Comment Picrochole print d'assault la roche Clermauld et le regret et difficulte que feist Grandgousier de entreprendre guerre. Chapitre. xxviij.

Ce pendent que le moine s'escarmouchoit comme avons dict contre ceulx qui estoient entrez le clous, Picrochole a grande hastivete passa le gue de Vedegue de VedeVede avec ses gens et assail

lit la roche Clermauld, au quel lieu ne luy feut faicte resistance queconques, et par ce qu'il estoit ja nuict delibera en icelle ville se heberger soy et ses gens et refraischir de sa cholere pungitive.

Au matin print d'assault les boullevars et chasteau et le rempara tresbien: et le proveut de munitions requises pensant la faire sa retraicte si d'ailleurs estoit assailly. Car le lieu estoit fort et par art et par nature, a cause de la situation, et assiete

Or laissons les la, et retournons a nostre bon Gargantua qui est a Paris bien instant a l'estude de bonnes lettres et exercitations athletiques, et le vieux bon homme Grandgousier son pere, qui apres souper se chauffe les couiles a un beau clair et grand feu et attendent graisler des chastaines, escript au foyer avec un baston brusle d'un bout, dont on escharbotte le feu: faisant a sa femme et famille de beaulx contes du temps jadis.

Un des bergiers qui gardoient les vignes nomme Pillot : se transporta devers

luy en icelle heure, et raconta entierement les exces et pillaiges que faisoit Picrochole Roy de LernePicrochole Roy de LerneLerne en ses terres et dommaines et comment il avoit pille, gaste, saccage tout le pays, excepte le clous de Seuille que frere Jean des entommeures avoit saulve a son honneur, et de present estoit ledict roy en la roche Clermaud : et la en grande instance se remparoit, luy et ses gens.

Holos, holos, dist Grandgousier, qu'est cecy bonnes gens? Songe je, ou si vray est ce qu'on me dict? Picrochole mon amy ancien, de tout temps, de toute race et alliance me vient il assaillir? Qui le meut qui le poinct? qui le conduict? qui l'a ainsi conseille? Ho, ho, ho, ho, ho Mon dieu mon saulveur, ayde moy, inspire moy, conseille moy a ce qu'est de faire.

Je proteste, je jure davant toy: ainsi me soys tu favorable, sy jamais a luy desplaisir ne a ses gens dommaige, ne en ses terres je feis pillerie, mais bien au contraire je l'ay secouru de gens, d'argent, de faveur

et de conseil, en tous cas que ay peu congnoistre son adventaige. Qu'il me ayt doncques en ce poinct oultraige, ce ne peut estre que par l'esprit maling. Bon dieu tu congnois mon couraige, car a toy rien ne peut estre cele. Si par cas il estoit devenu furieux, et que pour luy rehabilliter son cerveau tu me l'eusse icy envoye: donne moy et pouvoir, et scavoir le rendre au joug de ton sainct vouloir par bonne discipline.

Ho, ho, ho, Mes bonnes gens mes amys, et mes feaulx serviteurs, fauldra il que je vous empesche a me y ayder? Las, ma vieillesse ne requerroit dorenavant que repous, et toute ma vie n'ay rien tant procure que paix. Mais il fault je le voy bien, que maintenant de harnoys je charge mes pauvres espaules lasses et foibles, et en ma main tremblante je preigne la lance et la masse, pour se courir et guarantir mes pauvres subjectz. La raison le veult ainsi, car de leur labeur je suis entretenu, et de leur

sueur je suis nourry moy, mes enfans et ma famille.

Ce non obstant, je n'entreprendray guerre, que je n'aye essaye tous les ars et moyens de paix, la je me resouls.

Adoncques feist convocquer son conseil et propousa l'affaire tel comme il estoit. Et fut conclud qu'on envoiroit quelque homme prudent devers Picrochole, scavoir pourquoy ainsi soubdainement estoit party de son repous, et en vahy les terres, es quelles n'avoit droict quicquonques. Davantaige qu'on envoyast querir Gargantua et ses gens, affin de maintenir le pays, et defendre a ce besoing. Le tout pleut a Grandgousier et commenda que ainsi feust faict. Dont sus l'heure envoya le Basque son laquays querir a toute diligence Gargantua. Et luy escripvoit comme s'ensuit.