Comment les chatz fourrez vivent de corruptions.

Ces parolles n’estoient achevees quand frere Jehan apperceut soixante et huict tahuz barquettes et fregates arrivantes au port, la soudain courut demander nouvelles ensembles de quelle marchandise estoient les vaisseaux chargez: et veid que tous chargez estoient de venaison, leuraux, chappons, palumbes, cochons, chevreux, vanneaux, poullets, canars, allerans oisons et autre sorte de gibbier: parmy aussi apperceut quelques pieces de Velours, Satin, Damars, Adoncques interrogea les voyagers, ou et a qui ils portoient ces frians morceaux, ils luy respondirent que cestoit a Grippeminault aux chatz fourrez et chates fourrees. Comment dist

frere Jehan, appellez vous ces drogues corruptions? Respondirent les voyagers, Ilz doncques dist frere Jehan, de corruptions vivent en generation periront, Par la vertu Dieu c’est cela, leurs peres mangerent les bons gentils-hommes qui par raison de leur estat s’exerseoient a la vollerie et a la chasse, pour plus estre en temps de guerre escors et ja endurciz au travail, Car venation est un simulachre de bataille et oncques n’en mentit Xenophon escrivant estre de la vennerie comme du cheval de Troye yssus tous bons chefs de guerre, je ne suys pas clerc, mais on me la dict, et je le croy: les ames d’iceux selon l’oppinion de Grippeminault apres leur mort sont entrees es sangliers, cerfs, chevreux, hayrons, perdrix et autres tels animaux, lesquels ils avoient leur premiere vie durante tousjours aymé et cherché, Orez ces chatz fourrez avoir leurs chasteaux, terres, dommaines, possessions, rentes et revenuz: destruit et devore, encores leur cherchent-ils le sang et l’ame en l’autre vie, O le gueux de bien qui nous en donna l’advertissement a l’enseigne de la mengeoire installee, au dessus du ratelier. Voire, mais dist Panurge, On a faict crier de par le grand Roy que personne n’eust sur peine de la hart a prendre cerfz, ne bisches, sangliers, ne chevreux, Il est vray respondit un pour tous: mais le grand Roy est tout bon et benin, Ces chatz fourrez sont tant enragez et affamez de sang chrestien que moins de peur avons nous offençans le grand Roy que d’espoir ne entretenans ces chatz fourrez par corruptions, mesmement que demain Grippeminault marie une sienne chatte fourree avecques un gros Mitouart Chat bien fourré, Ou le temps passé on les appelloit machefoings, mais las ils n’en machent plus, nous de present les nommons machelevraux, macheperdrix, machebeccasses, machefaisans, machepouletz, machechevreux, macheconnins, machecochons: d’autre viande ne sont alimentez, bren bren, dist frere Jehan, l’annee prochaine nous les appellerons machestrons, machefoire, machemerde, me voulez vous croire? Ouy dea respondit la brigate, faisons dist il deux choses, premierement saisissons nous de tout ce gibbier que voyez, aussi bien suis je fasché de salleures, elles me eschauffent les hipocondres, j’entends bien le payant. Secondement retournons au guischet et mettons a sac tous ces chats fourrez. Sans faute, dist Panurge, je n’y vois pas, je suis un peu couart de ma nature.