Comment les officiers de la Quinte diversement s'exercent, et comment la dame nous retint en estat d'Abstracteurs. CHAP. XXI.

Je vy apres grand nombre de ses officiers susdits, lesquels blanchissoient les Ethiopiens en peu d'heure, du fond d'un panier leur frottant seulement le ventre.

Autres à trois couples de Regnards souz un joug aroient le rivage areneux, et ne perdoient leur semence.

Autres lavoient les tuilles, et leur faisoient perdre couleur.

Autres tiroient eau des Pumices, que vous appellez Pierre-ponce, la pillant long temps en un mortier de marbre, et luy changeoient substance.

Autres tondoient les Asnes, et y trouvoient toison de laine bien bonne.

Autres cueilloient des Espines raisins, et figues des chardons.

Autres tiroient laict des boucs, et dedans un crible le recevoient, à grand profit de mesnage.

Autres lavoient les testes des Asnes, et n'y perdoient la laixive.

Page [85]

Autres chassoient aux vents avec des rets, et y prenoient Escrevisses Decumanes.

J'y vy un jeune Spodizateur, lequel artificiellement tiroit des peds d'un Asne mort, et en vendoit l'aune cinq sols.

Un autre putrefioit des Sechaboth. O la belle viande.

Mais Panurge rendit vilainement sa gorge, voyant un Archasdarpenim, lequel faisoit putrefier grande doye d'urine humaine en fiant de cheval, avec force merde Chrestienne. Fy le vilain. Il toutesfois nous respondit que d'icelle sacree distilation abbreuvoit les Roys et grans Princes, et par icelle leur allongeoit la vie d'une bonnetoise ou deux.

Autres rompoient les Andouilles au genoil.

Autres escorchoient les Anguilles par la queuë, et ne crioient lesdites Anguilles avant que d'estre escorchees, comme font celles de Melun.

Autres de neant faisoient choses grandes, et grandes choses faisoient à neant retourner.

Autres coupoient le feu avec un cousteau, et puisoient l'eau avec un rets.

Autres faisoient de vessies lanternes, et de nues poisles d'airain. Nous en veismes

Page [86]
douze autres banquetans souz une fueillade, et beuvans en belles et amples retumbes vins de quatre sortes, frais et delicieux à tous, et à toute reste: et nous fut dit, qu'ils haulsoient le temps selon la maniere du lieu: et qu'en ceste maniere Hercules jadis haulsa le temps avec Atlas.

Autres faisoient de necessité vertu, et me sembloit l'ouvrage bien beau, et à propos. Autres faisoient Alchimie avec les dens: en ce faisant emplissoient assez mal les selles percees.

Autres dedans un long parterre songneusement mesuroient les saux des pusses: et cestuy acte m'affermoient estre plus que necessaire, au gouvernement des Royaumes, conduictes des guerres, administrations des Republiques: allegant que Socrates, lequel premier avoit des cieux en terre tiré la Philosophie, et d'oisive et curieuse, l'avoit rendue utile et profitable, employoit la moitié de son estude à mesurer le saux des pusses, comme atteste Aristophanes le Quintessential.

Je vy deux Giborins à part sur le haut d'une tour, lesquels faisoient sentinelle, et nous fut dit, qu'ils gardoient la Lune des loups.

Page [87]

J'en rencontray quatre autres, en un coin de jardin, amerement disputans, et prests à se prendre au poil l'un l'autre: demandant dont sourdoit leur different, entendy, que ja quatre jours estoient passez, depuis qu'ils avoient commencé disputer, de trois hautes et plus que Phisicales propositions: à la resolution desquelles, ils se promettoient montaignes d'or. La premiere estoit de l'ombre d'un Asne couillard: l'autre de la fumee d'une Lanterne: la tierce, du poil de Chevre, scavoir si c'estoit laine. Puis nous fut dit, que chose estrange ne leur sembloit estre, deux contradictoires vrayes en mode, en forme, en figure et en temps. Chose pour laquelle les Sophistes de Paris plustost se feroient desbaptiser, que la confesser.

Nous curieusement considerans les admirables operations de ces gens, survint la Dame avec sa noble compagnie, ja reluisant le clair Hesperus. A sa venue fusmes derechef en nos sens espouventez, et esblouys en nostre veuë. Incontinent nostre effray apperceut, et nous dist: Ce que fait les humains pensemens esgarer par les abismes d'admiration n'est la souveraineté des effects, lesquels apertement ils esprouvent naistre des causes naturelles, moyennent l'industrie des sages artisans: c'est la

Page [88]
nouveauté de l'experience entrant en leurs sens, non prevoyans la facilité de l'oeuvre, quant jugement serain associe estude diligent. Pourtant soyez en cerveau, et de toute frayeur vous despouillez, si d'aucune estes saisis à la consideration de ce que voyez par mes officiers estre fait. Voyez, entendez, contemplez à vostre libre arbitre, tout ce que ma maison contient: vous peu à peu emancipans du servage d'ignorance: Le cas bien me siet en volonté. Pour de laquelle vous donner enseignement non feint, en contemplation des studieux desirs, desquels me semblez avoir en vos coeurs fait insigne mont-joye, et suffisante preuve, je vous retiens presentement en estat et office de mes abstracteurs. Par Geber mon premier Tabachin y serez descris au partement de ce lieu. Nous la remerciasmes humblement, sans mot dire, acceptasmes l'offre du bel estat, qu'elle nous donnoit.

Réel    Hypothétique    Fictif    Mythique   
Région, contrée    Ville, village    Bâtiment    Étendue, cours d'eau    Montagne, île, ...    Autre