Comment les Chats fourrez vivent de corruption. CHAP. XIIII.

Ces parolles n'estoient achevees, quant frere Jean aperceut soixante et huict Galleres et Fregades arrivantes au port: la soudain courut demander nouvelles. Ensemble de quelle marchandise estoient les vaisseaux chargez, vit que tous chargez estoient de venaison: levraux, chappons, palombes, cochons, chevreaux, vaneaux, poullets, canards, albrans, oisons, et autres sorte de gibier. Parmy aussi, apperceut quelques pieces de velours, satin, et damas. Adonques interrogua les voyagiers ou et à qui ils portoient ces frians morceaux. Ils respondirent que c'estoit à Grippe-minaud aux Chats-fourrez, et Chattes fourrees.

Comment dist frere Jean appelez vous ces dragmes la? Corruption respondoient les voiagers. Ils donques, dist frere Jean de corruption vivent, en generation periront.

Par la vertu dieu c'est cela, leurs peres mangerent les bons gentils-hommes qui par raison de leur estat, s'exerçoient à la vollerie, et à la chasse pour plus estre en temps de guerre escorts et ja endurcis au travail. Car venation est comme un simulachre de bataille, et onques n'en mentit Xenophon, escrivant estre de la venerie, comme du cheval de Troye yssus tous bons chefs de guerre. Je ne suis pas clerc, mais on me l'a dit, Je le croy. Les ames d'iceux, selon l'opinion de Grippe-minaud, apres leur mort entrent en sangliers, cerfs, chevreaux, herons, perdrix, et autres tels animaux, lesquels avoient, leur premiere vie durante, tousjours aimez et cherchez. Ores ces Chats-fourrez avoir leurs chasteaux, terres, dommaines, possessions, rentes et revenus destruit et devoré, encores leurs cherchent-ils le sang et l'ame en l'autre vie. O le gueux de bien qui nous en donna advertissement, à l'enseigne de la mangoire instablee au dessus du ratelier. Voire-mais, dist Panurge aux voyagers, on a faict crier de par le grand Roy, que personne n'eust sur peine de la hart, prendre cerfs, ne biches, sangliers ne chevreaux. Il est vray, respondit un pour tous. Mais le grand Roy est tant bon et tant benin, ces Chats-fourrez sont tant enragez et affamez de sang Chrestien, que moins de peur avons nous offenceans le grand Roy, que d'espoir n'entretenans ces Chats- fourrez par telles corruptions: mesmement que demain le Grippe-minaud marie une sienne Chatte-fourree, avec un gros Mitouard, chat bien fourré. Au temps passé on les appelloit Machefoins, mais las ils n'en maschent plus. Nous de present les nommons mache-levraux, mache-perdrix, mache-beccasses, machefaisans, machepoullets, mache-chevreaux, mache-connils, mache-cochons, d'autres viandes ne sont alimentez. Bran, bran, dist frere Jean, l'annee prochaine on les nommera macheestrons, mache-foires, mache-merdes. Me voulez vous croire? Ouy dea, respondit la brigade, faisons, dist-il, deux choses: premierement saisissons nous de tout ce gibbier que voyez cy, aussi bien suis-je fasché de saleures, elles m'eschauffent les hypocondres: J'enten le bien payant. Secondement retournons au Guischet, et mettons à sac tous ces diables de Chats- fourrez. Sans faute, dist Panurge, je n'y vois pas, je suis un peu couart de ma nature.