Comment par Grippe-minaud nous fut proposé un enigme. CHAP. XII.

Quant fusmes assis Grippe-minaud au millieu de ses Chats-fourrez

nous dist en parolle furieuse et enrouee Orça, orça, orça, à boire à boire ça, disoit Panurge entre ses dens.

Une bien jeune et toute blondelette
Conceut un fils Etyopien, sans pere.
Puis l'enfanta sans douleur la tendrette,
Quoy qu'il sortist comme faict la vipere.
L'ayant rongé en mout grand vitupere
Tout l'un des flancs, pour son impatience.
Depuis passa mons et vaux en fiance,
Par l'air volant, en terre cheminant:
Tant qu'estonna l'amy de sapience,
Qui l'estimoit estre humain animant.

Orça, respons moy, dist Grippe-minaud, à cest enigme, et nous resoulz presentement que c'est, orça. Or de par Dieu, respondis-je, si j'avois Sphinx en ma maison, or de par Dieu, comme l'avoit verres, un de vos precurseurs, or de par Dieu, resouldre pourrois l'enigme, or de par Dieu, mais certes je n'y estois mie, et suis, or de par Dieu innocent du faict. Orça, dist Grippe-minaud, par styx, puis qu'autre chose ne veux dire, orça, je te monstreray orça, que meilleur te seroit estre tombé entre les pattes de lucifer, orça, et de tous les diables, orça, qu'entre nos griphes, orça, le vois tu bien, orça, malautru, nous alleguer tu innocence, orça, comme chose

digne d'eschapper nos tortures, orça, nos loix sont comme toille d'araignes, orça, les simples mouscherons, et petits papillons y sont prins, orça, les gros taons malfaisans les rompent, orça, et passent à travers, orça. Semblablement nous ne cherchons les gros larrons et tyrans, orça, ils sont de trop dure digestion, orça, et nous affolleroient, orça, vous autres gentils innocens, orça, y serez bien innocentez, orça, le grand diable, orça, vous y chantera messe, orça.

Frere Jean impatient de ce qu'avoit deduit Grippe minaud : hau monsieur le diable engipponné, comment veux tu qu'il responde d'un cas lequel il ignore: ne te contente tu de verité? Orça, dist Grippeminaud, encores n'estoit de mon regne advenu, orça, qu'icy personne, sans premier estre interrogué parlast, orça Qui nous a deslié ce fol enragé icy? Tu as menty, dist frere Jean sans les levres mouvoir. Orça, quand seras en rang de respondre, orça, tu auras prou affaire. Orça maraut, tu as menty, disoit frere Jean en silence: pense tu estre en la forest de l'Academie, orca, avec les ocieux veneurs et inquisiteurs de verité. Orça nous avons bien icy autre chose à faire, orça, icy on respond, je dis,

orça, categoriquement, de ce que l'on ignore. Orça, on confesse avoir faict, orça, ce qu'on ne fist onques. Orça on proteste sçavoir ce que jamais on n'apprint. Orça on faict prendre patience en enrageant. Orça on plume l'oye sans la faire crier. Orça tu parle sans procuration, orça je le voy bien, orça tes fortes fiebvres quartaines, orça qui te puissent espouser, orça. Diables, s'escria frere Jean, archidiables, protodiables, pantodiables, tu donques veux marier les moines. ho, hu, ho, hou, je te prens pour heretique.