre mere de Luxure. Quand lon demandoit a Ovide, quelle cause feut parquoy AEgistus devint adultere? rien plus ne respondoit. si non, par ce qu’il estoit ocieux. Et qui housteroit Oysiveté du monde, bien toust periroient les ars de Cupido. son arc, sa trousse, et ses fleches, luy seroient en charge inutile: jamais n’en feriroit persone. Car il n’est mie si bon archier, qu’il puisse ferir les Grues volans par l’aër, et les Cerfz relancez par les boucaiges, comme bien faisoient les Parthes: c’est a dire, les humains tracassans, et travaillans. Il les demande quoys, assis, couchez, et a sejour. De faict Theophraste quelques foys interrogé, quelle beste, quelle chose il pensoit estre Amourettes? respondit, que c’estoient passions des espritz ocieux. Diogenes pareillement disoit Paillardise, estre l’occupation des gens non aultrement occupez. Pourtant Canachus Sicyonien sculpteur voulent donner entendre que Oysiveté, Paresse, non chaloir, estoient les gouvernantes de ruffiennerie, feist la statue de Venusstatue de VenusVenus, assise, non de bout, comme avoient faict tous ses predecesseurs.

Quartement, par fervente estude. Car en icelle est faicte incredible resolution des espritz, tellement qu’il n’en reste de quoy poulser aux lieux destinez ceste resudation generative, et enfler le nerf caverneux: duquel l’office est hors la prajecter pour la propagation d’humaine Nature. Qu’ainsi soit, contemplez la forme d’un

home attentif a quelque estude. Vous voirez en luy toutes les arteres du cerveau bendées comme la chorde d’une arbaleste, pour luy fournir dextrement espritz suffisans a emplir les ventricules du sens commun, de l’imagination et apprehension, de la ratiocination et resolution, de la memoire et recordation: et agilement courir de l’un a l’aultre par les conduictz manifestes en anatomie sus la fin du retz admirable, on quel se terminent les arteres: les quelles de la senestre armoire du coeur prenoient leur origine, et les espritz vitaulx affinoient en longs ambagés, pour estre faictz animaulx. De mode que en tel personnaige studieux vous voirez suspendues toutes les facultez naturelles: cesser tous sens exterieurs: brief, vous le jugerez n’estre en soy vivent, estre hors soy abstraict par ecstase: et direz que Socrates n’abusoit du terme, quand il disoit Philosophie n’estre aultre chose que meditation de mort. Par adventure est ce pour quoy Democritus se aveugla, moins estimant la perte de sa veue, que diminution de ses contemplations: les quelles il sentoit interrompues par l’esguarement des oeilz. Ainsi est vierge dicte Pallas Déesse de Sapience, tutrice des gens studieux. Ainsi sont les Muses vierges. Ainsi demeurent les Charites en pudicité eternelle. Et me soubvient avoir leu, que Cupido quelques foys interrogé de sa mere Venus, pour quoy il n’assailloit les Muses? respondit, qu’il les trouvoit tant belles, tant nettes, tant honestes, tant pudicques, et continuellement occupées: l’une a contemplation des astres, l’aultre a supputation des nombres, l’aultre a dimension des corps Geometricques, l’aultre a invention Rhetoricque, l’aultre a composition Poëticque, l’aultre a disposition de Musique: que approchant d’elles, il desbandoit son arc, fermoit sa trousse, et extaignoit son flambeau par honte et craincte de leurs nuire. Puys houstoit le bandeau de ses oeilz pour plus apertement les veoir en face, et ouyr leurs plaisans chantz et odes Poëticques. La prenoit le plus grand plaisir du monde. Tellement que souvent il se sentoit tout ravy en leurs beaultez et bonnes graces, et s’endormoit a l’harmonie. Tant s’en fault qu’il les voulsist assaillir, ou de leurs estudes distraire. En cestuy article je comprens ce que escript Hippocrates on livre susdict, parlant des Scythes, et au livre intitulé, De geniture, disant tous humains estre a generation impotens, es quelz l’on a une foys couppé les arteres parotides, les quelles sont a cousté des aureilles, par la raison cy davant exposée, quand je vous parlois de la resolution des espritz, et du sang spirituel, du quel les arteres sont receptacles: aussi qu’il maintient grande portion de la geniture sourdre du cerveau, et de l’espine du dours.

Quintement, par l’acte Venerien. Je vous attendois la, (dist Panurge) et le prens pour moy. Use des praecedens qui vouldra. C’est (dist frere Jan) ce que Fray Scyllino prieur de sainct Victor lez MarseilleFray Scyllino prieur de sainct Victor lez Marseillesainct Victor lez Marseille appelle maceration de la chair. Et suys en ceste opinion: aussi estoit l’Hermite de saincte Radegonde au dessus de Chinon : que plus aptement ne porroient les hermites de Thebaïde macerer leurs corps, dompter ceste paillarde Sensualité, deprimer la rebellion de la chair, que le feisant vingt et cinq ou trente foys par jour. Je voy Panurge (dist Rondibilis)

bien proportionné en ses membres, bien temperé en ses humeurs, bien complexionné en ses espritz, en aage competent, en temps oportun, en vouloir equitable de soy marier: s’il rencontre femme de semblable temperature, ilz engendreront ensemble enfans dignes de quelque monarchie Transpontine. Le plus toust sera le meilleur, s’il veult veoir ses enfans pourveuz. Monsieur nostre maistre (dist Panurge) je le seray, n’en doubtez, et bien toust. Durant vostre docte discours ceste Pusse que j’ay en l’aureille, m’a plus chatouillé que ne feist oncques. Je vous retiens de la feste. Nous y ferons chere et demie, je le vous prometz. Vous y amenerez vostre femme, s’il vous plaist, avecques ses voisines, cella s’entend. Et jeu sans villenie.