Comment Gargantua feut institué par un Sophiste en lettres latines. Chap. xiiij.

Ces propos entenduz le bon homme Grandgousier fut ravy en admiration considerant le hault sens et merveilleux entendement de son filz Gargantua.

Et dist a ses gouvernantes: Philippe roy de MacedonePhilippe roy de MacedoneMacedone congneut le bon sens de son filz Alexandre, a manier dextrement

un cheval. Car ledict cheval estoit si terrible et efrené que nul ausoit monter dessus: Par ce que a tous ses chevaucheurs il bailloit la saccade: a l'un rompant le coul, a l'aultre les jambes, a l'aultre la cervelle, a l'aultre les mandibules. Ce que considerant Alexandre en l'hippodrame (qui estoit le lieu ou l'on pourmenoit et voultigeoit les chevaulx) advisa que la fureur du cheval ne venoit que de frayeur qu'il prenoit a son umbre. Dont montant dessus le feist courir encontre le Soleil, si que l'umbre tumboit par derriere, et par ce moyen rendit le cheval doulx a son vouloir. A quoy congneut son pere le divin entendement qui en luy estoit et le feist tresbien endoctriner par Aristoteles qui pour lors estoit estimé sus tous philosophes de Grece.

Mais je vous diz, qu'en ce seul propos que j'ay presentement davant vous tea mon filz Gargantua, je congnois nu que son entendement participe de quelque divinité: tant je le voy agu, subtil,

profund, et serain. Et parviendra a degré souverain de sapience, s'il est bien institué. Pourtant je veulx le bailler a quelque homme scavant pour l'endoctriner selon sa capacite. Et n'y veulx rien espargner.

De faict l'on luy enseigna un grand docteur sophiste nommé maistre Thubal Holoferne, qui luy aprint sa charte si bien qu'il la disoit par cueur au rebours et y fut cinq ans et troys mois, puis luy leut, Donat, le Facet, Theodolet, et Alanus in parabolis : et y fut treze ans six moys et deux sepmaines.

Mais notez que ce pendent il luy aprenoit a escripre Gotticquement et escripvoit tous ses livres. Car l'art d'impression n'estoit encores en usaige.

Et portoit ordinairement un gros escriptoire pesant plus de sept mille quintaulx, duquel le gualimart estoit aussi gros et grand que les gros pilliers de Enay, et le cornet y pendoit a grosses chaisnes de fer a la capacite d'un tonneau de marchandise.

Puis luy leugt De modis significandi avecques les commens de Hurtebize, de Fasquin, de tropditeulx, de Gualehaul, de Jean le veau, de billonio, Brelinguandus, et un tas d'aultres, et y fut plus de dix huyt ans et unze moys. Et le sceut si bien que au coupelaud il le rendoit par cueur a revers. Et prouvoit sus ses doigtz a sa mere que de modis significandi non erat scientia.

Puis luy leugt le compost, ou il fut bien seize ans et deux moys, lors que son dict precepteur mourut: et fut l'an mil quatre cens et vingt, de la verolle que luy vint.

Apres en eut un aultre vieux tousseux, nomme maistre Jobelin bridé, qui luy leugt Hugutio, Hebrard, Grecisme, le doctrinal, les pars, le quid est, le supplementum, Marmotret, de moribus in mensa servandis, Seneca de quatuor virtutibus cardinalibus, Passavantus cum commento. Et dormi secure pour les festes. Et quelques aultres de semblable farine, a la lecture desquelz il devint aussi saige qu'onques puis ne fourneasmes nous.