Comment Janotus de Bragmardo feut envoye pour recouvrer de Gargantua les grosses cloches. Chap. xviij.

Maistre Janotus tondu a la Cesarine, vestu de son lyripipion a l'antique, et bien antidoté l'estomac de coudignac de four, et eau beniste de cave, se transporta au logis de Gargantua , touchant davant soy troys vedeaulx a rouge muzeau, et trainant apres cinq ou six maistres inertes bien crottez a profit de mesnaige.

A l'entree les rencontra Ponocrates :

et eut frayeur en soy les voyant ainsi desguisez, et pensoit que feussent quelques masques hors du sens. Puis s'enquesta a quelqun desdictz maistres inertes de la bande, que queroit ceste mommerie? Il luy feut respondu, qu'ilz demandoient les cloches leurs estre rendues.

Soubdain ce propos entendu Ponocrates courut dire les nouvelles a Gargantua : affin qu'il feust prest de la responce, et deliberast sur le champ ce que estoit de faire. Gargantua admonesté du cas appella a part Ponocrates son precepteur, Philotomie son maistre d'hostel, Gymnaste son escuyer, et Eudemon et sommairement confera avecques eulx sus ce que estoit tant a faire que a respondre.

Tous feurent d'advis que on les menast au retraist du goubelet et la on les feist boyre rustrement, et affin que ce tousseux n'entrast en vaine gloire pour a sa requeste avoir rendu les cloches, l'on mandast ce pendent qu'il chopineroit querir le Prevost de la ville, le Recteur de la

faculte, le vicaire de l'eglise: esquelz davant que le sophiste eust proposé sa commission, l'on delivreroit les cloches. Apres ce iceulx presens l'on oyroit sa belle harangue. Ce que fut faict, et les susdictz arrivez, le Sophiste feut en plene salle introduict, et commenca ainsi que s'ensuit en toussant.