Comment nous arrivasmes au Royaume de la Quinte Essence, nommee entelechie. CHAP. XVIII.

Ayans prudemment coustoyé le turbillon par l'espace d'un demy jour, au troisieme suivant nous sembla l'air plus serain, que de coustume: et en son sauvement descendismes au port de Mateotehecnie peu distant du palais de la Quinte essence. Descendans au port trouvasmes en barbe grand nombre d'archiers et gens de guerre, lesquels gardoient l'Arsenac: de prime arrivee, ils nous feisrent quasi peur: Car ils nous feisrent à tous laisser nos armes, et roguement nous interroguerent, disant, comperes de quel païs est la venue? Cousins, respondit Panurge, nous sommes Tourengeaux. Ores venons de France, convoiteux de faire reverence à la dame Quinte essence, et visiter ce trescelebre royaume d' Entelechie. Que dites vous, interroguent -ils dites vous Entelechie, ou Endelechie ? Beaux cousins Respondit Panurge, nous sommes gens simples et idiots, excusez la rusticité de nostre langage, car au demourant les coeurs sont francs et loyaux. Sans cause, dirent ils, ne vous avons sus ce different interrogez. Car grand nombre d'autres ont icy passé de vostre païs de Touraine, lesquels nous sembloient bons lourdaux et parloient correct: mais d'autre païs sont icy venus, ne

sçavons quels outrecuidez, fiers comme Escossois, qui contre nous à l'entree vouloient obstinément contester: ils ont esté bien frottez, quoy qu'ils monstrassent visaige rubarbatif. En vostre monde avez vous si grande superfluité de temps, que ne sçavez en quoy l'employer, fors ainsi de nostre dame Royne parler, disputer, et impudentement escrire? Il estoit bien besoin, que Ciceron abandonnast sa Republique, pour s'en empescher, et Diogenes Laertius, et Theodorus Gaza, et Argyropile, et Bessarion, et Politian, et Bude, et Lascaris, et tous les diables de sages fols: le nombre desquels n'estoit assez grand, s'il n'eust esté recentement accreu par Scaliger, Brigot, Chambrier, François ' Fleury, et ne sçay quels autres tels jeunes haires esmouchetez. Leur male angine, qui leur suffocast le gorgeron avec l'epiglotide. Nous les: Mais quoy diantre, ils flattent les diables, disoit Panurge entre les dents, vous icy n'estes venus pour en leur folie les soustenir, et de ce n'avez procuration: plus aussi d'iceux ne vous parlerons. Aristoteles prime homme, et paragon de toute philosophie, fut parrin de nostre dame Royne: il tresbien, et proprement la nomma Entelechie : Entelechie est son vray nom: S'aille chier, qui autrement la nomme. Qui autrement la nomme erre par tout le Ciel. Vous soyez les tresbien venus: nous presenterent l'accollade: nous en feusmes tous resjouys.

Panurge me dist en l'aureille, compagnon as tu rien eu peur en ceste premiere boutee? Quelque peu, respondy-je, J'en ay dist-il, plus eu, que jadis n'eurent les soldats d'Ephrain, quand par les Galaadites feurent occis et noyez pour en lieu de Schibboleth dire Sibboleth. Et n'y à homme, pour tous taire, en Beauce, qui bien ne m'eust avec une charrete de foin estouppé le trou du cul.

Depuis nous mena le Capitaine au Palais de la Royne en silence, et grandes ceremonies. Pantagruel luy vouloit tenir quelque propos, mais ne pouvant monter si haut, qu'il estoit, souhaitoit une eschelle, ou des eschasses bien grandes. Puis dist, Baste, si nostre dame Royne vouloit, nous serions aussi grans comme vous: Ce sera quant il luy plaira. Par les premieres galleries rencontrasmes grand tourbe de gens malades, lesquels estoient installez diversement, selon la diversité des maladies: Les ladres à part, les empoisonnez en un lieu, les pestiferez ailleurs, les verolez en premier

rang: ainsi de tous autres.