De l'estat d'aulcuns pays. Chapitre. vi.

Le noble royaulme de France prosperera et trihumphera ceste annee en tous plaisirs et delices, tellement que les nations estranges voluntiers se y retireront.Petitz bancquetz, petitz esbatemens, milles joyeusetez se y feront ou un chascun prendra plaisir, on n'y veit oncques tant de vins ny plus frians, force raves en Lymousin, force chastaignes en perigort, et Daulphiné, force olyves en Languegoth, force sables en Olone, force poissons en la mer, force estoilles au ciel, force sel en Brouage, Planté de bledz, legumaiges, fruitages jardinaiges, beurres, laictaiges, Nulle peste, nulle guerre, nul ennuy, bren de pauvreté, bren de soucy, bren de melanchollie, et ces vieulx doubles ducatz, nobles a la rose, angelotz: aigrefins, royaulx, et moutons a la grand laine, retourneront

en usance avecques planté de Serapz et escuz au soleil. Toutesfoys sus le millieu de l'Esté, sera a redoubter quelque venue de pusses noyres et cheussons de la Deviniere. Adeo nihil est ex omni parte beatum . Mais il les fauldra brider a force de collations vespertines.

Italie, Romanie, Naples, Cecile, demouront ou elles estoient l'an passé. Ilz songeront bien profundement vers la fin du karesme, et resveront quelques foys vers le hault du jour.

Alemaigne, Souisses, Saxe, Strasbourg, Anvers etc. profiteront s'ilz ne faillent: les porteurs de rogatons les doibvent redoubter, et ceste annee ne se y fonderont pas beaucoup de anniversaires.

Hespaigne, Castille, Portugal, arragon seront bien subiectz a soubdaines alterations, et craindront de mourir bien fort autant les jeunes que les vieulx. et pourtant se tiendront chaudement et souvent

compteront leurs escutz, s'ilz en ont.

Angleterre, Escosse, les Estrelins, seront assez maulvais Pantagruelistes. Autant sain leurs seroit le vin que la biere, pourveu qu'il feust bon et friant. A toutes tables leur espoir sera en l'arriere jeu. Sainct Treignan d' Escosse fera de miracles tant et plus. Mais des chandelles qu'on luy portera, il ne verra goutte plus clair, Si aries ascendent de sa busche ne trebusche, et n'est de sa corne escorné.

Moscovites, Indiens, Perses, et Troglodytes, souvent auront la cacquesangue, par ce qu'ilz ne vouldront estre par les Romanistes belinez, attendu le bal de Sagittarius ascendent.

Bohesmes, Juifz, Egyptiens, ne seront pas ceste annee reduictz en plate forme de leur attente. Venus les menasse aigrement des escrouelles guorgerines mais ilz condescendront au vueil du roy des parpaillons.

Escargotz, Sarabovytes, Cauquemarres,

Canibales, seront fort molestez des mousches bovynes et peu joueront des cymbales, et manequins, si le Guaiac n'est de requeste.

Austriche, Hongrie, Turquie, par ma foy mes bons hillotz je ne scay comment ilz se porteront, et bien peu m'en soucie veu la brave entrée du Soleil en Capricornus, et si plus en scavez n'en dictes mot, mais attendez la venue du boyteux.