Comment Bacbuc accoustra Panurge pour avoir le mot de la Bouteille. CHAP. XLIII.

Ces paroles et beuvettes achevees, Bacbuc demanda, qui est celuy de vous, qui veut avoir le mot de la dive Bouteille : Je, dist Panurge, vostre humble et petit entonnouer. Mon amy, dist-elle, je n'ay à vous faire instruction qu'une, c'est que venant à l'oracle ayez soin n'escouter le mot, sinon d'une aureille. C'est, dist frere Jean, du vin à une aureille. Puis le vestit d'une galleverdine, l'encapitonna d'un beau et blanc beguin, l'affeubla d'une chausse d'hypocras, au bout de laquelle, en lieu de floc, mist trois obelisques, l'enguentela de deux braguettes antiques, le ceingnit de trois cornemeuses liees ensemble, le baigna la face

trois fois dedans la fontaine susdite, en fin luy jetta au visage une poignee de farine, mist trois plumes de coq sus le costé droit de la chausse hypocratique, le fist cheminer neuf fois autour de la fontaine, luy fist faire trois beaux petis saux, luy fist donner sept fois du cul contre la terre, tousjours disant ne sçay quelles conjurations en langue Ethrusque, et quelquefois lisant en un livre ritual, lequel pres elle portoit une de ses mystagogues.

Somme je pense, que Numa Pompilius Roy second des Romains, Cerites de TuscieCerites de TuscieTuscie, et le sainct Capitaine Juif, n'instituerent onques tant de ceremonies, que lors je vy, n'aussi les vaticinateurs Memphitiques à Apis en Egipte, ne les Euboïens en la cité de Rhamnes à Rhamnasie, n'à Jupiter Ammon, n'a Feronia n'userent les anciens d'observances tant religieuses, comme là je considerois.

Ainsi accoustré le separa de nostre compagnie, et mena à main dextre par une porte d'or, hors le temple, en une chapelle ronde, faite de pierres Phengites, et speculaires: par la solide speculance desquelles, sans fenestre n'autre ouverture, estoit receuë lumiere du Soleil, là luysant par le precipice de la roche, couvrante le temple major,

tant facilement, et en telle abondance, que la lumiere sembloit dedans naistre, non dehors venir. L'ouvrage n'estoit moins admirable que fut jadis le sacré temple de Ravenne, ou en Egypte celuy de l' Isle Chemnis. Et n'est à passer en silence que l'ouvrage d'icelle chapelle ronde estoit en telle symmetrie compassé, que le diametre du project, estoit la hauteur de la voute.

Au milieu d'icelle estoit une fontaine de fin Alabastre, en figure heptagonne, à ouvrage et infoliature singuliere, pleine d'eau tant clere, que pourroit estre un clement en sa simplicité: dedans laquelle estoit à demy posee la sacree Bouteille, toute revestuë de pur cristalin, en forme Ovale, excepté, que le limbe estoit quelque peu patent, plus qu'icelle forme ne porteroit.