Comment nous descendismes au port des Lichnobiens, et entrasmes en Lanternois. CHAP. XXXII.

Sus l'instant entrasmes au port de Lanternoisport de LanternoisLanternois. La sus une haute tour recongnut Pantagruel la lanterne de la Rochelle, laquelle nous fist bonne clarté. Vismes aussi la lanterne de Pharoslanterne de PharosPharos, de Nauplion, et d' Acropolis en Athenes sacree à Pallas. Pres le port, est un petit village, habité par les Lychnobiens: qui sont peuples vivans de lanternes, comme en nos païs les freres briffaux vivent de Nonnains, gens de bien et studieux. Demosthenes y avoit jadis lanterné. De ce lieu jusques au Palais fusmes conduicts par trois Obeliscolychnies gardes militaires du Havre à haux bonnets comme Albanois, esquels exposasmes les causes de nos voyage et deliberation: laquelle estoit là impetrer de la Royne de Lanternois une lanterne pour nous esclairer et conduire par le voyage que faisions vers l' oracle de la Bouteille. Ce que nous promisrent faire et volontiers: adjoustans qu'en bonne occasion et oportunité estions la arrivez, et qu'avions beau faire chois de lanternes, lors qu'elles tenoient leur chapitre Provincial. Advenans au Palais Royal, fusmes par deux lanternes d'honneur, savoir est, la lanterne d' Aristophanes, et la lanterne de Cleanthes, presentez à la Royne à laquelle Panurge en langage Lanternois

exposa briefvement les causes de nostre voyage. Et eusmes d'elle bon recueil, et commandement d'assister à son soupper, pour plus facilement choisir celle que voudrions pour guide. Ce que nous pleut grandement, et ne fusmes negligens bien tout noter, et tout considerer, tant en leurs gestes, vestemens, et maintien, que aussi en l'ordre du service. La Royne estoit vestuë de Cristallin vierge, de Touchie, ouvrage damasquin, passementé de gros diamens. Les lanternes du sang estoient vestues, aucunes de Strain, autres de pierres Phengites, le demourant estoit de corne, de papier, de toille ciree. Les fallots pareillement selon leurs estats d'antiquité de leurs maisons. Seulement j'en advisay une de terre, comme un pot, en rang des plus gorgiases: de ce m'esbahissent, entendy, que c'estoit la lanterne d' Epictetus, de laquelle on avoit autre fois refusé trois mile dragmes. J'y consideray diligentement la mode et accoustrement de la lanterne Polymire de Martial : encore plus de la l'Icosimire, jadis consacree par Canope fille de Tisias. J'y noté tresbien la lanterne Pensile jadis prinse de Thebes au temple d' Apollo Palatintemple d' Apollo PalatinApollo Palatin, et depuis transportee en la ville de Cyme Aolique par Alexandre

Page [142]

la conquerant. J'en notay une autre insigne, à cause d'un beau floc de soye cramoisine, qu'elle avoit sus la teste: et me fut dit, que c'estoit Bartole, lanterne de droit. J'en notay pareillement deux autres insignes, à cause des bourses de clystere, qu'elles portoient à la ceincture: et me fut dit, que l'une estoit le grand, l'autre le petit luminaire des apoticaires. L'heure du soupper venue, la Royne s'assit en premier lieu, consequemment les autres selon leur degré et dignité. D'entree de table toutes furent servies de grosses chandelles de moulle: excepté que la Royne fut servie d'un gros et roidde flambeau flamboyant, de cire blanche, un peu rouge par le bout: aussi furent les lanternes du sang exceptees du reste, et la lenterne provinciale de Mirebalais : laquelle fut servie d'une chandelle de noix, et la provinciale du bas Poitou, laquelle je vy estre servie d'une chandelle armee: et Dieu sçait quelle lumiere apres elles rendoient, aveques leurs mecherons. Exceptez icy un nombre de jeunes lanternes du gouvernement d'une grosse lanterne. Elles ne luisoient comme les autres, mais me sembloient avoir les paillardes couleurs. Apres soupper nous retirasmes pour reposer. Lelendemain matin la Royne nous fist choisir une lanterne, pour nous conduire, des plus insignes. Et ainsi prinsmes congé.