¶Comment les habitans de Lerne par le commandement de Picrochole leur roy assaillerent au despourveu les bergiers de Gargantua. Chap. xxiiii.

Page [91]

Les fouaciers retournez a Lerne soubdain davant boyre ny manger se transporterent au capitoly, et la davant leur roy nomme Picrochole, tiers de ce nom, proposerent leur complaincte, monstrans leurs paniers rompuz, leurs robbes dessirees, leurs fouaces destroussees, et singulierement Marquet blesse enormement / disans le tout avoir este faict par les bergiers et mestaiers de Grandgousier, au pres du grand carroy par dela Seuille. Lequel incontinent entra en courroux furieux, et sans plus oultre se interroguer quoy ne comment feist cryer par son pays ban et arriere ban, et que un chascun sur peine de la hart convint en armes en la grand place, devant le chasteau, a heure de midy, pour mieux confermer son entreprinse, envoya sonner le tabourin a l’entour de la ville, luy mesmes ce pendent qu’on aprestoit son disner, alla faire affuster son artillerie, et desploier son enseigne et oriflant, et charger force munitions, tant de harnoys d’armes que de gueulles. En disnant bailla les commissions et feut par son esdict constitue le seigneur Grippeminaud sus l’avantguarde, en laquelle feurent contez seize mille hacquebutiers, vingt cinq mille avanturiers. A l’artillerie feut commis le grand escuyer Touc quedillon, en laquelle feurent contees

Page [92]
neuf cens quatorze grosses pieces de bronze, en canons, doubles canons, baselicz serpentines, coulevrines, bombardes, faulcons, passevolans, spiroles, et aultres pieces. L’arriere guarde fut baillee au duc de Raquedenare. En la bataille se tint le roy et les princes de son royaulme. Ainsi sommairement acoustrez davant que se mettre en voye, envoyerent troys cens chevaulx legiers soubz la conduicte du capitaine Engoulevent, pour descouvrir le pays, et scavoir s’il y avoit nulle embusche par la contree. Mais avoir diligemment recherche trouverent tout le pays a l’environ en paix et silence, sans assemblee quelconques. Ce que entendent Picrochole commenda que chascun marchast soubz son enseigne hastivement. Adoncques sans ordre et mesure prindrent les champs les uns par my les aultres, guastans et dissipans tout par ou ilz passoient, sans espargner ny pouvre ny riche, ny lieu sacre, ny prophane, emmenoient beufz, vaches, taureaux, veaulx, genisses, brebis, moutons, chevres et boucqs: poulles, chapons, poulletz, oyzons, jards, oyes, porcs, truyes, guorretz, abastans les noix, vendangeans les vignes, emportans les seps, croullans tous les fruicts des arbres. C’estoit un desordre incomparable de ce qu’ilz faisoient. Et ne trouverent personne quelconques
Page [93]
leur resistast, mais un chascun se mettoit a leur mercy, les suppliant estre traictez plus humainement, en consideration de ce qu’ilz avoient de tous temps estez bons et amiables voisins, et que jamais envers eulx ne commisrent exces ne oultraige, pour ainsi soubdainement estre par iceulx mal vexez, et que dieu les en puniroit de brief. Es quelles remonstrances, rien plus ne respondoient, si non qu’ilz leurs vouloient aprendre a manger de la fouace.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other