¶Comment Gargantua emploioyt le temps quand l’air estoit pluvieux. Chap. xxii.

S’Il advenoyt que l’air feust pluvieux et intempere, tout le temps d’avant disner estoyt employe comme de coustume, excepte qu’il

faisoyt allumer un beau et clair feu/ pour corriger l’intemperie de l’air. Mays apres disner en lieu des exercitations, ilz demouroient en la maison et estudioient en l’art de painctrie, et sculpture: ou revocquoient en usaige l’anticque jeu des tales, ainsy qu’en a escript Leonicus, et comme y joue nostre bon amy Lascaris. En y jouant recoloient les paissages des auteurs anciens es quelz est faicte mention ou prinse quelque metaphore sus ycelluy jeu: ou alloient veoir comment on tiroyt les metaulx, ou comme on fondoyt l’artillerye: ou alloient veoir les lapidaires, orfevres et tailleurs de pierreries, ou les Alchimistes et monoyeurs, ou les haultelissiers, les tissotiers, les velotiers, les horologiers, miralliers, imprimeurs organistes, tincturiers, et aultres telles sortes d’ouvriers, et par tout donnans le vin, aprenoient, et consideroient l’industrie et invention des mestiers. Alloient ouir les leczons publicques, les actes solennelz les repetitions, les declamations, les playdoiez des gentilz advocatz, les concions des prescheurs evangelicques. Passoyt par les salles et lieux ordonnez pour l’escrime, et la contre les maistres essayoit de tous bastons, et leur monstroyt par evidence, que autant voyre plus en scavoyt que iceulx. Et au lieu de arborizer, visitoient les bouticques des drogueurs, herbiers et apothecaires, et soigneusement con sideroyent les fruictz, racines, feueilles semences axunges peregrines, ensemble aussy comment on les adulteroyt, Alloyt veoir les basteleurs, trejectaires et theriacleurs, et consideroyt leurs gestes, leurs ruses, leurs soubressaulx, et beau parler singulierement de ceulx de Chaunys en Picardie, car ilz sont de nature grands jaseurs et beaux bailleurs de ballivernes. Eulx retournez pour soupper, mangeoient plus sobrement que es aultres jours, et viandes plus desiccatives et extenuantes: affin que l’intemperie humide de l’air, communicquee au corps par necessayre confinite, feust par ce moien corrigee et ne leurs feust incommode par ne soy estre exercitez: comme avoient de coustume. Ainsy fut gouverne Gargantua et continuoyt ce proces de jour en jour, en profitant comme entendez que peut fayre un jeune homme de bon sens en tel exercice ainsi continue. Lequel combien que semblast pour le commencement difficile, en la continuation tant doulx fut/ legier/ et delectable, que mieulx ressembloyt un passetemps de roy, que l’estude d’un escholier. Toutesfoys Ponocrates pour le sejourner de ceste vehemente intention des esperitz advisoyt une foys le moys quelque jour bien clair et serain, on quel bougeoient au matin de la ville, et alloient ou a Gentilly, ou a Boloigne, ou a Montrouge, ou au pont Charanton, ou a Vanves ou a sainct Clou. Et la passoient toute la journee a fayre la plus grande chere, dont ilz se povoient adviser, raillans gaudissans, beuvans d’aultant, jouanz, chantant, dansans, se voytrans en quelque beau pre, denigeans des passereaulx/ prenans des cailles, peschans aux grenoilles, et escrevisses. Mais encores que ycelle journee feust passee sans livres et lectures, poinct elle n’estoyt passee sans profit. Car en beau pre ilz recoloient par cueur quelques plaisans vers de l’agriculture de Virgile, de Hesiode, du Rustice de Politian, descryvoient quelques plaisans epigrammes en latin: puys les mettoient par rondeaux et balades en langue francoise, En bancquetant du vin aisgue separoient l’eau, comme l’enseigne Cato de re rust. et Pline, avecques un goubelet de Lyerre, lavoient le vin en plain bassin d’eau puys le retiroient avec un embut faisoient aller l’eau d’un verre en aultre, bastissoient plusieurs petitz engins automates, c’est a dyre, soy movens eulx mesmes.