Comment Pantagruel assiste au jugement du juge Bridoye, lequel sententioit les procés au sort des dez.

Page 123

Chapitre XXXIX.

Au jour subsequent a heure de l’assignation Pantagruel arriva en Myrelingues. Les President, Senateurs, et Conseilliers le prierent entrer avecques eulx, et ouyr la decision des causes et raisons que allegueroit Bridoye, pourquoy auroit donné certaine sentence contre l’esleu Toucheronde, laquelle ne sembloit du tout aequitable a icelle Court centumvirale. Pantagruel entre voluntiers: et la trouve Bridoye on mylieu du parquet assis: et pour toutes raisons et excuses rien plus ne respondent, si non qu’il estoit vieulx devenu, et qu’il n’avoit la veue tant bonne comme de coustume: alleguant plusieurs miseres et calamitez que vieillesse apporte avecques soy, les quelles not. per Archid. d. lxxxvj. c. tanta. Pourtant ne congnoissoit il tant distinctement les poinctz des dez, comme avoit faict par le passé. Dont povoit estre, qu’en la façon que Isaac vieulx et mal voyant print Jacob pour Esaü : ainsi a la decision du procés, dont estoit question, il auroit prins un quatre pour un cinq: notamment

referent que lors il avoit usé de ses petits dez. Et que par disposition de droict les imperfections de Nature ne doibvent estre imputées a crime, comme apert ff. de re milit. l. qui cum uno: ff. de reg. iur. l. fere. ff. de edil. ed. per totum. ff. de term mo. l. Divus Adrianus resolu. per Lud. Ro. in l. si verò ff. solu. matri. Et qui aultrement feroit, non l’home accuseroit, mais Nature, comme est evident in l. maximum vitium. C. de lib. praeter.

Quelz dez (demandoit Trinquamelle grand Praesident d’icelle court) mon amy entendez vous? Les dez (respondit Bridoye) des jugemens, Alea iudiciorum, des quelz est escript par doct. 26. q. ij. c. Sors l. nec emptio. ff. de contrah. empt. l. quod debetur. ff. de pecul. et ibi Barthol. Et des quelz dez vous aultres messieurs ordinairement usez en ceste vostre court souveraine, aussi font tous aultres juges en decision des procés, suyvans ce qu’en a noté. D.. et no. gl. in c. fin. de sortil. et l. sed cum ambo. ff. de iudi. ubi doct. notent que le sort est fort bon, honeste. utile et necessaire a la vuidange des procés et dissentions. Plus

encores apertement l’ont dict Bal. Bart. et Alex. C. communia de l. Si duo. Et comment (demandoit Trinquamelle) faictez vous mon amy? Je (respondit Bridoye) responderay briefvement scelon l’enseignement de la l. Ampliorem. §. in refutatoriis. C. de appella. et ce que dit Gl. l. j. ff. quod met. cau. Gaudent brevitate moderni. Je fays comme vous aultres messieurs, et comme est l’usance de judicature: a laquelle nos droictz com mendent tousjours deferer. ut no. extra de consuet. c. ex literis. et ibi Innoc. Ayant bien veu, reveu, leu, releu, paperassé, et feueilleté les complainctes, adjournemens, comparitions, commissions, informations, avant procedez, productions, alleguations, intendictz, contredictz, requestes, enquestes, repliques, dupliques, tripliques, escriptures, reproches, griefz, salvations, recollemens, confrontations, acarations, libelles, apostoles, letres royaulx, compulsoires, declinatoires, anticipatoires, evocations, envoyz, renvoyz, conclusions, fins de non proceder, apoinctemens, reliefz, confessions, exploictz, et aultres telles dragées et espisseries d’une part et d’aultre, comme doibt faire le bon juge scelon qu’en a no. Spec. de ordinario. §. iij. et tit. de offi. om. ju. §. fi. et de rescriptis praesenta §. j. Je pose sus le bout de table en mon cabinet tous les sacs du defendeur: et luy livre chanse premierement, comme vous aultres messieurs. Et est not. l. Favorabiliores. ff. de reg. iur. et in c. cum sunt eod. tit. lib. vj. qui dict Cum sunt partium iura obscura, reo fauendum est potius quàm actori. Cela faict, je pose les sacs du demandeur, comme vous aultres messieurs, sus l’aultre bout visum visu. Car, opposita iuxta se posita magis elucescunt. ut not. in l. j. §. videamus. ff. de his qui sunt sui vel alie. iur. et in l. munerum. j. mixta. ff. de muner. et honor. Pareillement et quant et quand je luy livre chanse.

Mais (demandoit Trinquamelle) mon amy, a quoy congnoissez vous l’obscurité des droictz praetenduz par les parties playdoiantes? Comme vous aultres messieurs, (respondit Bridoye) sçavoir est quand il y a beaucoup de sacs d’une part et de aultre. Et lors je use de mes petitz dez, comme vous aultres messieurs, suyvant

la loy, Semper in stipulationibus. ff. de reg. iur. et la loy versale versifiée q eod. tit. Semper in obscuris quod minimum est sequimur. canonizée in c. in obscuris eod. tit. lib. vi. J’ay d’aultres gros dez bien beaulx et harmonieux, des quelz je use, comme vous aultres messieurs, quand la matiere est plus liquide, c’est a dire, quand moins y a de sacs.

Cela faict, (demandoit Trinquamelle) comment sententiez vous, mon amy? Comme vous aultres messieurs, respondit Bridoye, pour celluy je donne sentence du quel la chanse livrée par le sort du dez judiciaire, Tribunian, praetorial, premier advient. Ainsi commendent nos droictz. ff. qui po. in pig. l. potior. leg. creditor. C. de consul. l. j. Et de reg. iur. in vj. Qui prior est tempore, potior est iure.