Comment Pantagruel equitablement jugea d'une controverse merveilleusement obscure et difficile si justement, que son jugement fut dict fort admirable. Chap. x.

Pantagruel bien records des lettres et admonition de son pere, voulut un jour essayer son scavoir,

De faict par tous les carrefours de la ville mist conclusions en nombre de neuf mille sept cens soixante et quatre en tout scavoir, touchant en ycelles les plus fors doubtes qui feussent en toutes sciences.Et premierement en la rue du feurre tint contre tous les regens, artiens, et orateurs, et les mist tous de cul, Puis en Sorbonne tint contre tous les Theologiens par l'espace de six sepmaines despuis le matin quatre heures, jusques a six du soir: exceptez deux heures d'intervalle pour repaistre et prendre sa refection. Et a ce assisterent la plus part des seigneurs de la court: maistres des requestes, presidens, conseilliers, les gens des comptes, secretaires, advocatz, et aultres: ensemble les eschevins de ladicte ville, avecques les medicins et canonistes.Et notez que d'iceulx la plus part prindrent bien le frain au dentz: mais nonobstant leurs ergotz et fallaces, il les feist tous quinaulx, et leurs monstra visiblement qu'ilz n'estoient que veaulx engiponnez.

Dont tout le monde commenca a bruyre et parler de son scavoir si merveilleux jusques es bonnes femmes lavandieres, courratieres, roustissieres: ganyvetieres, et aultres, lesquelles quand il passoit par les rues disoient, c'est luy, a quoy il prenoit plaisir, comme Demosthenes prince des orateurs Grecz faisoit quand de luy dist une vieille acropie le monstrant au doigt, c'est cestuy la.Or en ceste propre saison estoit un proces pendent en la court entre deux gros seigneurs, desquelz l'un estoit monsieur de Baysecul demandeur d'une part, l'aultre monsieur de Humevesne defendeur de l'aultre.Desquelz la controverse estoit si haulte et difficile en droict que la court de Parlement n'y entendoit que le hault Alemant. Dont par le commandement du Roy furent assemblez quatre les plus scavans et les plus gras de tous les Parlemens de France, ensemble le grand conseil, et tous les principaulx

Regens des universitez, non seulement de France, mais aussi d' Angleterre et Italie, comme Jason, Philippe Dece, Petrus de petronibus, et un tas d'aultres vieulx Rabanistes. Ainsi assemblez par l'espace de quarente et six sepmaines n'y avoyent sceu mordre, ny entendre le cas au net, pour le mettre en droict en facon quelconques: dont ilz estoyent si despitz qu'ilz se conchioyent de honte villainement.Mais un d'entre eulx nomme Du douhet, le plus scavant, le plus expert et prudent de tous les aultres, un jour qu'ilz estoyent tous philogrobolizez du cerveau, leur dist, Messieurs ja long temps a que sommes icy sans rien faire que despendre, et ne pouvons trouver fond ny rive en ce ste matiere, et tant plus y estudions tant moins y entendons, qui nous est grand honte et charge de conscience, et a mon advis que nous n'en sortirons que a des honneur, car nous ne faisons que ravasser en noz consultations Mais voicy que j'ay advise, vous avez bien ouy parler de ce grand personnaige nomme maistre Pantagruel, lequel on a congneu estre scavant dessus la capacité du temps de maintenant: es grandes disputations qu'il a tenu contre tous publiquement. Je suis d'opinion, que nous l'apellons, et conferons de cest affaire avecques luy, car jamais homme n'en viendra a bout si cestuy la n'en vient.A quoy voluntiers consentirent tous ces conseilliers et docteurs: de faict l'envoyerent querir sur l'heure, et le prierent vouloir le proces canabasser et grabeler a poinct, et leur en faire le raport tel que de bon luy sembleroit en vraye science legale, et luy livrerent les sacs et pantarques entre ses mains, qui faisoyent presque le fais de quatre gros asnes couillars. Mais Pantagruel leur dist. Messieurs, les deux Seigneurs qui ont ce proces entre eulx, sont ilz encore vivans? A quoy luy fut respondu, que ouy. De quoy diable donc (dist il) servent tant de fatrasseries de papiers et copies que me bailliez? N'est ce le mieulx ouyr par leur vive voix leur debat, que lire ces babouyneries icy, qui ne sont que tromperies, cautelles diabolicques de Cepola, et subversions de droict? Car je suis sceur que vous et tous ceulx par les mains desquelz a passe le proces, y avez machine ce que avez peu: pro et contra, et au cas que leur controverse estoit patente et facile a juger, vous l'avez obscurcie par sottes et desraisonnables raisons et ineptes opinions de Accurse, Balde, Bartole, de castro, de Imola, Hippolytus, Panorme, Bertachin, Alexandre, Curtius, et ces aultres vieulx mastins, qui jamais n'entendirent la moindre loy des Pandectes, et n'estoyent que gros veaulx de disme ignorans de tout ce qu'est necessaire a l'intelligence des loix, Car (comme il est tout certain) ilz n'avoyent congnoissance de langue ny Grecque ny Latine: mais seullement de Gothique et Barbare, Et toutesfoys les loix sont premierement prinses des Grecz, comme vous avez le tesmoignage de Ulpian. l posteriori. de orig. juris. et toutes les loix sont pleines de sentences et motz Grecz: et secondement sont redigees en Latin le plus elegant et aorné qui soit en toute la langue Latine, et n'en excepteroys voluntiers ny Saluste, ny Var ron, ny Ciceron, ny Senecque, ny Tite Live, ny Quintilian. Comment doncques eussent peu entendre ces vieulx resveurs le texte des loix, qui jamais ne virent bon livre de langue Latine? comme manifestement appert a leur stile qui est stille de ramonneur de cheminee, ou de cuysinier et marmiteux: non de jurisconsulte. Davantaige veu que les loix sont extirpees du mylieu de philosophie moralle et naturelle, comment l'entendront ces folz qui ont par dieu moins estudie en philosophie que ma mulle? Au regard des lettres de humanité, et congnoissance des antiquitez et histoire, ilz en estoyent chargez comme un crapault de plumes, dont toutesfoys les droictz sont tous pleins, et sans ce ne pevent estre entenduz, comme quelque jour je monstreray plus apertement par escript. Par ce si voulez que je congnoisse de ce proces, premierement faictez moy brusler tous ces papiers: et secondement faictez moy venir les deux gentilz hommes personnellement devant moy, et quand je les auray ouy, je vous en diray mon opinion sans fiction ny dissimulation quelconques.A quoy aulcuns d'entre eulx contredisoient, comme vous scavez, que en toutes compaignies il y a plus de folz que de saiges, et la plus grande partie surmonte tousjours la meilleure, ainsi que dict Tite Live parlant des Cartagiens. Mais ledict du Douhet tint au contraire virilement contendent que Pantagruel avoit bien dict, que ces registres, enquestes, replicques, reproches, salvations, et aultres telles diableries, n'estoient que subversions de droict, et allongement de proces, et que le diable les emporteroit tous s'ilz ne procedoient aultrement selon equite evangelicque et philosophicque. Somme tous les papiers furent bruslez, et les deux gentilz hommes personnellement convocquez.Et lors Pantagruel leur dist. Estes vous ceulx qui avez ce grand different ensemble? Ouy dirent ilz monsieur. Lequel de vous est demandeur? C'est moy dist le seigneur de Baisecul. Or mon amy, contez moy de poinct en poinct vostre affaire, selon la verite, car par le corps bieu si vous en mentes d'un mot, je vous osteray la teste de dessus les espaules, et vous monstreray que en justice et jugement l'on ne doibt dire que verite, par ce donnez vous garde de adjouster ny diminuer au narre de vostre cas, dictes?