Comment nous arrivasmes à l' oracle de la Bouteille. CHAP. XXXIII.

Nostre noble Lanterne nous esclairant et conduisant en toute joyeuseté, arrivasmes en l'Isle desiree, en laquelle estoit l' oracle de la Bouteille. Descendant Panurge en terre fist sur un pied la gambade en l'air gaillardement, et dist à Pantagruel : Aujourd'huy avons nous ce que cerchons aveques fatigues et labeurs tant divers. Puis se recommanda courtoisement à nostre lanterne: Icelle nous commanda tous bien esperer, et quelque chose qui nous apparust, n'estre aucunement effrayez. Approchans au temple de dive Bouteilletemple de dive Bouteilledive Bouteille nous convenoit passer parmy un grand vinoble faict de toutes espéces de vignes, comme Phalerne, Malvoisie, Muscadet, Taige, Beaune, Mirevaux, Orleans, Picardent, Arbois, Coussi, Anjou, Grave, Corsicque, Vierron, Nerac, et autres. Ledit vinoble fut jadis par le bon Bacchus planté,avec telle benediction, que tous temps il portoit feuille, fleur, et fruict,

comme les orangiers de Suraine. Nostre Lanterne magnifique nous commanda manger trois raisins par homme, mettre du pampre en nos souliers, et prendre une branche verde en main gauche. Au bout du vinoble passasmes dessous un arc antique, auquel estoit le trophee d'un beuveur bien mignonnement insculpé: sçavoir est, en un lieu long ordre de flaccons, bourraches, bouteilles, fiolles, barils, barraux, pots pintes, semaises antiques, pendentes d'une treille ombrageuse. En autre grande quantité d'ails, oignons, eschalottes, jambons, boutargues, parodelles, langues de boeuf fumees, formages vieux, et semblable confiture, entrelassee de pampre, et en semble, par grande industrie fagottees avecques des seps. En autre cent formes de voerres, comme voerres à pied, et voerres à cheval, cuveaux, retombes, hanaps, jadaux, salvernes, taces, gobelets, et telle semblable artillerie Bacchique. En la face de l'arc dessous le zoophore estoient ces deux vers inscripts.

Passant icy ceste poterne
Garny toy de bonne lanterne.

A cela, dist Pantagruel, avons nous pourveu. Car en toute la region de Lanternois, n'y à Lanterne meilleure, et plus

divine, que la nostre. Cestuy arc finissoit en une belle et ample tonnelle, toute faicte de seps de vignes, aornez de raisins de cinq cens couleurs diverses, et cinq cens diverses formes, non naturelles, mais ainsi composees par art d'agriculture, jaunes, bleus, tanez, azurez, blancs, noirs, verds, violets, riolez, piolez, longs, ronds, torangles, couillonnez, couronnez, barbus, cabus, herbus. La fin d'icelle estoit close de trois antiques lierres, bien verdoyans, et tous chargez de bagues La nous commanda nostre illustrissime lanterne, de ce lierre chascun de nous se faire un chappeau Albanois, et s'en couvrir toute la teste. Ce que fut faict sans demeure. Dessous, dist lors Pantagruel, ceste treille, n'eust ainsi jadis passé la Pontife de Jupiter. La raison, dist nostre preclare lanterne, estoit mystique. Car y passant auroit le vin, ce sont les raisins, au dessus de la teste, et sembleroit estre comme maistrisee et dominee du vin pour signifier, que les Pontifes et tous personnages, qui s'addonnent et dedient à contemplation des choses divines, doivent en tranquillité leurs esprits maintenir, hors toute perturbation de sens: laquelle plus est manifestee en yvrognerie, qu'en autre passion, qu'elle que soit.

Vous pareillement au temple ne seriez receus de la dive Bouteille, estans par cy dessous passez, sinon que Bacbuc la noble Pontife vist de pampre vos souliers plains: qui est acte du tout, et par entier diametre contraire au premier, et signification evidente, que le vin vos est en mespris, et par vos conculqué et subjugué. Je, dist frere Jean, ne suis point clerc, dont me desplaist: mais je treuve dedans mon breviaire, que en la revelation, fut comme chose admirable, veuë une femme, ayant la lune sous les pieds: c'estoit, comme m'a exposé Bigot, pour signifier, qu'elle n'estoit de la race et nature des autres, qui toutes ont à rebours la lune en teste, et par consequent le cerveau tousjours lunatique cela m'induit facilement à croire, ce que dites madame lanterne ma mie.