¶Comment l’escharmouche de Picrochole feut rencontree par Gargantua. Et comment le Moyne tua le capitaine Tyravant, et puis fut prisonnier entre les ennemys. Chap. xli.

Picrochole a la relation de ceulx qui avoient evade a la roupte lors que Tripet fut estripe fut esprins de grand courroux, oyant que les diables avoient couru suz ses gens. et tint son conseil toute la nuyct, au quel Hastiveau et Toucquedillon decernerent que sa puissance estoit telle qu’il pourroit defaire tous les diables d’enfer s’ilz y venoient. Ce que Picrochole ne croyoit pas du tout, aussy ne s’en defioyt il. Pourtant envoya soubz la conduicte du conte de Tyravant pour descouvrir le pays seize cens chevaliers tous montez sus chevaulx legiers en escharmousche, tous bien aspergez d’eau beniste/ et chascun ayant pour leur signe une estolle en escharpe, a toutes adventures s’ilz rencontroient les diables, que par vertus tant de ceste eau Gringorienne que des estolles les feissent disparoir et esvanouyr. Iceulx coururent jusques pres la vau Guyon / et la maladerye, mais

oncques ne trouverent personne a qui parler, dont repasserent par le dessus, et en la loge et tugure pastoral/ pres le Couldray trouverent les cinq pelerins. Lesquelz liez et baffouez emmenerent, comme s’ilz feussent espies, non obstant les exclamations/ adjurations/ et requestes qu’ilz feissent. Descendus de la vers Seuille / furent entenduz par Gargantua. Lequel dist a ses gens. Compaignons il y a icy rencontre et sont en nombre trop plus dix foys que nous, chocquerons nous sus eulx. Que diable (dist le moyne) ferons nous doncq? Estimez vous les hommes par nombre/ et non par vertus et hardiesse? Puis s’escria Chocquons diables/ chocquons. Ce que entendens les ennemys pensoient certainement que feussent vrays diables, dont commencerent fuyr a bride avallee, excepte Tyravant : lequel coucha sa lance en l’arrest, et en ferut a toute oultrance le moyne au meillieu de la poictrine mais rencontrant le froc horrifique, rebouscha par le fer, comme si vous frapiez d’une petite bougie contre une enclume. Adoncq le Moyne avecq son baston de croix luy donna entre col et collet sus l’os acromion si rudement qu’il l’estonna: et feist perdre tout sens et movement, et tomba es piedz du cheval. Et voyant l’estolle qu’il portoit en escharpe, dist a Gargantua. Ceulx cy ne sont que prebstres, ce n’est q’un commancement de moyne, par sainctJean je suys moyne parfaict. je vous en tueray comme de mousches. Puis le grand gualot courut apres, tant qu’il atrapa les derniers et les abbastoyt comme seille frapant a tors et a travers. Gymnaste interrogua sus l’heure Gargantua, s’ilz les debvoient poursuyvre? A quoy dist Gargantua. Nullement. Car scelon vraye discipline militaire, jamais ne fault mettre son ennemy en lieu de desespoir. Par ce que telle necessite luy multiplie la force/ et acroist le couraige, qui ja estoit deject et failly. Et n’y a meilleur remede de salut a gens estommiz et recreuz que de n’esperer salut aulcun. Quantes victoires ont estes tollues des mains des vaincqueurs par les vaincuz, quand ilz ne se sont contentez de raison: mais ont attempte du tout mettre a internition et destruire totalement leurs ennemys, sans en vouloir laisser un seul pour en porter les nouvelles? Ouvrez tousjours a voz ennemys toutes les portes et chemins/ et plus tost leurs faictes un pont d’argent, affin de les renvoyer. Voyre mais (dist Gymnaste) ilz ont le Moyne. Ont ilz (dist Gargantua) le moyne? Suz mon honneur, que ce sera a leur dommaige. Mais affin de survenir a tous azars, ne nous retirons pas encores, attendons icy en silence. Car je pense ja assez congnoistre l’engin de noz ennemys, il se guident par sort non par conseil. Iceulx ainsi attendens soubz les noiers, ce pendent le moyne poursuyvoit chocquant tous ceulx qu’il rencontroit sans de nully avoir mercy. Jusques a ce qu’il rencontra un chevalier qui portoit en crope un des pauvres pelerins. et la le voulant mettre a sac s’escrya le pelerin. Ha monsieur le priour mon amy monsieur le priour saulvez moy je vous en prie. Laquelle parolle entendue se retournerent arriere les ennemys, et voyans que la n’estoit que le moyne, qui faisoit cest esclandre, le chargerent de coups, comme on faict un asne de boys, mais de tout ne sentoit mesmement quand ilz frapoient sus son froc presque rien, tant il avoit la peau dure. Puys le baillerent a garder a deux archiers/ et tournans bride ne veirent personne contre eulx, dont existimerent que Gargantua s’en estoit fuy avecques sa bande. Adoncques coururent vers les noyrettes tant roiddement qu’ilz peurent pour les rencontrer, et laisserent la le moyne seul avecques deux archiers de guarde. Gargantua entendit le bruit et hennissement des chevaulx, et dist a ses gens. Compaignons, j’entends le trac de noz ennemys, et ja en apercoy aulcuns d’iceulx qui viennent contre nous a la foulle serrons nous icy, et tenons le chemin en bon ranc, par ce moyen nous les pourrons recepvoir a leur perte et a nostre honneur.