Des meurs et condictions de Panurge. Chapitre. xvj.

Panurge estoit de stature moyenne ny trop grand, ny trop petit, et avoit le nez un peu aquillin faict a manche de rasouer. Et pour lors estoit de l'eage de trente et cinq ans ou environ, fin a dorer comme une dague de plomb bien galand homme de sa personne, sinon qu'il estoit quelque peu paillard, et subject de nature a une maladie qu'on appelloit en ce temps la, faulte d'argent

c'est doleur non pareille , toutesfoys il avoit soixante et troys manieres d'en trouver tousjours a son besoing, dont la plus honorable et la plus commune estoit par facon de larrecin furtivement faict, malfaisant, pipeur, beuveur, bateur de pavez, ribleur s'il en estoit a Paris : au demourant le meilleur filz du monde et tousjours machinoit quelque chose contre les sergeans et contre le guet.

A l'une foys il assembloit troys ou quatre bons rustres, les faisoit boire comme Templiers sur le soir, apres les menoit au dessoubz de saincte Geneviefve ou aupres du colliege de Navarre et a l'heure que le guet montoit par la: ce que il congnoissoit en mettant son espee sur le pave et l'aureille aupres, et lors qu'il oyoit son espee bransler: c'estoit signe infallible que le guet estoit pres: a l'heure doncques luy et ses compaignons prenoyent un tombereau, et luy bailloyent le bransle le ruant de grande force contre la vallee, et ainsi mettoyent tout le pauvre

guet par terre comme porcs, puis fuyoyent de l'aultre couste, car en moins de deux jours, il sceut toutes les rues, ruelles et traverses de Paris comme son Deus det.A l'aultre foys faisoit en quelque belle place par ou ledict guet debvoit passer une trainnee de pouldre de canon, et a l'heure que passoit mettoit le feu dedans, et puis prenoit son passetemps a veoir la bonne grace qu'il avoyent en fuyant pensans que le feu sainct Antoine les tint aux jambes.Et au regard des pauvres maistres es ars, il les persecutoit sur tous aultres, quand il recontroit quelcun d'entre eulx par la rue, jamais ne failloit de leur faire quelque mal, maintenant leurs mettant un estronc dedans leurs chaperons au bourlet, maintenant leur attachant de petites quehues de regnard, ou des aureilles de lievres par derriere, ou quelque aultre mal. Un jour que l'on avoit assigne a yceulx se trouver en la rue du feurre, il feist une tartre borbonnoise composee de force de hailz, de galbanum, de assa fetida, de castoreum: d'estroncs tous chaulx, et la destrampit en sanie de bosses chancreuses, et de fort bon matin engressa et oignit tout le pavé en sorte que le diable n'y eust pas duré. Et tous ces bonnes gens rendoyent la leurs gorges devant tout le monde, comme s'ilz eussent escorché le regnard, et en mourut dix ou douze, de peste, quatorze en feurent ladres, dix et huyct en furent pouacres: et plus de vingt et sept en eurent la verolle, mais il ne s'en soucioit mie.Et portoit ordinairement un fouet soubz sa robbe, duquel il fouettoyt sans remission les paiges qu'il trouvoit portans du vin a leurs maistres, pour les avancer d'aller.En son saye avoit plus de vingt et six petites bougettes et fasques tousjours pleines, l'une d'un petit deau de plomb, et d'un petit cousteau affilé comme l'aguille d'un peletier, dont il couppoit les bourses: l'aultre de aigrest qu'il gettoit aux yeulx de ceulx qu'il trouvoit, l'aultre de glaterons empenez de petites plumes de oysons ou de chappons, qu'ilz gettoit sus les robes et bonnetz des bonnes gens: et souvent leur en faisoit de belles cornes qu'ilz portoyent par toute la ville, aulcunesfoys toute leur vie.

Aux femmes aussi par dessus leurs chapperons au derriere, aulcunesfoys en mettoit faictz en forme d'un membre d'homme.En l'aultre un tas de cornetz tous pleins de pulses et de poux, qu'il empruntoit des guenaulx de sainct Innocent, et les gettoit avecques belles petites cannes ou plumes dont on escript sur les colletz des plus sucrees damoiselles qu'il trouvoit, et mesmement en l'eglise: car jamais ne se mettoit au cueur au hault, mais tousjours demouroit en la nef entre les femmes, tant a la messe, a vespres, comme au sermon.En l'aultre force provision de haims et claveaulx dont il acouploit souvent les hommes et les femmes en compaignies ou ilz estoient serrez, et mesmement celles qui portoyent

robbes de tafetas armoisy, et a l'heure qu'elles se vouloyent departir, elles rompoyent toutes leurs robbes.

En l'aultre un fouzil garny desmorche, d'allumettes, de pierre a feu, et tout aultre appareil a ce requis.En l'aultre deux ou troys mirouers ardens, dont il faisoit enrager aulcunesfoys les hommes et les femmes, et leur faisoit perdre contenence a l'eglise: car il disoit qu'il n'y avoit q'un antistrophe entre femme folle a la messe, et femme molle a la fesse.

En l'aultre avoit provision de fil et d'agueilles, dont il faisoit mille petites diableries.Une foys a l'issue du Palays a la grand salle lors que un cordelier disoit la messe de messieurs: il luy ayda a soy habiller et revestir, mais en l'acoustrant il luy cousit l'aulbe avec sa robbe et chemise, et puis se retira quand messieurs de la court vindrent s'asseoir pour ouyr icelle messe. Mais quand ce fut a l'ite missa est, que le pauvre frater se voulut devestir son aulbe, il emporta

ensemble et habit et chemise qui estoyent bien cousuz ensemble, et se rebassit jusques aux espaules, monstrant son callibistris a tout le monde, qui n'estoit pas petit: sans doubte. Et le frater tousjours tiroit, mais tant plus se descouvroit il, jusques a ce q'un de messieurs de la court dist. Et quoy ce beaupere nous veult il icy faire l'offrande et baiser son cul? le feu sainct Antoine le baise.Des lors fut ordonne que les pauvres beaulx peres ne se despouilleroyent plus devant le monde: mais en leur sacristie, mesmement en presence des femmes: car ce leur seroit occasion du peche d'envie.Et le monde demandoit. Pourquoy est ce que ces fratres avoyent la couille si longue? ledict Panurge soulut tresbien le probleme, disant. Ce que faict les aureilles des asnes si grandes, ce est par ce que leurs meres ne leurs mettoyent poinct de beguin en la teste, comme dict de Alliaco en ses suppositions.A pareille raison, ce que faict la couille des pauvres beatz peres, c'est qu'ilz ne portent point de chausses foncees, et leur pauvre membre s'estend en liberté a bride avallee, et leur va ainsi triballant sur les genoulx, comme font les patenostres aux femmes. Mais la cause pourquoy ilz l'avoyent gros a l'equipollent, c'estoit que en ce triballement les humeurs du corps descendent audict membre: car selon les Legistes, agitation et motion continuelle est cause d'atraction.Item il avoit un aultre poche pleine de alun de plume, dont il gettoit dedans le doz des femmes qu'il voyoit les plus acrestées, et les faisoit despouiller devant tout le monde, les aultres dancer comme jau sur breze ou bille sur tabour: les aultres courir les rues, et luy apres couroit: et a celles qui se despouilloyent, il mettoit sa cappe sur le doz, comme homme courtoys et gracieux.Item en un aultre il avoit une petite guedoufle pleine de vieille huyle, et quand il trouvoit ou femme ou homme qui eust quelque belle robbe il leurs engressoit et guastoit tous les plus beaulx endroictz, soubz le semblant de les toucher et dire, voicy de bon drap, voicy bon satin, bon tafetas, ma dame dieu vous doint ce que vostre noble cueur desire: voz aves robbe neufve, novel amy, dieu vous y maintienne, ce disant leurs mettoit la main sur le collet, ensemble la male tache y demouroit perpetuellement, si enormement engravee en l'ame, en corps, et renommee, que le diable ne l'eust poinct ostee, puis a la fin leur disoit. Ma damez donne vous garde de tomber: car il y a icy un grand et sale trou devant vous.Et un aultre il avoit tout plein de Euphorbe pulverisé bien subtilement, et la dedans mettoit un mouschenez beau et bien ouvré qu'il avoit desrobé a la belle lingere du palays, en luy oustant un poul dessus son sein, lequel toutesfoys il y avoit mis. Et quand il se trouvoit en compaignie de quelques bonnes dames, il leur mettoit sus le propos de lingerie, et leur mettoit la main au sein demandant, et c'est ouvraige est il de Flandre ou de Haynault ? et puis tiroit son mouschenez disant, tenez tenez voyez en cy de l'ouvrage, elle est de foutignan ou de Foutarabie, et le secouoit bien fort a leur nez, et les faisoit esternuer quatre heures sans repos: Ce pendent il petoit comme un rousin et les femmes ryoient luy disans comment vous petez Panurge ? Non foys: disoit il ma dame: mais je accorde au contrepoint de la musicque que vous sonnes du nez.En l'aultre un daviet, un pellican, un crochet et quelques aultres ferremens dont il n'y avoit porte ny coffre qu'il ne crochetast.En l'aultre tout plein de petitz goubeletz: dont il jouoit fort artificiellement: car il avoit les doigts faictz a la main comme Minerve ou Arachne, Et avoit aultresfoys crie le theriacle.Et quand il changeoit un teston, ou quelque aultre piece, le changeur eust este plus fin que maistre mousche si Panurge n'eust faict esvanouyr a chascune foys cinq ou six grans blancs visiblement, apertement, manifestement, sans faire lesion ne blessure aulcune, dont le changeur n'en eust senty que le vent.