Les couleurs et livree de Gargantua. Chapitre. ix.

Les couleurs de Gargantua feurent blanc et bleu: comme cy dessus avez peu lire. Et par icelles vouloit

son pere qu'on entendist que ce luy estoit une joye celeste. Car le blanc luy signifioit joye, plaisir, delices, et resjouissance, et le bleu, choses celestes.

J'entends bien que lisans ces motz, vous mocquez du vieil beuveur, et reputez l'exposition des couleurs par trop in dague, et abhorrente: et dictes que blanc signifie foy: et bleu, fermeté. Mais sans vous mouvoir, courroucer, eschaufer, ny alterer (car le temps est dangereux) respondez moy si bon vous semble. D'aultre contraincte ne useray envers vous, ny aultres quelz qu'ilz soient. Seulement vous diray un mot de la bouteille.

Qui vous meut? Qui vous poinct? Qui vous dict? que blanc signifie foy: et bleu fermeté? Un (dictes vous) livre tre pelu qui se vend par les bisouars et porteballes au tiltre: Le Blason des couleurs. Qui l'a faict? Quiconques il soit, en ce a este prudent, qu'il n'y a poinct mis son nom, Mais au reste, je ne scay quoy premier en luy je doibve admirer, ou son

oultrecuidance, ou sa besterie.

Son oultrecuidance, qui sans raison, sans cause, et sans apparence, a ause prescripre de son autorité privee quelles choses seroient denotees par les couleurs: ce que est l'usance des tyrans qui voulent leur arbitre tenir lieu de raison: non des saiges et scavans qui par raisons manifestes contentent les lecteurs.

Sa besterie: qui a existime que sans aultres demonstrations et argumens valables le monde reigleroit ses devises par ses impositions badaudes.

De faict (comme dict le proverbe, a cul de foyrad toujours abonde merde) il a trouve quelque reste de niays du temps des haultz bonnetz: lesquelz ont eu foy a ses escripts. Et selon iceulx ont taille leurs apophthegmes et dictez: en ont en chevestre leurs muletz: vestu leurs pages, escartelé leurs chausses, brodé leurs guandz: frangé leurs lictz: painct leurs enseignes: composé chansons: et (que pis est) faict impostures et lasches tours

clandestinement entre les pudicques matrones.

En pareilles tenebres sont comprins ces glorieux de court, et transporteurs de noms: lesquelz voulens en leurs divises signifier espoir, font protraire une sphere: des pennes d'oiseaulx, pour poines: de L'ancholie, pour melancholie: la Lune bicorne, pour vivre en croissant: un banc rompu, pour bancque roupte: non et un alcret, pour non durhabit: un lict sans ciel, pour un licentie. Que sont homonymies tant ineptes, tant fades, tant rusticques et barbares, que l'on doibvroit atacher une queue de renard, au collet, et faire un masque d'une bouze de vache a un chascun d'iceulx, qui en vouldroit dorenavant user en France apres la restitution des bonnes lettres.

Par mesmes raisons (si raisons les doibz nommer, et non resveries) ferois je paindre un penier: denotant qu'on me faict pener. Et un pot a moustarde, que c'est mon cueur a qui moult tarde. Et un

pot a pisser, c'est un official. Et le fond de mes chausses, c'est un vaisseau de petz et ma braguette, c'est le greffe des arrestz Et un estront de chien, c'est un tronc de ceans, ou gist l'amour de m'amye.

Bien aultrement faisoient en temps jadis les saiges de Egypte, quand ilz escripvoient par lettres, qu'ilz appelloient hieroglyphicques. Lesquelles nul n'entendoit qui n'entendist: et un chascun entendoit qui entendist la vertu, propriete, et nature des choses par icelles figurées, Desquelles Orus Apollon a en Grec compose deux livres, et Polyphile au songe d'amours en a davantaige expose. En France vous en avez quelque transon en la devise de monsieur L'admiral: laquelle premier porta Octavian Auguste.

Mais plus oultre ne fera voile monequif entre ces gouffres et guez mal plaisans: Je retourne faire scale au port dont suis yssu. Bien ay je espoir d'en escripre quelque jour plus amplement: et monstrer tant par raisons philosophicques,

que par auctoritez receues et approuvees de toute anciennete, quelles et quantes couleurs sont en nature: et quoy par une chascune pent estre designe, si dieu me saulve le moulle du bonnet, c'est le pot au vin, comme disoit ma mere grand.