Comment les oiseaux de l' Isle Sonnante sont alimentez. CHAP. VI.

Pantagruel monstroit face triste, et sembloit non contant du sejour quatridien que nous terminoit Aeditue, ce qu'aperceut Aeditue, et dit. Seigneur, vous scavez que sept jours devant et sept jours apres breume jamais n'y a sur mer tempeste. C'est pour faveur que les elemens portent aux Alcyones, oiseaux sacrez à thetis, qui pour lors ponnent et esclouent leurs petits lez le rivage. Icy la mer se revenche de ce long calme, et par quatre jours ne cesse de tempester enormement quant quelques voyagiers y arrivent. La cause nous estimons afin que ce temps durant necessité les contraigne y demourer, pour estre bien festoyez des revenus de sonnerie. Pourtant n'estimez temps icy ocieusement perdu. Force, forcee vous y retiendra. Si ne voulez combatre Juno, Neptune, Doris, Aeolus, et tous les vejoves, seulement deliberez vous de faire chere lie. Apres les premieres bauffures, frere Jehan demandoit à Aeditue, en ceste Isle vous n'avez que cages et oiseaux, ils ne labourent ne cultivent la terre. Toute leur occupation est à gaudir, gazouiller et chanter. De quel pays vous vient ceste corne d'abondance, et copie de tant de biens et frians morceaux. De tout l'autre monde, respondit

Aeditue, exceptez moy quelques contrees des regions Aquilonnaires, lesquelles depuis certaines annees ont meu la Camerime Chou. Ils s'en repentiront dondaine. ils s'en repentiront don don. Beuvons amis, mais de quel pays estes vous, de Touraine, respondit Panurge. Vrayement, dit Aeditue, vous ne fustes onques de mauvaise pie couvez. Puis que vous estes de la benoiste Touraine. De Touraine tant et tant de biens annuellement nous viennent, que nous fut dit un jour par gens du lieu par cy passans, que le Duc de Touraine n'a en tout son revenu, dequoy son saoul de lard manger, par l'excessive largesse que ses predecesseurs ont fait à ses sacrosaints oiseaux, pour icy de Phaisans nous saouler de perdriaux, de gelinotes, poulles d' Indes, gras chappons de Loudunois, venaison de toutes sortes, et toutes sortes de gibier. Beuvons amis, voyez ceste perchee d'oiseaux comment ils sont douillets et en bon poinct des rentes qui nous en viennent, aussi chantent-ils bien pour eux. Vous ne vistes onques Rossignols mieux gringoter qu'ils font en plat, quant ils voyent ces deux bastons dorez. C'est, dit frere Jehan, feste à bastons. Et quand je leur sonne ces grosses cloches que voyez pendues autour de leurs cages, Beuvons amis, il fait certes huy beau boire, aussi fait-il tous les jours. Beuvons, je boy de bien bon coeur à vous, et soyez les tresbien venus. N'ayez peur que vin et vivres icy faillent: car quant le Ciel seroit d'airin, et la terre de fer, encores vivres ne nous faudroient, fussent par sept voire huit ans. Plus long temps que ne dura la famine en Aegypte. Beuvons ensemble par bon accord en charité.

Diables s'escria Panurge, tant vous avez d'aises en ce monde. En l'autre, respondit Aeditue, en aurons nous bien d'avantage. Les champs Eliziens ne nous manqueront, pour le moins. Beuvons amis, je boy à toy. C'a esté di-je esprit moult divin et parfait à vos premiers Siticines avoir le moyen inventé, par lequel vous avez ce que tous humains appetent naturellement, et à peu d'iceux, ou proprement parler, à nul est octroyé. C'est paradis en ceste vie, et en l'autre pareillement avoir. O gens heureux, O semidieux, Pleust au ciel qu'il m'avint ainsi.