Comment passasmes l' Isle des'Esclots, et de l'ordre des freres Fredons. CHAP. XXVI.

Depuis passasmes l' Isle des'Esclots lesquels ne vivent que de souppes de merlus fusmes toutesfois bien recuillis et

Page [110]
traitez du Roy de l'Isle nommé Benius tiers de ce nom, lequel apres boire nous mena voir un monastere nouveau fait erigé et basty par son invention pour les freres Fredons ainsi nommoit il ses religieux. Disant qu'en terre ferme habitoient les freres petits serviteurs et amis de la douce dame. Item les glorieux et beaux freres mineurs qui sont semibriefs de bulles, les freres minimes haraniers, enfumez, aussi les freres minimes crochus, et que du nom plus diminuer ne pouvoit qu'en fredons. Par les status et bulle pattente obtenue de la Quinte, laquelle est de tous bons accords ils estoient tous habillez en brusleurs de maisons excepté qu'ainsi que les couvreurs de maisons en Anjou ont les genoux contrepointez, ainsi avoient ils les ventres, carrelez et estoient les carreleurs de ventre en grande reputation parmy eux. Ils avoient la braguette de leurs chausses à forme de pantoufle et en portoient chascun deux, l'une devant et l'autre derriere cousue affermans par ceste duplicité braguatine quelques certains et horrifiques misteres estre duement representez. Ils portoient souliers ronds comme bassins à l'imitation de ceux qui habitent la mer areneuse: du demourant avoient barbe
Page [111]
rase et pieds ferrats. Et pour monstrer que de fortune ils ne se soucient il les faisoit raire et plumer comme cochons la partie posterieure de la teste depuis le sommet jusques aux omoplates. Les cheveux en devant depuis les os bregmatiques croissoient en liberté. Ainsi contrefortunoient comme gens aucunement ne se soucians des biens qui sont au monde. Deffians davantage fortune la diverse portoient non en main comme elle: mais à la ceincture en guise de patenostres chascun un rasouer tranchant lequel ils esmouloient deux fois de jour et affiloient trois fois de nuict. Dessus les pieds chascun portoit une boulle ronde: parce qu'est dit fortune en avoir une soubs ses pieds. Le cahuet de leurs scaputions estoit devant attaché, non derriere: en ceste façon avoient le visaige caché, et se moquoient en liberté, tant de fortune, comme des fortunez: ne plus ne moins, que font nos damoiselles, quant c'est qu'ils ont leur cache-laid, que vous nommez touret de nez, les anciens le nomment chareté. Parce qu'il couvre en elles de pechez grande multitude. Avoient aussi tousjours patente la partie posterieure de la teste comme nous avons le visaige: cela estoit cause, qu'ils alloient de ventre ou de cul,
Page [112]
comme bon leur sembloit. S'ils alloient de cul, vous eussiez estimé estre leur alleure naturelle: tant à cause des souliers ronds, que de la braguette precedente. La face aussi derriere rase et peinte rudement, avec deux yeux une bouche, comme vous voyez és nois indiques. S'ils alloient de ventre, vous eussiez pensé que fussent gens jouans au chapifou. C'estoit belle chose de les voir.

Leur maniere de vivre estoit telle. Le clair lucifer commençant apparoistre sus terre, ils s'entrebottoient, et esperonnoient l'un l'autre, par charité. Ainsi bottez et esperonnez dormoient, ou ronfloient pour le moins: et dormans avoient bezicles au nez, ou lunettes pour pire.

Nous trouvions ceste façon de faire estrange: mais ils nous contenterent en la response: nous remonstrans que le jugement final, lors que seroit, les humains prendoient repos et sommeil, pour donques evidentement monstrer, qu'ils ne reffusoient y comparoistre, ce que font les fortunez, ils se tenoient bottez, esperonnez, et prests à monter à cheval, quant la trompette sonneroit.

Midy sonnant (notez que leurs cloches estoient, tant de l'horloge, que du batail de l'Eglise,

Page [113]
et refectoir, faictes, selon la divise Pontiale, savoir est, de fin dumet contrepointé, et le batail estoit d'une queuë de renard) Midy donques sonnant ils s'eveilloient et desbottoient, pissoient qui vouloit, et esmontissoient, qui vouloit, esternuoient, qui vouloit. Mais tous par contrainte, statut rigoureux, amplement et copieusement baisloient, se desjeunoient de baisler. Le spectacle me sembloit plaisant: car leurs bottes et esperons mis sus un rastelier, ils descendoient aux cloistres, là se lavoient curieusement les mains et la bouche, puis s'assoient sus une longue selle, et se curoient les dens jusques à ce que le Prevost fist signe, sifflant en paume: lors chascun ouvroit la gueule tant qu'il pouvoit, et baailloient aucunefois demie heure, aucunefois plus, aucunefois moins, selon que le Prieur jugeoit le desjuner estre proportionne à la feste du jour, apres cela faisoient une belle procession en laquelle ils portoient deux bannieres, en l'une desquelles estoit en belle peinture le pourtrait de vertu, en l'autre de fortune. Un fredon premier portoit la banniere de fortune, apres luy marchoit un autre portant celle de vertu, en main tenant un aspersoir mouillé en eau mercuriale, descrite par
Page [114]
Ovide en ses Fastes: duquel continuellement il comme sonettoit le precedent Fredon, portant fortune. Cest ordre, dist Panurge, est contre la sentence de Ciceron, et des Academiques, lesquels veulent vertu preceder, suyvre fortune. Nous fut toutesfois remonstré qu'ainsi leur convenoit il faire, puis que leur intention estoit fustiguer fortune. Durant la procession ils fredonnoient entre les dents melodieusement ne scay quelles antiphones: car je n'entendois leur patelin, et ententivement escoutant apperçeu qu'ils ne chantoient que des aureilles. O la belle armonie, et bien concordante au son de leurs cloches: jamais ne les voirrez discordans. Pantagruel fist un notable mirifique sus leur procession. Et nous dist, avez vous veu et noté la finesse de ces fredons icy? Pour parfaire leur procession, ils sont sortis par une porte de l'eglise, et sont entrez par l'autre. Ils se sont bien gardez d'entrer par ou ils sont yssus. Sus mon honneur ce sont quelques fines gens, je dy fins à dorer, fins comme une dague de plomb, fins non affinez, mais affinans, passez par estamine fine. Ceste finesse, dist frere Jehan, est extraicte d'occulte Philosophie, et n'y entends, au diable le rien. D'autant, respondit Pantagruel, est-elle
Page [115]
plus redoutable, que l'on n'y entend rien. Car finesse entendue, finesse preveuë, finesse descouverte perd de finesse et l'essence et le nom: nous la nommons lourderie Sur mon honneur qu'ils en savent bien d'autres. La procession achevee, comme pourmenement et exercitation salubre, ils se retiroient en leur refectoir, et dessous les tables se mettoient à genoux, s'appuyans la poictrine et stomach, chascun sus une lanterne: Eux estans en cest estat, entroit un grand Esclot, ayant une fourche en main, et la les traitoit à la fourche: de sorte qu'ils commençoient leur repas, par fourmage, et l'achevoient par moustarde et laictue, comme tesmoigne Martial, avoir esté l'usage des Anciens. En fin on leur presentoit à chascun d'eux une platelee de moustarde, et estoient servis de moustarde apres disner. Leur diette estoit telle: Au dimanche ils mangeoient boudins, andouilles, saucissons, fricandeaux, hastereaux, caillettes, exceptez tousjours le fourmage d'entree, et moustarde pour l'issue. Au lundy, beaux pois au lard, avec ample comment, et glose interlineare. Au mardy, force pain benist, fouaces, gasteaux, galettes biscuites. Au mecredy, rustrerie, ce sont belles testes de mouton, teste de veau, teste de bedouaux
Page [116]
, lesquelles abondent en icelle contree. Au jeudy, potages de sept sortes, et moustarde eternelle parmy. Au vendredy, rien que cormes, encores n'estoient-elles trop meures, selon que juger je pouvois à leur couleur. Au samedy, rongeoient les os, non pourtant estoient-ils pauvres ne souffreteux: car un chascun d'eux avoit benefice de ventre, bien bon. Leur boire estoit un antifortunal, ainsi appelloient-ils ne scay quel bruvage du pays. Quant ils vouloient boire ou manger, ils rabbatoient leurs cahuets de leurs scaputions par le devant, et leur servoit de baviere. Le disner parachevé, ils prioient Dieu tresbien, et tout par fredons: le reste du jour, attendans le jugement final, ils s'exercoient à oeuvre de charité. Au dimanche, se pelaudans l'un l'autre. Au lundy, s'entrenarzardans. Au mardy, s'entre esgratignans. Au mercredy, s'entremouchans. Au jeudy, s'entretirans les vers du nez. Au vendredy, s'entrechatouillans. Au samedy, s'entrefouettans. Telle estoit leur diette, quant ils residoient en couvent, si par commandement du Prieur claustral ils issoient hors, defense rigoureuse, sur peine horrifique, leur estoit faite, poisson lors ne toucher, ne manger, qu'ils seroient sur mer ou riviere: ne chair, telle qu'elle fust, lors que
Page [117]
ils seroient en terre ferme: afin qu'à un chascun fust evident qu'en jouyssans de l'objet, ne jouyssoient de la puissance et concupiscence, et ne s'en esbranloient non plus que le roc Marpesian, le tout faisoient avec antiphones competentes, et à propos, tousjours chantans des aureilles, comme avons dit. Le soleil soy couchant en l'Ocean, ils bottoient et esperonnoient l'un l'autre, comme devant, et bezicles au nez, se composoient à dormir. A la minuit l'Esclot entroit et gens debout: là esmailloient et affilloient leurs rasouers: et la procession faite, mettoient les tables sus eux, et repaissoient comme devant. Frere Jehan des'antomeures voyant ces joyeux freres fredons, et entendant le contenu de leurs statuts, perdit toute contenance: et s'escriant hautement, dist, O le gros rat à la table, je romps cestuy la, et m'en vois par dieu, de pair. O que n'est icy Priapus aussi bien que fust aux sacres nocturnes de Canidie, pour le veoir à plein fond peder, et contrepedant fredonner. A ceste heure congnois-je en verité, que sommes en terre Anticthone et Antipode. En Germanie l'on demolist monasteres et deffroque-on les Moynes, icy on les erige à rebours, et à contrepoil.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other