Comment le pavé du temple estoit faict par emblemature admirable. CHAP. XXXVII.

Leuës ces inscriptions, jettay mes yeux à la contemplation du manifique temple, et considerois l'incredible compacture du pavé, auquel, par raison, ne peut estre ouvrage comparé quiconque, soit, ou ait esté dessous le firmament, fust-ce celuy du temple de Fortunetemple de FortuneFortune en Preneste, au temps de Sylla, ou le pavé des Grecs, appellé asserotum, lequel fist Sosistratus en pergame. Car il estoit à ouvrage tesseré, en forme de petits carreaux, tous de pierres fines, et polies, chascune en sa couleur naturelle: L'une de jaspe rouge, tainct plaisamment de diverses macules: l'autre d'Ophite: l'autre de Porphyre: l'autre de Licoptalmie, semé de scintiles d'or menues comme atomes: l'autre d'Agathe à onde de petis flammeaux, confus et sans ordre, de couleur laictee: l'autre de Calcedoine trescher: l'autre de Jaspe verd, avec certaines veines rouges et Jaunes: et estoient en leur assiete

departies par ligne diagonale.

Dessus le portique, la structure du pavé estoit une emblemature, à petites pierres rapportees, chascune en sa naïfve couleur, servans au dessain des figures, et estoit comme si par dessus le pavé susdit, on eust semé une Jonchee de Pampre, sans trop curieux agensement: Car en un lieu sembloit estre espandu largement, en l'autre moins: et estoit ceste infoliature insigne en tous endroits, mais singulierement y apparoissoient, au demy-jour aucuns limassons, en un lieu rampans sus les raisins, en autre, petis lisars courans à travers le Pampre, en autre apparoissoient les raisins à demy, et raisins totalement meurs: par tel art et engin de l'Architecte composez et formez, qu'ils eussent aussi facilement deceu les estourneaux et autres petis oiselets, que fist la peincture de Xeuxis Heracleotain, quoy que soit ils nous trompoient tresbien: Car à l'endroit, auquel l'Architecte avoit le pampre bien espois semé, craignans nous offenser les pieds, nous marchions haut à grandes enjambees, comme on fait passant quelque lieu inegal et pierreux. Depuis jetay mes yeux à contempler la voulte du temple, avec les parois, lesquels estoient tous incrustez de marbre, et

porphire, à ouvrage mosayque: avec une mirifique emblemature, depuis un bout jusques à l'autre, en laquelle estoit, commençant à la par senestre de l'entree, en elegance incroiable, representee, la bataille, que le bon Bacchus gagna contre les indians, en la maniere, que s'ensuit.