Comment nous descendismes les degrez tetradiques, et de la peur qu'eut Panurge. CHAP. XXXV.

Depuis descendismes un degré marbrin sous terre, là estoit un repos: tournans à gauche en descendismes deux autres, là estoit un pareil repos: puis trois à destour, et repos pareil: et quatre autres de mesme. Là demanda Panurge, est-ce icy? Quant degrez, dist nostre magnifique lanterne avez compté? un, respondit Pantagruel deux, trois, quatre. Quants sont ce? demanda elle. dix, respondit Pantagruel. Par, dist elle, mesme tetrade Pythagorique,

multipliez ce, qu'avez resultant? Ce sont, dist Pantagruel, dix, vingt, trente, quarante. Combien fait le tout? dist elle. Cent, respondit Pantagruel. Adjoustez, dist elle, le cube premier, ce sont huit, au bout de ce nombre fatal, trouverons la porte du temple. Et y notez prudentement, que c'est la vraye Psycogonie de Platon, tant celebree par les Academiens, et tant peu entendue a de laquelle la moictié est composee d'unité des deux premiers nombres, plains de deux quadrangulaires, et de deux cubiques. Descendans ces degrez numereux sous terre, nous furent bien besoin premierement nos jambes, car sans icelles ne descendions qu'en roullant, comme tonneaux en cave, basse secondement nostre preclare Lanterne, car en ceste descente ne nous apparoissoit autre lumiere, non plus que si nous fussions au trou de sainct Patrice en Hybernie, ou en la fosse de Trophonius en Boëtie. Descendus environ septante et huit degrez, s'escria Panurge, addressant sa parolle à nostre luysante lanterne Dame mirifique je vous prie de coeur contrit, retournons arriere: Par la mort boeuf, je meurs de malle peur. Je consens jamais ne me marier: vous avez prins de peine, et fatiguez beaucoup pour moy, Dieu vous le rendra en son grand rendouer, je n'en seray ingrat issant hors ceste caverne des Troglodites. Retournons de grace. Je doubte fort que soit icy Tenare, par lequel on descend en Enfer, et me semble que j'oy Cerberus abbayant. Escoutez, c'est luy ou les aureilles me cornent: je n'ay à luy devotion aucune, car il n'est mal des dens si grand, que quant les chiens nous tiennent aux jambes. Si c'est icy la fosse de Trophonius, les Lemures et Lutins, nous mangeront tous vifs, comme jadis ils mangerent un des hallebardiers de Demetrius par faute de bribes. Es-tu là frere Jean ? Je te prie mon bedon tien toy pres de moy, je meurs de peur. As-tu ton bragmard? Encores n'ay-je armes aucunes n'offensives, ne deffensives: Retournons.

J'y suis, dist frere Jean, j'y suis, n'ayes peur je te tien au collet: dix-huit diables ne t'emporteront de mes mains, encores que sois sans armes. Armes jamais au besoin ne faillirent, quant bon coeur est associé de bon bras: plustost armes du Ciel pleuveroient, comme au champs de la Crau, pres les fosses Mariannes en Provence, jadis pleurent cailloux (ils y sont encores) pour l'aide d' Hercules, n'ayant autrement dequoy combatre les deux enfans

de Neptune. Mais quoy, descendons nous icy es limbes des petits enfans? par dieu ils nous conchieront tous ou bien en Enfer à tous les diables. Cor dieu je les vous galleray bien à ceste heure, que j'ay du pampre en mes souliers. O que je me batray verdement. Ou est-ce? ou sont-ils? je ne crains que leurs cornes. Mais les deux cornes, que Panurge marié portera, m'en garentiront entierement. Je le voy ja, en esprit prophetique, un autre Acteon cornant, cornu, cornancul. Garde frater, dist Panurge, attendant qu'on marira les Moines, que n'espouse la fiebvre quartaine. Car je puisse donc sauf et sain retourner de cestuy Hypogee, en cas que je ne te la beline, pour seulement te faire cornigere, cornipetant: autrement pense-je bien que la fiebvre quarte est assez mauvaise bague. Il me souvient que Grippe-minaud te la voulut donner pour femme, mais tu l'appellas heretique.

Icy fut le propos interrompu par nostre splendide lanterne nous remonstrant, que la estoit le lieu, auquel convenoit favorer et par suppression de parolles, et taciturnité de langues: du demourant, fist response peremptoire, que de retourner sans avoir le mot de la bouteille, n'eussions

d'espoir aucun, puis qu'une fois avions nos souliers feustrez de pampre.

Passons donques, dist Panurge, et donnons de la teste à travers tous les diables. A perir n'y à qu'un coup. Toutesfois je me reservois la vie pour quelque bataille. Boutons, boutons, passons outre. J'ay du courage tant et plus: vray est, que le coeur me tremble, mais c'est pour la froideur et relenteur de ce Cavayn. Ce n'est de peur non, ne de fiebvre. Boutons, boutons, passons, poussons, pissons. Je m'appelle Guillaume sans peur.