Comment nous passasmes outre, et comment Panurge y faillit d'estre tué. CHAP. XVI.

Sus l'instant nous prinsmes la routte d' Outre, et contasmes nos adventures à Pantagruel, qui en eut commiseration bien grande, et en fist quelques elegies

Page [65]
par passe-temps. La arrivez nous refraischismes un peu, et puisasmes eau fresche, prinsmes aussi du bois pour nos munitions: Et nous sembloient les gens du païs à leur phisionomie bons compagnons et de bonne chere. Ils estoient tous oultres et tous pedoient de graisse et apperceusmes ce, que n'avois encores veu en païs autre, qu'ils deschiquetoient leur peau, pour y faire bouffer la graisse, ne plus ne moins que les sallebrenaux de ma patrie descouppent le hault de leurs chausses pour y faire bouffer le taffetas. Et disoient ce ne faire pour gloire et ostentation, mais autrement ne pouvoient en leur peau. Ce faisant aussi, plus soudain devenoient grands, comme les jardiniers incisent la peau des jeunes arbres, pour plustost les faire croistre. Pres le havre estoit un cabaret beau et magnifique en exterieure apparence, auquel accourir voyans nombre grand de peuple Outré, de tous sexes, toutes aages, et tous estats, pensions que la fut quelque notable festin et banquet. Mais nous fut dit, qu'ils estoient invitez aux crevailles de l'hoste, et y alloient en diligence proche parens et alliez. N'entendans ce gergon, et estimans qu'en iceluy pays le festin on nommast crevailles, comme deça nous appellons
Page [66]
enfiansailles, espousailles, velenailles, tondailles, mestivales, fusmes advertis que l'hoste en son temps avoit esté bon raillard, grand grignoteur, beau mangeur de souppes Lionnoises, notable compteur de horloge, eternellement disnant, comme l'hoste de Rouillac, et ayans ja par dix ans pedé graisse en abondance estoit venu en ses crevailles: et selon l'usage du pays finoit ses jours en crevant, plus ne pouvant le perytoine et peau par tant d'annees deschiquetee, clorre et retenir ses trippes, qu'elles ne effondrassent par dehors, comme d'un tonneau deffoncé. Et quoy, dist Panurge, bonnes gens, ne luy sauriez vous bien appoinct avecques bonnes grosses sangles, ou bons gros cercles de cormier, voire de fer, si besoin est, le ventre relier: ainsi lié ne jetteroit si aisement ses fons hors, et si tost ne creveroit. Ceste parolle n'estoit achevee, quant nous entendismes en l'air un son haut et strident, comme si quelque gros chesne esclatoit en deux pieces: lors fut dit par les voisins, que ses crevailles estoient faictes, et que cestuy esclat estoit le ped de la mort. La me souvint du venerable Abbé de CastilliersAbbé de CastilliersCastilliers celuy qui ne daignoit biscoter ses chambrieres nisi in pontificalibus, lequel importuné de ses parens et
Page [67]
amis de resigner, sur ses vieux jours son Abbaye, dist et protesta, que point ne se despouilleroit devant soy coucher: et que le dernier ped que feroit sa paternité, seroit un ped d'Abbé.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other