Comment la Quinte-Essence guarissoit les malades par chansons. CHAP. XIX.

En la seconde gallerie nous feut par le Capitaine monstré la dame jeune, et si avoit dixhuict cens ans pour le moins, belle delicate, vestue gorgiasement, au milieu de ses damoiselles, gentils-hommes. Le Capitaine nous dit, heure n'est de parler à elle, soyez seulement spectateurs attentifs, de ce qu'elle faict. Vous en vostre Royaume avez quelques Roys, lesquels phantastiquement guarissent d'aucunes maladies, comme strophules, mal-sacré, fiebvres quartes, par seule apposition des mains. Ceste nostre Royne de toutes maladies guarist, sans y toucher, seulement leur sonnant une chanson selon la competance du mal. Puis nous monstra les orgues, desquelles sonnant faisoit ces admirables guarisons. Icelles estoient de façon bien estrange. Car les tuyaux estoient de casse en canon, le sommier de gaiac, les marchettes de rubarbe, le suppied de turbith, le clavier de scammonie.

Lors que considerions ceste admirable et nouvelle structure d'orgues, par ses

Abstracteurs, Spodizateurs, Massiteres, Pregustes, Tabachins Chachanins, Neemanins, Rabrebans, Nereins Rozuins, Nedibins, Nearins, Segamions, Perazons, Chesinins, Sarins, Sotrins, Aboth, Enilins, Archasdarpenins, Mebins, Giborins et autres siens officiers, furent les lepreux introduits, elle leur sonna une chanson, je ne sçay quelle, soudain furent et parfaictement guaris. Puis furent introduits les empoisonnez, elle leur sonna une autre chanson, et gens de bout. Puis les aveugles, les sourds, les muets, leurs appliquant de mesme. Ce que nous espouventa non à tord, et tombasmes en terre, nous prosternans, comme gens ecstastiques, et ravis en contemplation excessive, et admiration des vertus, qu'avons veu proceder de la dame: et ne fut en nostre pouvoir mot aucun dire. Ainsi restions en terre, quant elle touchant Pantagruel d'un bouquet de rose franche, lequel elle tenoit en main, nous restitua le sens, et fist tenir en pieds. Puis nous dist en parolles byssines, telles, que vouloit Parysitis qu'on proferast parlant à Cyrus son fils: ou pour le moins de taffetas armoisi.

L'honesteté scintilante, en la circonferance, jugement certain me fait de la vertu

latente au ventre de vos esprits: et voyant la suavité melliflue de vos disertes reverences, facilement me persuade le coeur vostre ne patir vice aucun, n'aucune sterilité de savoir liberal, et hautain, ains abonder en plusieurs peregrines et rares disciplines: lesquelles à present plus est facile par les usages communs du vulgaire imperit desirer que rencontrer: c'est la raison pourquoy, je dominante par le passé à toute affection privee, maintenant contenir ne me peux, vous dire mot trivial au monde, c'est que soyez les biens, les plus, les tresques bien venus.

Je ne suis point clerc, me disoit secretement Panurge, respondez si voulez: je toutesfois ne respondis, non fist Pantagruel : et demeurions en silence. Adonques dist la Royne: En ceste vostre taciturnité congnoy -je, que non seulement estes issus de l'eschole Pythagorique, de laquelle print racine, en successive propagation, l'antiquité de mes progeniteurs: mais aussi, que en Egypte, celebre officine de haute philosophie, mainte lune retrograde, vos ongles mords avez, et la teste d'un doigt grattee. En l'eschole de Pythagoras, taciturnité, de congnoissance estoit symbole: et silence des Egyptiens recongnu estoit en

louange deifique: et sacrifioient les Pontefes en Hieropolis au grand Dieu en silence, sans bruit faire, ne mot sonner. Le dessein mien est, n'entrer vers vous en privation de gratitude, ains par vive formalité encores que matiere se voulust de moy abstraire, vous excentriquer mes pensees.

Ces propos achevez, dressa sa parolle vers ses officiers, et seulement leur dist, Tabachins à Panaciee. Sus ce mot, les Tabachins nous dirent, qu'eussions la dame Royne pour excusee, si avec elle ne disnions: Car à son disner rien ne mangeoit, fors quelques Cathegories, Jecabots Eminins, Dimions, Abstractions, Harborins, Chelimins, Secondes intentions, Caradoth, Antitheses, Metempsichosies, transcendentes Prolepsies.

Puis nous menerent en un petit cabinet, tout contrepointe d'allarmes: La fusmes traictez, dieu sçait comment. On dict que Jupiter en la peau diphthere de la chevre, qui l'allaicta en Candie, de laquelle il usa, comme de pavois, combatans les Titanes, pourtant est-il surnommé Eginchus, escrit tout, ce que l'on fait au monde. Par ma foy, Beuveurs mes amis, en dixhuict peaux de chevres, on ne sauroit, les bonnes viandes qu'on nous servit, les entremets,

et bonne chere, qu'on nous fist, descrire: voire fust-ce en lettres aussi petites, que dit Ciceron avoir veu l'Iliade d' Homere, tellement qu'on la couvroit d'une coquille de noix. De ma part encores que j'eusse cent langues, cent bouches, et la voix de fer, la copie melliflue de Platon, je ne saurois en quatre livres vous en exposer la tierce d'une seconde. Et me disoit Pantagruel, que, selon son imagination, la dame à ses Tabachins disant, à Panacee, leur donnoit le mot symbolique entre eux de chere souveraine, comme en Apollo disoit Luculle, quant festoyer vouloit ses amis singulierement, encores qu'on le print à l'improviste, ainsi que quelques fois faisoient Ciceron et Hortensius.