Comment Panurge avoit la pusse en l’aureille, et desista porter sa magnificque braguette.

Page [29v]

Chapitre VII.

Au lendemain Panurge se feit perser l’aureille dextre a la Judaique, et y atacha un petit anneau d’or a ouvraige de tauchie, on caston duquel estoit une pusse enchassée. Et estoit la pusse noire, affin que de rien ne doubtez. C’est belle chose, estre en tous cas bien informé. La despense de laquelle raportée a son bureau ne montoit par quartier gueres plus que le mariage d’une Tigresse Hircanicque, comme vous pourriez dire 600000. malvedis. De tant excessive despence se fascha lors qu’il feut quitte, et depuys la nourrit en la façon des tyrans et advocatz, de la sueur et du sang de ses subjectz. Print quatre aulnes de bureau: s’en acoustra comme d’une robbe longue a simple cousture: desista porter le hault de ses chausses: et attacha des lunettes a son bonnet. En tel estat se praesenta davant Pantagruel : lequel trouva le desguisement estrange, mesmement ne voyant plus sa belle et magnificque braguette, en laquelle il souloit comme en l’ancre sacre constituer son dernier refuge contre tous naufraiges d’adversité. N’entendent le bon

Pantagruel ce mystere, le interrogea demandant que praetendoit ceste nouvelle prosopopée. J’ay (respondit Panurge) la pusse en l’aureille. je me veulx marier. En bonne heure soit, dist Pantagruel, vous m’en avez bien resjouy. Vrayement je n’en vouldrois pas tenir un fer chauld. Mais ce n’est la guise des amoureux, ainsi avoir bragues avalades, et laisser pendre sa chemise sur les genoilx sans hault de chausses: avecques robbe longue de bureau, qui est couleur inusitée en robbes talares entre gens de bien et de vertus. Si quelques personaiges de haeresies et sectes particuliaires s’en sont autres fois acoustrez, quoy que plusieurs l’ayent imputé a piperie, imposture, et affectation de tyrannie sus le rude populaire, je ne veulx pourtant les blasmer, et en cela faire d’eulx jugement sinistre. Chascun abonde en son sens: mesmement en choses foraines, externes, et indifferentes, lesquelles de soy ne sont bonnes ne maulvaises: pource qu’elles ne sortent de nos coeurs et pensées, qui est l’officine de tout bien et tout mal: bien, si bonne est, et par le esprit munde reiglée l’affection: mal, si hors aequité par l’esprit maling est l’affection depravée. Seulement me desplaist la nouveaulté et mespris du commun usaige.

La couleur, respondit Panurge, est aspre aux potz, a propos, c’est mon bureau, je le veulx dorenavant tenir, et de pres reguarder a mes affaires. Puys qu’une foys je suis quitte, vous ne veistes oncques home plus mal plaisant que je seray, si Dieu ne me ayde. Voiez cy mes bezicles. A me veoir de loing vous diriez proprement que c’est frere Jan Bourgeoys. Je croy bien que l’année qui vient je prescheray encores une foys la croisade. Dieu guard de mal les pelotons. Voiez vous ce bureau? Croiez qu’en luy consiste quelque occulte proprieté a peu de gens congneue. Je ne l’ay prins qu’a ce matin, mais desja j’endesve, je deguene, je grezille d’estre marié, et labourer en diable bur dessus ma femme, sans craincte des coups de baston. O le grand mesnaiger que je seray. Apres ma mort on me fera brusler en bust honorificque: pour en avoir les cendres en memoire et exemplaire du mesnaiger perfaict. Corbieu sus cestuy mien bureau ne se joue mon argentier d’allonger les .ss. Car coups de poing troteroient en face.

Voyez moy davant et darriere: c’est la forme d’une Toge, antique habillement des Romains on temps de paix. J’en ay prins la forme en la columne de Trajan a Rome, en l’arc triumphal aussi de Septimius Severus. Je suis las de guerre: las des saiges et hocquetons. J’ay les espaules toutes usées a force de porter harnois. Cessent les armes, regnent les Toges. Au moins pour toute ceste subsequente année si je suis marié, comme vous me allegastez hier par la loy Mosaïque.

Au reguard du hault de chausses, ma grande tante Laurence jadis me disoit, qu’il estoit faict pour la braguette. Je le croy, en pareille induction, que le gentil falot Galen .lib. 9. de l’usage de nos membres, dict la teste estre faicte pour les oeilz. Car nature eust peu mettre nos testes aux genoulx ou aux coubtes: mais ordonnant les oeilz pour descouvrir au loing, les fixa en la teste comme en un baston au plus haut du corps: comme nous voyons les Phares et haultes tours sus les havres de mer estre erigées, pour de loing estre veue la lanterne. Et pource que je vouldrois quelque espace de temps, un an pour le

moins, respirer de l’art militaire, c’est a dire, me marier, je ne porte plus braguette, ne par consequent hault de chausses. Car la braguette est premiere piece de harnoys pour armer l’home de guerre. Et maintiens jusques au feu, (exclusivement entendez) que les Turcs ne sont aptement armez, veu que braguettes porter est chose en leurs loix defendue.