¶Comment feut bastie et dotee l’abbaye des Thelemites. Chap. li.

Pour le bastiment/ et assortiment de l’abbaye Gargantua feist livrer de contant vingt et sept cent mille huyt cent trente et un mouton a la grand laine, et par chascun an jusques a ce que le tout feust parfaict assigna sus la recepte de la Dive seize cent soixante et neuf mille escuz au soleil. Pour la fondation et entretenement d’ycelle donna a perpetuite vingt et troys cent soixante neuf mille cinq cent quatorze nobles a la rose de rente fonciere indemnez, amortyz/ et solvables par chascun an a la porte de l’abbaye. Et de ce leurs passa belles letres. Le bastiment feut en figure exagone en telle faczon que a chascun angle estoyt bastie une grosse tour ronde: a la capacite de soixante pas en diametre. Et estoient toutes pareilles en grosseur et protraict. La rivi

ere de Loyre decoulloyt sus l’aspect de Septentrion. Au pied d’icelle estoyt une des tours assise nommee Artisse. En tirant vers L’orient estoit une aultre nommee Calaer. L’aultre ensuyvant Anatole. L’aultre apres Mesembrine. L’aultre apres/ Hesperie. La derniere / Cryere. Entre chascune tour estoyt espace de troys cent douze pas. Le tout basty a six estages/ comprenant les caves soubz terre pour un. Le second estoit voulte a la forme d’une anse de panier. Le reste estoit embrunche de guy de Flandres a forme de culz de lampes Le dessus couvert D’ardoize fine: avecques l’endousseure de plomb a figures de petitz manequins et animaulx bien assortez et dorez avecques les goutieres que yssoient hors la muraille entre les croyzees, pinctes en figure diagonale de or et azur, jusques en terre/ ou finissoient en grands eschenalx qui tous conduisoient en la riviere par dessoubz le logis. Ledict bastiment estoit cent foys plus magnificque que n’est Bonivet. Car en icelluy estoient neuf cens trente et deux chambres: chascune guarnie de arriere Chambre/ cabinet/ guarderobbe / chapelle/ et yssue en une grande salle. Entre chascune tour au meillieu dudict corps de logis estoyt une viz brizee dedans icelluy mesmes corps. De laquelle les marches estoient de marbre serpentin: longues de xxii. piedz: l’espesseur estoyt de troys doigtz: assizez par nombre de douze entre chascun repous. En chascun repous estoient deux beaux arceaux d’antique, par lesquelz estoit repceu la clarte: et par iceulx on entroit en un cabinet faict a cler voys de largeur de la dicte viz: et montoit jusques au dessus la couverture, et la finoit en pavillon. Par icelles viz on entroit de chascun couste en une grande salle/ et des salles es chambres. Depuis la tour Artice jusques a Cryere estoient les belles grandes libraries en Grec/ Latin/ Hebrieu/ Francoys/ Tuscan et Hespaignol: disperties par les divers estaiges scelon iceulx langaiges. Au meillieu estoit une merveilleuse viz, de laquelle l’entree estoit par le dehors du logis en un arceau large de six toizes. Icelle estoit faicte en telle symmetrie et capacite, que six hommes d’armes la lance sus la cuisse povoient de fronc ensemble monter jusques au dessus de tout le bastiment. Depuis la tour Anatole jusques a Mesembrine estoient belles grandes galeries toutes painctes des antiques prouesses et histoires et descriptions de la terre. Au milieu estoyt une pareille montee et porte comme avons dict du couste de la riviere. Sus icelle porte estoit escript en grosses lettres antiques ce qui s’ensuyt.