De l'enfance de Pantagruel. Chapitre. iiij.

Je trouve par les anciens historiographes et poetes, que plusieurs sont nez en ce monde en facons bien

estranges que seroient trop longues a racompter, lisez le. vij. livre de Pline, si aves loysir, Mais vous n'en ouystes jamais d'une si merveilleuse comme fut celle de Pantagruel, car c'estoit chose difficille a croyre comment il creut en corps et en force en peu de temps. Et n'estoit rien Hercules qui estant au berseau tua les deux serpens: car lesdictz serpens estoyent bien petitz et fragiles, Mais Pantagruel estant encores au berseau feist cas bien espouventables. Je laisse icy a dire comment a chascun de ses repas il humoit le laict de quatre mille six cens vaches. Et comment pour luy faire un paeslon a cuire sa bouillie furent occupez tous les pesliers de Saumur en Anjou, de Villedieu en Normandie, de Bramont en Lorraine, et luy bailloit on ladicte bouillie en un grand timbre qui est encores de present a Bourges pres du palays, mais les dentz luy estoient desja tant crues et fortifiées qu'il en rompit dudict tymbre un grand morceau comme tresbien apparoist.Certains jours vers le matin que on le vouloit faire tetter une de ses vaches (car de nourrisses il n'en eut jamais aultrement comme dict l'hystoire) Il se deffit des liens qui le tenoyent au berceau un des bras, et vous prent ladicte vache par dessoubz le jarret, et luy mangea les deux tetins et la moytie du ventre, avecques le foye et les roignons, et l'eust toute devoree, n'eust este qu'elle cryoit horriblement comme si les loups la tenoient aux jambes, auquel cry le monde arriva, et osterent ladicte vache a Pantagruel, mais ilz ne sceurent si bien faire que le jarret ne luy en demourast comme il le tenoit, et le mangeoit tresbien comme vous feriez d'une saulcisse, et quand on luy voulut oster l'os, il l'avalla bien tost, comme un Cormoran feroit un petit poisson, et apres commenca a dire, bon bon bon, car il ne scavoit encores bien parler, voulant donner a entendre, que il avoit trouve fort bon: et qu'il n'en failloit plus que autant. Ce que voyans ceulx qui le servoyent, le lierent a gros cables comme sont ceulx que l'on faict a Tain pour le voyage du sel a Lyon : ou comme sont ceulx de la grand nauf Francoyse qui est au port de Grace en Normandie. Mais quelquefoys que un grand Ours que nourrissoit son pere eschappa, et luy venoit lescher le visaige, car les nourrisses ne luy avoyent bien apoinct torche les babines, il se deffist desdictz Cables aussi facillement comme Sanson d'entre les Philistins, et vous print monsieur de l'Ours, et le mist en pieces comme un poulet, et vous en fist une bonne gorge chaulde pour ce repas. Parquoy craignant Gargantua qu'il se gastast, fist faire quatre grosses chaines de fer pour le lyer, et fist faire des arboutans a son berceau bien afustez. Et de ces chaines en avez une a la Rochelle, que l'on leve au soir entre les deux grosses tours du havre. l'Aultre est a Lyon, l'Aultre a Angiers. Et la quarte fut emportee des diables pour lier. Lucifer qui se deschainoit en ce temps la a cause d'une colicque qui le tormentoit extraordinairement, pour avoir mangé l'ame d'un sergeant en fricassee a son desjeuner. Dont povez bien croire ce que dict Nicolas de Lyra sur le passaige du psaultier ou il est escript. Et Og regem Basan . Que ledict Og estant encores petit estoit tant fort et robuste, qu'il le failloit lyer de chaisnes de fer en son berceau. Et ainsi demoura coy et pacificque: car il ne pouvoit rompre tant facillement lesdictes chaisnes, mesmement qu'il n'avoit pas espace au berceau de donner la secousse des bras. Mais voicy que arriva un jour d'une grande feste, que son pere Gargantua faisoit un beau banquet a tous les princes de sa court. Je croy bien que tous les officiers de sa court estoyent tant occupes au service du festin, que l'on ne se soucyoit du pauvre Pantagruel, et demouroit ainsi a reculorum. Que fist il, qu'il fist, mes bonnes gens, escoutez. Il essaya de rompre les chaisnes du berceau avecques les bras, mais il ne peut, car elles estoyent trop fortes: adonc il trepigna tant des piedz qu'il rompit le bout de son berceau qui toutesfoys estoit d'une grosse poste de sept empans en quarré, et ainsi qu'il eut mys les piedz dehors il se avalla le mieux qu'il peut, en sorte que il touchoit les piedz en terre Et alors avecques grande puissance se leva emportant son berceau sur l'eschine ainsi lye comme une tortue qui monte contre une muraille, et a le veoir sembloit que ce feust une grande carracque de cinq cens tonneaulx qui feust debout En ce point entra en la salle ou l'on banquetoit, et hardiment qu'il espoventa bien l'assistance, mais par autant qu'il avoit les bras lyez dedans il ne povoit rien prendre a manger, mais en grande peine se enclinoit pour prendre a tout la langue quelque lippee. Quoy voyant son pere entendit bien que l'on l'avoit laisse sans luy bailler a repaistre et commanda qu'il fut deslye desdictes chesnes par le conseil des princes et seigneurs assistans, ensemble aussi que les medicins de Gargantua disoyent que si l'on le tenoit ainsi au berseau qu'il seroit toute sa vie subject a la gravelleLors qu'il feust deschaine, l'on le fist asseoir et repeut fort bien, et mist son dict berceau en plus de cinq cens mille pieces d'un coup de poing qu'il frappa au millieu par despit, avec protestation de jamais n'y retourner.