¶De l’adolescence de Gargantua.

Page [40]

Chapitre. x.

Gargantua depuys les troys jusques a cinq ans feut nourry et institue en toute discipline convenente par le commandement de son pere, et celluy temps passa comme les petitz enfans du pais, c’est assavoir a boyre/ manger/ et dormir, a manger/ dormir/ et boyre, a dormir/ boyre/ et manger. Tousjours se vaultroyt par les fanges, se mascaroyt le nez, se chaffourroyt le visage. Et aculoyt ses souliers et baisloit souvent aux mousches et couroyt voulentiers apres les parpaillons, desquelz son pere tenoyt l’empire. Il pissoyt suz ses souliers, il chyoit en sa chemise, il morvoyt dedans sa soupe. Et patrouilloit par tout. Les petitz chiens de son pere mengeoyent en son escuelle. Luy de mesmes mengeoit avecques eulx: il leurs mordoyt les aureilles. Ils luy graphignoyent le nez. Il leurs souffloyt au cul: Ils luy leschoyent les badigoinces. Et sabez quey hillotz, que mau de pipe vous vyre, ce petit paillard tousjours tastonnoyt ses gouvernantes cen dessus dessoubz, cen devant derriere, harry bourriquet: et desja commenczoit exercer sa braguette. Laquelle un chascun jour ses gouvernantes ornoyent de beaux boucquets, de beaux rubans, de belles fleurs, de beaux flocquars: et passoyent leur temps

a la fayre revenir entre leurs mains, comme la paste dedans la met. Puys s’esclaffoyent de ryre quant elle levoyt les aureilles, comme si le jeu leur eust pleu. L’une la nommoit ma petite dille, l’aultre ma pine, l’autre ma branche de coural, l’autre mon bondon, mon bouchon, mon vibrequin, mon possouer, ma teriere, ma petite andouille vermeille, ma petite couille bredouille. Elle est a moy disoyt l’une. C’est la mienne, disoyt l’aultre. Moy, (disoyt l’aultre) n’y auray je rien? par ma foy je la couperay doncques. Ha couper, (disoyt l’aultre) vous luy feriez mal ma dame, coupez vous la chose aux enfans? Et pour s’esbatre comme les petitz enfans de nostre pays luy feirent un beau virollet des aesles d’un moulin a vent de Myrebalays.