Comment les oiseaux gourmandeurs sont muets en l' Isle Sonnante. CHAP. V.

Il n'avoit ces mots parachevez quant pres de nous avolerent vingt cinq ou trente oiseaux, de couleur et pennage que encores n'avois veu en l'Isle. Leur pennage estoit changeant d'heure en heure, comme la peau d'un chameleon, et comme fleur de tripoleon, ou teucrion. Et tous avoient au dessous de l'aisle gauche une marque comme de deux diametres, mipartissant un cercle, ou d'une ligne perpendiculaire tombante sur une ligne droite.

A tous estoit presque d'une forme, mais non à tous d'une couleur, es uns estoit blanc, es autres verdes, es autres rouges, es autres violettes, es autres bleues. Qui sont, demande Panurge, ceux cy, et comment les nommez? Ils sont, respondit Aeditue, metifs, Nous les appelons gourmandeurs, et ont grand nombre de riches gourmanderies en vostre monde. Je vous prie dis-je, faites les un peu chanter afin qu'entendions leur voix. Ils ne chantent, respondit-il, jamais: mais ils repaissent au double en recompense. Ou sont, demandois-je, les femelles? Ils n'en ont point, respondit-il, comment donc, infera Panurge, sont-ils ainsi croutelevez et tous mangez de grosse verole? Elle est, dit-il, propre à ceste espece d'oiseaux, à cause de la marine qu'ils hantent quelque fois.

Puis nous dit le motif de leur venue. Icy pres de vous est cestuy pour veoir si parmy vous recognoistra une magnifique espece de gots, oiseaux de proye terribles, non toutesfois venans au leurre, ne recognoissans le gand, lesquels ils disent estre en vostre monde. Et d'iceux les uns porter jects aux jambes bien beaux et precieux, avec inscription aux vervelles, par laquelle qui mal y pensera, est condamné d'estre

soudain tout conchié. Autres au devant de leur pennages porter le trophee d'un calomniateur, et les autres y porter une peau de bellier. Maistre Aeditue, dist Panurge, il est vray, mais nous ne les cognoissons.

Ores, dit Aeditue, c'est assez parlementé, allons boire, mais repaistre, dit Panurge. Repaistre, dit Aeditue, et bien boire moitié au per moitié à la couche, rien si cher ne precieux est que le temps, employons le en bonnes oeuvres. Mener il nous vouloit premierement baigner dedans les thermes des Cardingaux belles et delicieuses souverainement yssans des bains nous faire par les Aliptes oindre de precieux basme. Mais Pantagruel luy dist qu'il ne beuvroit que trop sans celà. Adonques nous conduit en un grand et delicieux refectouer, et nous dist l'hermite Braguibus vous a fait jeusner par quatre jours, quatre jours serez icy à contrepoints sans cesser de boire et de repaistre. Dormirons nous point ce pendant, dist Panurge, à vostre liberté, respondit Aeditue, car qui dort, il boit. Vray Dieu quelle chere nous fismes. O le grand homme de bien.