Comment Panurge feut faict chastellain de Salmiguondin en Dipsodie, et mangeoit son bled en herbe. Chapitre II.

Donnant Pantagruel ordre au gouvernement de toute Dipsodie, assigna la chastel lenie de Salmiguondin a Panurge, valent par chascun an 6789106789. Royaulx en deniers certains, non comprins l’incertain revenu des Hanetons, et Cacquerolles, montant bon an mal an de. 2435768. a .2435769. moutons a la grande laine. Quelques foys revenoit a 1234554321. Seraphz: quand estoit bonne année de Cacquerolles, et Hanetons de requeste. Mais ce n’estoit tous les ans.

Et se gouverna si bien et prudentement monsieur le nouveau chastellain, qu’en moins de quatorze jours il dilapida le revenu certain et incertain de sa Chastellenie pour troys ans. Non proprement dilapida, comme vous pourriez dire en fondations de monasteres, erections de temples, bastimens de collieges et hospitaulx, ou jectant son lard aux chiens. Mais despendit en mille petitz bancquetz et festins joyeulx, ouvers a tous venens, mesmement tous bons compaignons, jeunes fillettes, et mignonnes gualoises. Abastant boys, bruslant les grosses souches pour la vente des cendres, prenent argent d’avance, achaptant cher, vendent a bon marché, et mangeant son bled en herbe. Pantagruel adverty de l’affaire, n’en feut en soy aulcunement indigné, fasché, ne marry. Je vous ay ja dit, et encores rediz, que c’estoit le meilleur petit et grand bon homet, que oncques ceigneit espée. Toutes choses prenoit en bonne partie, tout acte interpretoit a bien. Jamais ne se tourmentoit, jamais ne se scandalizoit. Aussi eust il esté bien forissu du Deificque manoir de raison, si aultrement se feust contristé ou alteré. Car tous les biens que le Ciel couvre: et que la Terre contient en toutes ses dimensions: haulteur, profondité, longitude, et latitude, ne sont dignes d’esmouvoir nos affections, et troubler nos sens et espritz.

Seulement tira Panurge a part, et doulcettement luy remonstra, que si ainsi vouloit vivre, et n’estre aultrement mesnagier: impossible seroit, ou pour le moins bien difficile, le faire jamais riche. Riche? respondit Panurge. Aviez vous la fermé vostre pensée? Aviez vous en soing pris me faire riche en ce monde? Pensez vivre joyeulx de par li bon Dieu, et li bons homs. Autre soing, autre soucy, ne soit receup on sacrosainct domicile de vostre celeste cerveau. La serenité d’icelluy jamais ne soit troublée par nues quelconques de pensement passementé de meshaing et fascherie. Vous vivent joyeulx, guaillard, dehayt, je ne seray riche que trop. Tout le monde crie mesnaige, mesnaige. Mais tel parle de mesnaige, qui ne sçayt mie que c’est. C’est de moy que fault conseil prendre. Et de moy pour ceste heure prendrez advertissement, que ce qu’on

me impute a vice, a esté imitation des Université et Parlement de Paris : lieux esquelz consiste la vraye source et vive Idée de Pantheologie, de toute justice aussi. Haereticque qui en doubte, et fermement ne le croyt. Ilz toutesfoys en un jour mangent leur evesque, ou le revenu de l’evesché (c’est tout un) pour une année entiere, voyre pour deux aulcunes foys: C’est au jour qu’il y faict son entrée. Et n’y a lieu d’excuse, s’il ne vouloit estre lapide sus l’instant. A esté aussi acte des quatre vertus principales. De Prudence, en prenent argent d’avance. Car on ne sçayt qui mord, ne qui rue. Qui sçayt si le monde durera encores troys ans? Et ores qu’il durast d’adventaige, est il home tant fol: qui se ausast promettre vivre troys ans?
Oncq’home n’eut les Dieux tant bien a main,
Qu’asceuré feust de vivre au lendemain.

De justice: Commutative, en achaptant cher (je diz a credit) vendant a bon marché (je diz argent comptant). Que dict Caton en sa mesnagerie sus ce propos? Il fault (dict il) que le perefamiles soit vendeur perpetuel. Par ce moyen est impossible

qu’en fin riche ne devieigne, si tousjours dure l’apothecque. Distributive: donnant a repaistre aux bons (notez bons) et gentilz compaignons: lesquelz Fortune avoit jecté comme Ulyxes, sus le roc de bon appetit, sans provision de mangeaille: et aux bonnes (notez bonnes) et jeunes gualoises. (notez jeunes: Car scelon la sentence de Hippocrates, jeunesse est impatiente de faim mesmement si elle est vivace, alaigre, brusque, movente, voltigeante.) Lesquelles gualoises voluntiers et de bon hayt font plaisir a gens de bien: et sont Platonicques et Ciceronianes jusques la, qu’elles se reputent estre on monde nées non pour soy seulement: ains de leurs propres personnes font part a leur patrie, part a leurs amis.

De force, en abastant les gros arbres, comme un second Milo : ruinant les obscures forestz, tesnieres de Loups, de Sangliers, de Renards: receptacles de briguans et meurtriers: taulpinieres de assassinateurs, officines de faulx monnoieurs, retraictes d’haereticques: et les complanissant en claires guarigues et belles bruieres: jouant des haulx boys, et praeparant les

sieges pour la nuict du jugement.

De Temperance: mangeant mon bled en herbe, comme un Hermite, vivant de sallades et racines: me emancipant des appetiz sensuelz: et ainsi espargnant pour les estropiatz et souffreteux. Car ce faisant, j’espargne les sercleurs qui guaingnent argent: les mestiviers, qui beuvent voluntiers, et sans eau: les gleneurs, es quelz fault de la fouace: les basteurs, qui ne laissent ail, oignon, ne eschalote es jardins par l’auctorité de Thestilis Virgiliane : les meusniers, qui sont ordinairement larrons: et les boulangiers, qui ne valent gueres mieulx. Est ce petite espargne: Oultre la calamité des Mulotz, le deschet des greniers, et la mangeaille des Charrantons et Mourrins. De bled en herbe vous faictez belle saulse verde, de legiere concoction: de facile digestion. Laquelle vous esbanoist le cerveau, esbaudist les espritz animaulx, resjouist la veue, ouvre l’appetit, delecte le goust, assere le coeur, chatouille la langue, faict le tainct clair, fortifie les muscles, tempere le sang, alliege le diaphragme, refraischist le foye, desoppile la ratelle, soulaige les

roignons, assoupist les reins, desgourdist les spondyles, vuide les ureteres, dilate les vases spermaticques, abbrevie les cremasteres, expurge la vessie, enfle les genitoires, corrige le prepuce, incruste le balane, rectifie le membre: vous faict bon ventre, bien rotter, vessir, peder, fianter, uriner, esternuer, sangloutir, toussir, cracher, vomiter, baisler, mouscher, haleiner, inspirer, respirer, ronfler, suer, dresser le virolet, et mille autres rares adventaiges. J’entend bien (dist Pantagruel.) vous inferez que gens de peu d’esprit ne sçauroient beaucoup en brief temps despendre. Vous n’estez le premier, qui ayt conceu ceste haeresie. Neron le maintenoit, et sus tous humains admiroit Caligula son oncle, lequel en peu de jours avoit par invention mirificque despendu tout l’avoir et patrimoine que Tiberius luy avoit laissé. Mais en lieu de guarder et observer les loix coenaires et sumptuaires des Romains, la Orchie, la Fannie, la Didie, la Licinie, la Cornelie, la Lepidiane, la Antie, et des Corinthiens: par lesquelles estoit rigoureusement a un chascun defendu, plus par an despendre, que portoit son annuel revenu: vous avez faict Protervie: qui estoit entre les Romains sacrifice tel que l’aigneau Paschal entre les Juifz. Il y convenoit tout mangeable manger: le reste jecter on feu: rien ne reserver au lendemain. Je le peuz de vous justement dire, comme le dist Caton de Albidius, lequel avoir en excessive despense mangé tout ce qu’il possedoit, restant seulement une maison, y mist le feu dedans, pour dire, consummatum est, ainsi que depuys dist sainct Thomas Dacquin, quand il eut la Lamproye toute mangée. Cela non force.