Comment Pantagruel remonstre le sort des dez estre illicite. Chapitre XI.

Ce seroit (dist Panurge) plus toust faict et expedié a troys beaulx dez. Non, respondit Pantagruel. Ce sort est abusif, illicite, et grandement scandaleux. Jamais ne vous y fiez. Le mauldict livre du passetemps des dez feut long temps a inventé par le calumniateur ennemy en Achaïe pres Boure : et davant la statue de Hercules Bouraïque y faisoit jadis, de praesent en plusieurs lieux faict, maintes simples ames errer, et en ses lacz tomber. Vous sçavez comment Gargantua mon pere par tous ses royaulmes l’a defendu, bruslé avecques les moules et protraictz, et du tout exterminé, supprimé et aboly, comme peste tresdangereuse. Ce que des dez je vous ay dict, je diz semblablement des tales. C’est sort de pareil abus. Et ne m’alleguez au contraire le fortuné

ject des tales que feit Tibere dedans la fontaine de Aponefontaine de AponeApone a l’oracle de Gerion. Ce sont hamessons par les quelz le calumniateur tire les simples ames a perdition eternelle.

Pour toutesfoys vous satisfaire, bien suys d’advis que jectez troys dez sus ceste table. Au nombre des poinctz advenens nous prendrons les vers du feueillet que aurez ouvert. Avez vous icy dez en bourse? Pleine gibbessiere, respondit Panurge. C’est le verd du Diable, comme expose Merlinus Coccaius libro secundo de patria Diabolorum. Le Diable me prendroit sans verd, s’il me rencontroit sans dez. Les dez feurent tirez et jectez, et tomberent es poinctz de cinq, six, cinq. Ce sont, dist Panurge, seze. Prenons les vers seziemes du feueillet. Le nombre me plaist. et croy que nos rencontres seront heureuses. Je me donne a traver tous les Diables, comme un coup de boulle a travers un jeu de quilles, ou comme un coup de canon a travers un bataillon de gens de pied: guare Diables qui vouldra, en cas que autant de foys je ne belute ma femme future la premiere nuyct de mes nopces. Je ne en fays

doubte, respondit Pantagruel, ja besoing n’estoit en faire si horrificque devotion. La premiere foys sera une faulte, et vauldra quinze: au desjucher vous l’amenderez: par ce moyen seront seze. Et ainsi (dist Panurge) l’entendez? Oncques ne feut faict soloecisme par le vaillant champion, qui pour moy faict sentinelle au bas ventre. Me avez vous trouvé en la confrairie des faultiers? Jamais, jamais, au grand fin jamais. Je le fays en pere et en beat pere sans faulte. J’en demande aux joueurs.

Ces parolles achevées feurent aportez les oeuvres de Virgile. Avant les ouvrir, Panurge dist a Pantagruel. Le coeur me bat dedans le corps comme une mitaine. Touchez un peu mon pouls en ceste artere du braz guausche. A sa frequence et elevation vous diriez qu’on me pelaude en tentative de Sorbone. Seriez vous poinct d’avis, avant proceder oultre, que invocquions Hercules, et les déesses Tenites, les quelles on dict praesider en la chambre des Sors? Ne l’un (respondit Pantagruel) ne les aultres. Ouvrez seulement avec l’ongle.