Comment la Pontife Bacbuc presenta Panurge devant ladicte Bouteille. CHAP. XLIIII.

La fist Bacbuc, la noble pontife, Panurge besser, et baiser la marge de la fontaine: puis le fist lever, et autour danser trois Ithymbons. Cela fait, luy commanda s'asseoir entre deux scelles le cul à terre, là preparees. Puis desploya son livre ritual, et luy soufflant en l'aureille gausche, le fist chanter une Epilemie, comme s'ensuit.

O Bouteille
Plaine toute
De misteres,
D'une aureille
Je t'escoute
Ne differes,
Et le mot proferes,
Auquel pend mon coeur.
En la tant divine liqueur,
Qui est dedans tes flancs reclose
Baccus qui fut d' Inde vainqueur,
Tient toute verité enclose.
Vin tant divin loin de toy est forclose
Toute mensonge, et toute tromperie.
En joye soit l'Aire de Noach close.
Lequel de toy nous fist la temperie.
Sonne le beau mot, je t'en prie,
Qui me doit oster de misere.
Ainsi ne se perde une goutte.
De toy, soit blanche ou soit vermeille
O Bouteille
Plaine toute
De mysteres
D'une aureille
Je t'escoute
Ne differes.

Page [182]

Ceste chanson parachevee, Bacbuc jetta je ne sçay quoy dedans la fontaine, et soudain commença l'eau bouillir à force, comme fait la grande marmite de Bourgueil, quant y est feste à bastons. Panurge escoutoit d'une aureille en silence, Bacbuc se tenoit pres de luy agenouillee quant de la sacree Bouteille issit un bruit, tel que font les abeilles naissantes de la chair d'un jeune taureau occis et accoustré selon l'art et invention d' Aristeus, ou tel que fait un guarot desbandant l'arbaleste, ou en esté une forte pluye soudainement tombant. Lors fut ouy ce mot, Trinch. Elle est, s'escria Panurge, par la vertu dieu rompuë, ou feslee que je ne mente: ainsi parlent les bouteilles cristalines de nos pays, quant elles pres du feu esclattent.

Lors Bacbuc se leva, et print Panurge souz le bras doucettement, luy disant: Amy rendez graces és cieux, la raison vous y oblige: vous avez promptement eu le mot de la dive Bouteille : Je dy le mot plus joyeux, plus divin, plus certain, qu'encores d'elle aye entendu, depuis le temps qu'icy je ministre à son tressacré Oracle. Levez vous, allons au chapitre, en la glose duquel est le beau mot interpreté. Allons, dist Panurge, de par Dieu. Je suis aussi sage, que

Page [183]
entan. Esclairez, ou est ce livre, tournez, ou est ce chapitre, voyons ceste joyeuse glose.

Réel    Hypothétique    Fictif    Mythique   
Région, contrée    Ville, village    Bâtiment    Étendue, cours d'eau    Montagne, île, ...    Autre