Comment Panurge, Carpalim, Eusthenes, Epistemon, compaignons de Pantagruel desconfirent six cens soixante chevaliers bien subtilement. Chapi. xxv .

Ainsi qu'il disoit cela ilz adviserent six cens soixante chevaliers montez a l'advantage sus chevaulx legiers, qui acouroyent la veoir quelle navire

Page Fu.99.
c'estoit qui estoit de nouveau abordee au port, et couroyent a bride avallee pour les prendre s'ilz eussent peu.Lors dist Pantagruel. Enfans retirez vous en la navire, voyez cy de noz ennemys qui accourent, mais je vous les tueray icy comme bestes et feussent ilz dix foys autant: ce pendent retirez vous et en prenez vostre passetemps.Adonc respondit Panurge Non seigneur, il n'est de raison que ainsi faciez: mais au contraire retirez vous en la navire et vous et les aultres. Car tout seul les desconfiray icy: mais y ne fauldra pas tarder: avancez vous A quoy dirent les aultres, c'est bien dict. Seigneur retirez vous, et nous ayderons icy a Panurge, et vous congnoistrez que nous scavons faire. Adonc Pantagruel dist. Or je le veulx bien, mais au cas que feussiez plus foybles: je ne vous fauldray.Alors Panurge tira deux grandes cordes de la nef, et les atacha au tour qui estoit sur le tillac et les mist en terre et en fist un long circuyt,
Page [99v]
l'un plus loing, l'aultre dedans cestuy la. Et dist a Epistemon, entrez dedans la navire, et quand je vous sonneray, tournez le tour sus le tillac diligentement en ramenant a vous ces deux chordes.Puis dist a Eusthenes et a Carpalim Enfans attendez icy et vous offrez es ennemys franchement, et obtemperez a eux et faictes semblant de vous rendre, mais advisez, que ne entrez au cerne de ces chordes: retirez vous tousjours hors. Et incontinent entra dedans la navire, et print un fais de paille et une botte de pouldre de canon et espandit par le cerne des chordes, et avec une migraine de feu se tint aupres.Soubdain arriverent a grande force les chevaliers, et les premiers chocquerent jusques au pres de la navire, et par ce que le rivage glissoit, tumberent eux et leurs chevaulx jusques au nombre de quarante et quatre. Quoy voyans les aultres approcherent pensans que on leur eust resisté a l'arrivée, Mais Panurge leur dist.
Page Fu.100.
Messieurs je croy que vous soyez faict mal, pardonnez le nous: car ce n'est de nous, mais c'est de la lubricite de l'eau de mer, qui est tousjours unctueuse. Nous nous rendons a vostre bon plaisir. Autant en dirent ses deux compaignons, et Epistemon qui estoit sur le tillac.

Ce pendent Panurge s'esloignoit et voyant que tous estoyent dedans le cerne des chordes, et que ses deux compaignons s'en estoyent esloignez faisans place a tous ces chevaliers qui a foulle alloyent pour veoir la nef et qui estoit dedans, soubdain crya a Epistemon, tire, tire,Lors Epistemon commenca tirer au tour, et les deux chordes se empestrerent entre les chevaulx et les ruoyent par terre bien aysement avecques les chevaucheurs: mais eulx ce voyant tirerent a l'espee et les vouloyent desfaire, dont Panurge met le feu en la trainee et les fist tous la brusler comme ames dannees, hommes et chevaulx nul n'en eschappa, excepte un qui estoit

Page [100v]
monte sur un cheval turcq, qui le gaigna a fouyr: mais quand Carpalim l'apperceut, il courut apres en telle hastivete et allaigresse qui le attrappa en moins de cent pas, et saultant sur la crouppe de son cheval l'embrassa par derriere et l'amena a la naviere.Ceste deffaicte parachevee Pantagruel feut bien joyeux, et loua merveilleusement l'industrie de ses compaignons, et les fist refraichir et bien repaistre sur le rivaige joyeusement et boire d'autant le ventre contre terre, et leur prisonnier avecques eulx familiairement: sinon que le pauvre diable n'estoit point asseure que Pantagruel ne le devorast tout entier, ce qu'il eust faict tant avoit la gorge large, aussi facillement que feriez un grain de dragee, et ne luy eust monte en sa bouche en plus q'un grain de millet en la gueulle d'un asne.

Réel    Hypothétique    Fictif    Mythique   
Région, contrée    Ville, village    Bâtiment    Étendue, cours d'eau    Montagne, île, ...    Autre