Comment Pantagruel arriva en l' Isle de Cassade. CHAP. X.

Delaissant l' Isle des ferrements continuasmes nostre chemin: le jour ensuyvant entrasmes en l' Isle de Cassade, vraye Idee de Fontainebleau : car la terre y est si maigre que les os (ce sont rocs) luy persent la peau: areneuse, sterile, mal saine, et mal plaisante. Là nous monstra nostre pillot deux petits rochers carrez à huit esgalles pointes en cube: lesquels à l'apparence de leur blancheur me sembloient estre d'Albastre, ou bien couvers de neige: mais il les nous asseura estre d'osselets. En

iceux disoit estre à six estages le manoir noir de vingt diables de hazard tant redoutez en nos pays desquels les plus grands bessons et accouplez il nommoit Senes, les plus petits Ambezas, les autres escoullettez moyens Quine, Quaderne, Terne, Doubledeux: les autres il nommoit Six et cinq, six et quatre, six et trois, six et deux, six et as, cinq et quatre, cinq et trois, et ainsi consecutivement. Lors je notay que peu de joueurs sont par le monde qui ne soient invocateurs des diables. Car jettans deux dez sur table, quant en devotion ils s'escrient Senes mon amy, c'est le grand diable: Ambezas mon mignon, c'est le petit diable. Quatre et deux mes enfans, et ainsi des autres, ils invoquent les diables par leurs noms et surnoms. Et non seulement les invoquent: mais d'iceux se disent amis et familiers. Vray est que ces diables ne viennent tousjours à souhait sus l'instant: mais en ce sont- ils excusables? Ils estoient ailleurs selon la dacte et priorité des invoquans. Partant ne faut dire qu'ils n'ayent sens et aureilles. Ils en ont, je vous dy belles. Puis nous dit, qu'autour et à bord de ces rochers carrez plus a esté faict de brix, de naufrages, de pertes de vies et de biens, qu'autour de toutes les Syrtes, Caribdes, Siraines, Scylles, Scrophades, et goufres de toute la mer. Je le creus facilement, me recordant que jadis entre les sages Egyptiens Neptune estoit designé par le premier cube en lettres hierogliphiques, comme Appolo par as, Diana par deux, Minerve par sept, etc. Là aussi nous dit estre un flasque de sang ureal, chose divine et à peu de gens congnue. Panurge fist tant par belles prieres avec les Sindicqs du lieu, qu'ils le nous monstrerent: mais ce fut avec plus de ceremonie et solennité plus grande trois fois, qu'on ne monstre à Florence les Pandectes de Justinian, ne la Veronnique à Romme. Je ne vis onques tant de scendeaux, tant de flambeaux, de torches, de glimpes, et d'agiots. Finalement ce qui nous fut monstré estoit le visage d'un connin rosty. Là ne veismes autres choses memorables fors bonne mine femme de mauvais jeu, et les cocques des deux oeufs, jadis ponnus et esclos par Leda, desquels naquirent Castor et Polux freres d' Helaine la belle: Les Sindicqs nous en donnerent une piece pour du pain. Au departir achetasmes une botte de chapeaux et bonnets de Cassade, à la vente desquels je ne doute que peu ferons de profit. Je croy qu'à l'usage encores moins en feront ceux qui ne nous les acheteront.