Comment on vestit Gargantua Chapitre. viij.

Luy estant en cest eage, son pere ordonna qu'on luy feist habillemens a sa livree: laquelle estoit blanc et bleu. De faict on y besoigna et furent faictz, taillez, et cousuz a la mode qui pour lors couroit.

Par les anciens pantarches, qui sont en la chambre des comptes a Montsoreau, je trouve qu'il feut vestu en la facon que s'ensuyt.

Pour sa chemise, furent levees neuf cens aulnes de toille de Chasteleraud, et deux cens pour les coussons en sorte de carreaulx, lesquelz on mist soubz les esselles. Et n'estoit poinct froncee, car la

fronsure des chemises n'a este inventee, sinon depuis que les lingieres, lors que la poincte de leur agueille estoit rompue, ont commence besoigner du cul.

Pour son pourpoinct furent levees huyt cens treize aulnes de satin blanc, et pour les agueillettes quinze cens neuf peaulx et demye de chiens. Lors commenca le monde attacher les chausses au pourpoinct, et non le pourpoinct aux chausses, car c'est chose contre nature, comme amplement a declare Olkam sus les exponibles de M. Haultechaussade.

Pour ses chausses feurent levez unze cens cinq aulnes, et ung tiers d'estamet blanc, et feurent deschisquetez en forme de colomnes striees, et crenelees par le derriere, affin de n'eschaufer les reins. Et flocquoit par dedans la deschicqueture de damas bleu, tant que besoing estoit. Et notez qu'il avoit tresbelles griefves, et bien proportionnez au reste de sa stature.

Pour la braguette: feurent levees sei

ze aulnes un quartier d'icelluy mesmes drap, et fut la forme d'icelle comme d'un arc boutant, bien estachee joyeusement a deux belles boucles d'or, que prenoient deux crochetz d'esmail, en un chascun desquelz estoit enchassee une grosse esmeraugde de la grosseur d'une pomme d'orange. Car (ainsi que dict Orpheus libro de lapidibus, et Pline libro ultimo) elle a vertu erective et confortative du membre naturel. L'exiture de la braguette estoit a la longueur d'une canne, deschicquetee comme les chausses, avecques le damas bleu flottant comme davant. Mais voyans la belle brodure de canetille, et les plaisans entrelatz d'orfeverie garniz de fins diamens, fins rubiz, fines turquoyses, fines esmeraugdes, et unions Persicques, vous l'eussiez comparee a une belle corne d'abondance, telle que voyez es antiquailles, et telle que donna Rhea es deux nymphes Adrastea, et Ida nourrices de Jupiter. Tousjours gualante, succulente, resudante, tousjours verdoyante, tousjours fleurissante, tousjours fructifiante, plene d'humeurs, plene de fleurs, plene de fruictz plene de toutes delices. Je advoue dieu s'il ne la faisoit bon veoir. Mais je vous en exposeray bien dadventaige au livre que j'ay faict De la dignité des braguettes. D'un cas vous advertis, que si elle estoit bien longue et bien ample, si estoit elle bien guarnie au dedans et bien avitaillee, en rien ne ressemblant les hypocriticques braguettes d'un tas de muguetz, qui ne sont plenes que de vent, au grand interest du sexe feminin.

Pour ses souliers furent levees quatre cens six aulnes de velours bleu cramoysi, et furent deschicquettez mignonement par lignes parallelles joinctes en cylindres uniformes. Pour la quarreleure d'iceulx furent employez unze cens peaulx de vache brune, taillee a queues de merluz.

Pour son saie furent levez dix et huyt cens aulnes de velours bleu tainct en

grene, brode a l'entour de belles vignettes et par le mylieu de pinthes d'argent de canetille, enchevestrees de verges d'or avecques force perles, par ce denotant qu'il seroit un bon fessepinthe en son temps.

Sa ceincture feut de troys cens aulnes et demye de cerge de soye, moytie blanche et moytie bleu, ou je suis bien abusé. Son espee ne feut Valentienne, ny son poignard Sarragossoys, car son pere hayssoit tous ces Indalgos Bourrachous marranisez comme diables, mais il eut la belle espee de boys, et le poignart de cuir bouilly, pinctz et dorez comme un chascun soubhaiteroit. Sa bourse fut faicte de la couille d'un Oriflant, que luy donna Her Pracontal proconsul de Libye. Pour sa robbe furent levees neuf mille six cens aulnes moins deux tiers de velours bleu comme dessus, tout porfilé d'or en figure diagonale, dont par juste perspective yssoit une couleur innommee, telle que voyez es coulz des tourterelles,

Page Fu.24.

qui resjouissoit merveilleusement les yeulx des spectateurs. Pour son bonnet furent levees troys cens deux aulnes ung quart de velours blanc, et feut la forme d'icelluy large et ronde a la capacite du chief. Car son pere disoit que ces bonnetz a la Marrabeise faictz comme une crouste de pasté, porteroient quelque jour mal encontre a leurs tonduz. Pour son plumart pourtoit une belle grande plume bleue prinse d'un Onocrotal du pays de Hircanie la saulvaige, bien mignonement pendente sus l'aureille droicte. Pour son image avoit en une platine d'or pesant soixante et huyt marcs, une figure d'esmail competent: en laquelle estoit pourtraict un corps humain ayant deux testes, l'une viree vers l'aultre, qua tre bras, quatre piedz, et deux culz telz que dict Platon in symposio, avoir este l'humaine nature a son commencement mystic. Et au tour estoit escript en lettres Ioniques

Page [24v]

ΑΓΑΠΗ ΟΥ ΖΗΤΕΙ ΤΑ ΕΑΥΤΗΣ. Pour porter au col, eut une chaine d'or pesante vingt et cinq mille soixante et troys marcs d'or, faicte en forme de grosses bacces, entre lesquelles estoient en oeuvre gros Jafpes verds, engravez et taillez en Dracons tous environnez de rayes et estincelles, comme les portoit jadis le roy Necepsos. Et descendoit jusques a la boucque du hault ventre. Dont toute sa vie en eut l'emolument tel que scavent les medecins Gregoys. Pour ses guands furent mises en oeuvre seize peaulx de lutins, et troys de loups guarous pour la brodure d'iceulx Et de telle matiere luy feurent faictz par l'ordonnance des Cabalistes de sainlouand. Pour ses aneaulx (lesquelz voulut son pere qu'il portast pour renouveller le signe antique de noblesse) il eut au doigt indice de sa main gauche une escarboucle grosse comme un oeuf d'austruche, enchassee en or de seraph bien mignonement.

Page Fu.25.

Au doigt medical d'icelle, eut un aneau faict des quatre metaulx ensemble: en la plus merveilleuse facon, que jamais feust veue, sans que l'assier froisseast l'or, sans que l'argent foullast le cuyvre. Le tout fut faict par le capitaine Chappuys et Alcofribas son bonfacteur. Au doigt medical de la dextre eut un aneau faict en forme spirale, auquel estoient enchassez un balay en perfection, un diament en poincte, et une esmeraulde de Physon, de pris inestimable. Car Hans Carvel grand lapidaire du roy de Melinde les estimoit a la valeur de soixante neuf millions huyt cens nonante et quatre mille dix et huyt moutons a la grand laine: autant l'estimerent les Fourques D' auxbourg.