Les propos des bienyvres. Chapitre v.

Puis entrerent en propos de resjeumer on propre lieu.

Lors flaccons d'aller: jambons

de troter, goubeletz de voler, breusses de tinter Tire, baille, tourne, brouille. Boutte a moy, sans eau, ainsi mon amy fouette moy ce verre gualentement, produiz moy du clairet, verre pleurant. Treves de soif, Ha faulse fiebvre, ne t'en iras tu pas? Par ma fy ma commere je ne peuz entrer en bette. Vous estez morfondue m'amie. Voire. Ventre sainct Qenet parlons de boire. Je ne boy que a mes heures, comme la mulle du pape. Je ne boy que en mon breviaire, comme un beau pere guardian. Qui feut premier soif ou beuverye? Soif. Car qui eust beu sans soif durant le temps de innocence? Beuverye. Car privatio presupponit habitum. Je suys clerc. Foecundi calices quen non fecere disertum. Nous aultres innocens ne beuvons que trop sans soif. Non moy pecheur sans soif. Et si non presente pour le moins future. La prevenent comme entendez. Je boy pour la soif advenir. Je boy eternellement, ce m'est eternite de beuverye, et beuverye de eternite. Chantons beuvons un motet. Entonnons. Ou est mon entonnoir? Quoy je ne boy que par procuration.

Mouillez vous pour seicher, ou vous seichez pour mouiller? Je n'entens poinct la theoricque de la praticque je me ayde quelque peu. Haste. Je mouille, je humecte, je boy: Et tout de peur de mourir. Beuvez tousjours vous ne mourrez jamais. Si je ne boy je suys a sec. Me voyla mort. Mon ame s'en fuyra en quelque grenoillere. En sec jamais l'ame ne habite. Somelliers, o createurs de nouvelles formes rendez moy de non beuvant beuvant. Perannite de arrousement par ces nerveux et secz boyaulx. Pour neant boyt qui ne s'en sent. Cestuy entre dedans les venes, la pissotiere n'y aura rien. Je laveroys voluntiers les tripes de ce veau que j'ay ce matin habille. J'ay bien saburre mon stomach. Si le papier de mes schedules beuvoyt aussi bien que je foys, mes crediteurs auroient bien leur vin quand on viendroyt a la formule de exhiber.

Ceste main vous guaste le nez. O quants aultres y entreront, avant que cestuy cy en sorte. Boire a si petit gué: c'est pour rompre son poictral. Cecy s'appelle pipee a flaccons. Quelle difference est entre bouteille et flaccon? grande, car bouteille est fermee a bouchon, et flaccon a viz. De belles. Noz peres beurent bien et vuiderent les potz, C'est bien chié chante, beuvons. Voulez vous rien mander a la riviere? Cestuy cy va laver les tripes. Je ne boy en plus q'une esponge. Je boy comme un templier, et je tanquam sponsus , et moy sicut terra sine aqua . Un synonyme de jambon? c'est une compulsoire de beuvettes. c'est un poulain. Par le poulain on descend le vin en cave, par le jambon, en l'estomach. Or c'a a boire, boire c'a. Il n'y a poinct charge. Respice personam : pone pro duos: bus non est in usu. Si je montois aussi bien comme j'avalle, je feusse piec'a hault en l'aer. Ainsi se feist Jacques cueur riche. Ainsi profitent boys en friche. Ainsi conquesta Bacchus l' Inde. Ainsi philosophie melinde. Petite pluye abat grand vend Longues beuvettes rompent le tonnoire: Mais si ma couille pissoit telle urine, la vouldriez vous bien sugcer? Je retiens apres. paige baille, je t'insinue ma nomination en mon tour. Hume Guillot, encores y en a il un pot. Je me porte pour appellant de soif, comme d'abus. Paige relieve mon appel en forme. Ceste roigneure. Je souloys jadis boyre tout: maintenant je n'y laisse rien. Ne nous hastons pas, et amassons bien tout. Voycy trippes de jeu, et guodebillaux d'envy. de ce fauveau a la raye noire. O pour dieu estrillons le a profict de mesnaige. Beuvez ou je vous. Non, non. Beuvez je vous en prye. Les passereaux ne mangent si non que on leurs tappe les queues. Je ne boy si non qu'on me flatte. Lagona edatera. Il n'y a raboulliere en tout mon corps, ou cestuy vin ne furette la soif. Cestuy cy me la fouette bien. cestuy cy me la bannira du tout. Cornons icy a son de flaccons et bouteilles, que quiconques aura perdu la soif, ne ayt a la chercher ceans, Longs clysteres de beu verie l'ont faict vuyder hors le logis. Le grand dieu feist les planettes: et nous faisons les platz netz. J'ai la parolle de dieu en bouche: Sitio. La pierre dicte abestoz n'est plus inextinguible que la soif de ma paternite. L'appetit vient en mangeant, disoyt Angest on mans. la soif s'en va en beuvant. Remede contre la soif? Il est contraire a celluy qui est contre morsure de chien; courrez tousjours apres le chien, jamais ne vous mordera, beuvez tousjours avant la soif, et jamais ne vous adviendra. Je vous y prens je vous resveille. Sommelier eternel guarde nous de somme. Argus avoyt cent yeulx pour veoir, cent mains fault a un sommelier comme avoyt Briareus, pour infatigablement verser. mouillons hay il faict beau seicher. Du blanc. verse tout. verse de par le diable, verse. deca, tout plein, la langue me pelle. Lans tringue, a toy compaing, de hayt, de hayt, la, la, la, c'est morfiaillé cela. O lachryma Christi: c'est de la Deviniere. c'est vin pineau. O le gentil vin blanc, et par mon ame ce n'est que vin de tafetas. Hen hen, il est a une aureille, bien drappé, et de bonne laine. Mon compaignon couraige. Pour ce jeu nous ne voulerons pas, car j'ay faict un levé. Ex hoc in hoc. Il n'y a poinct d'enchantement Chascun de vous l'a veu. Je y suis maistre passe. A brum a brum, je suis prebstre Mace. O les beuveurs, O les alterez. Paige mon amy, emplis icy et couronne le vin je te pry. A la cardinale Natura abhorret vacuum. Diriez vous q'une mousche y eust beu? A la mode de Bretaigne. Net, net, a ce pyot, Avallez, ce sont herbes.