¶Comment les victeurs Gargantuistes feurent recompensez apres la bataille. Chap. xlix.

Ceste concion faicte par Gargantua, feurent livrez les seditieux par luy requys: exceptez Spadassin / Merdaille / et Menuail : lesquelz estoient fuyz six heures davant la bataille: et deux fouaciers, lesquelz perirent en la journee. Aultre mal ne leurs feist Gargantua : si non qu’il les ordonna pour tirer les presses a son imprimerie: laquelle

il avoit nouvellement instituée. Puis ceulx qui la estoient mors il feist honorablement inhumer en la vallee des Noiretes/ et au camp de Bruslevieille. Les navres il feist panser et traicter en son grand Nosocome. Apres advisa es dommaiges faictz en la ville et habitans: et les feist rembourcer de tous leurs interestz a leur confession et serment. Et y feist bastir un fort chasteau: y commettant gens et guet pour a l’advenir mieulx soy defendre contre les soubdaines esmeutes. Au departir remercya gratieusement tous les souldars de ses legions: qui avoient este a ceste defaicte/ et les renvoya hyberner en leurs stations et guar nisons. Exceptez aulcuns de la legion Decumane, lesquelz il avoit veu en la journee faire quelques prouesses: et les capitaines des bandes, lesquelz il emmena avecques soy devers Grandgouzier. A la veue et venue d’yceulx le bon homme feut tant joyeulx/ que possible ne seroit le descripre. Adoncq leurs feist un festin le plus magnificque, le plus abundant et plus delitieux, que feust veu depuys le temps du roy Assuere. A l’issue de table il distribua a chascun d’yceulx tout le parement de son buffet qui estoit au poys de dishuyt cens mille bezans d’or: en grands vases D’antique / grands potz/ grands bassins/ grands tasses/ couppes/ potetz/ candelabres/ calathes / nacelles/ violiers/ et aultre telle vaisselle toute d’or massif: oultre la pierrerie, esmail et ouvraige, qui par estime de tous excedoit en pris la matiere d’yceulx. Plus, leurs feist compter de ses coffres a chascun douze cens mille escuz contents. Et d’abundant a chascun d’yceulx donna a perpetuite (excepte s’ilz mouroient sans hoirs) ses chasteaux/ et terres vicines scelon que plus leurs estoient commodes. A Ponocrates donna la Rocheclermaud / a Gymnaste le Couldray / a Eudemon Montpensier. Le Rivau a Tolmere / a Ithybole Montsoreau / a Acamas Cande / Varenes / a Chironacte / Gravot a Sebaste / Quiquenays a Alexandre / Ligre a Sophrone, et ainsi de ses aultres places.