Comment le Sophiste emporta son drap, et comment il eut proces contre les aultres maistres. Chapitre. xx.

Le Sophiste n'eut si toust achevé que Ponocrates et Eudemon s'esclafferent de rire tant profondement, que en cuiderent rendre l'ame a dieu, ne plus, ne moins que Crassus voyant un asne couillart qui mangeoit des chardons: et comme Philemon voyant un asne qui mangeoit les figues qu'on avoit apresté pour le disner, mourut de force de rire. Ensemble eulx, commenca rire maistre Janotus, a qui mieulx, mieulx, tant que les larmes leurs venoient es yeulx: par la vehemente concution de la substance du cerveau: a laquelle furent exprimees ces humiditez lachrymales, et transcoullees jouxte les nerfz optiques. En quoy par eulx estoyt Democrite Heraclitizant, et Heraclyte Democritizant representé.

Ces rys du tout sedez, consulta Gargantua avecques ses gens sur ce qu'estoit de faire. La feut Ponocrates d'ad vis, qu'on feist reboyre ce bel orateur. Et veu qu'il leurs avoit donné de passe temps, et plus faict rire que n'eust Songecreux, qu'on luy baillast les dix pans de saulcice mentionnez en la joyeuse harangue, avecques une paire de chausses, troys cens de gros boys de moulle, vingt et cinq muitz de vin, Un lict a triple couche de plume anserine, et une escuelle bien capable et profonde, lesquelles disoit estre a sa vieillesse necessaires.

Le tout fut faist ainsi que avoit este deliberé: Excepte que Gargantua doubtant que on ne trouvast a l'heure chausses commodes pour ses jambes: doubtant aussy de quelle facon mieulx duyroient audict orateur, ou a la martingalle qui est un pont levis de cul pour plus aisement fianter, ou a la mariniere, pour mieulx soulaiger les roignons ou a la Souice pour tenir chaulde la be

dondaine, ou a queue de merluz, de peur d'eschauffer les reins: luy feist livrer sept aulnes de drap noir et troys de blanchet pour la doubleure. Le boys feut porte par les guaingnedeniers, les maistres es ars porterent les saulcices et escuelles. Maistre Janot voulut porter le drap.

Un desdictz maistres nomme maistre Jousse Bandouille luy remonstroit que ce n'estoit honeste ny decent son estat, et qu'il le baillast a quelqun d'entre eulx.

Ha (dist Janotus) Baudet Baudet, tu ne concluds poinct in modo et figura. Voyla dequoy servent les suppositions, et parva logicalia. Panus pro quo supponit? Confuse (dist Bandouille) et distributive, Je ne te demande pas (dist Janotus) Baudet, quo modo supponit, mais pro quo, c'est Baudet pro tibiis meis. Et pour ce le porteray je egomet, sicut suppositum portat adpositum. Ainsi l'emporta en tapinois, comme feist Patelin son drap.

Le bon feut quand le tousseux glorieusement

en plein acte tenu chez les mathurins requist ses chausses et saulcices, Car peremptoirement luy feurent deniez, par autant qu'il les avoit eu de Gargantua selon les informations sur ce faictes. Il leurs remonstra que ce avoit este de gratis et de sa liberalite par laquelle ilz n'estoient mie absoubz de leurs promesses.

Ce nonobstant luy fut respondu qu'il se contentast de raison, et que aultre bribe n'en auroit.

Raison? (dist Janotus) Nous n'en usons poinct ceans. Traistres malheureux vous ne valez rien. La terre ne porte gens plus meschans que vous estes. Je le scay bien: ne clochez pas devant les boyteux. J'ay exercé la meschancete avecques vous. Par la ratte Dieu, je advertiray le Roy des enormes abus que sont forgez ceans, et par voz mains et meneez. Et que je soye ladre s'il ne vous faict tous vifz brusler comme bougres, traistres, hereticques, et seducteurs, en

nemys de dieu et de vertus.

A ces motz prindrent articles contre luy, Luy de l'autre coste les feist adjourner. Somme, le proces fut retenu par la court, et y est encores. Les magistres sur ce poinct feirent veu de ne soy descroter maistre Janot avecques ses adherens feist veu de ne se mouscher, jusques a ce qu'en feust dict par arrest definitif.

Par ces veuz sont jusques a present demourez et croteux et morveux, car la court n'a encores bien grabelé toutes les pieces. L'arrest sera donne es prochaines Celendes Grecques. C'est a dire: jamais Comme vous scavez qu'ilz font plus que nature, et contre leurs articles propres. Les articles de Paris, chantent que dieu seul peult faire choses infinies. Nature, rien ne faict imortel: car elle mect fin et periode a toutes choses par elle produictes. Car omnia orta cadunt etc.

Mais ces avalleurs de frimars font les proces davant eux pendens, et infiniz, et imortelz. Ce que faisans ont donue lieu,

et verifie le dict de Chilon Lacedemonien consacré en Delphes, disant misere estre compaigne de proces: et gens playdoiens miserables. Car plus tost ont fin de leur vie, que de leur droict pretendu.