Comment Gargantua paya sa bien venue es Parisiens, et comment il print les grosses cloches de l' eglise nostre Dameeglise nostre Damenostre Dame. Chapi. xvij.

Quelques jours apres qu'ilz se feurent refraichiz il visita la ville: et fut veu de tout le monde en grande admiration. Car le peuple de Paris est tant sot, tant badault, et tant inepte de nature q'un basteleur, un porteur de rogatons, un mufet avecques ses cymbales, un vielleuz au mylieu d'un carrefour assemblera plus de gens, que ne feroit un bon prescheur evangelicque.

Et tant molestement le poursuyvirent: qu'il feut contrainct soy reposer suz les tours de l' eglise nostre dame. Au quel lieu estant, et voyant tant de gens,

a l'entour de soy: dist clerement:

Je croy que ces marroufles voulent que je leurs paye icy ma bien venue et mon proficiat. C'est raison. Je leur voys donner le vin. Mais ce ne sera que par rys.

Lors en soubriant destacha sa belle braguette, et tirant sa mentule en l'air les compissa si aigrement, qu'il en noya deux cens soixante mille, quatre cens dix et huyt. Sans les femmes et petiz enfans.

Quelque nombre d'iceulx evada ce pissefort a legiereté des pieds. Et quand furent au plus hault de l'université, suans, toussans, crachans, et hors d'halene, commencerent a renier et jurer les ungs en cholere, les aultres par rys, Carymary, Carymara, Par saincte mamye, nous son baignez par rys, dont fut depuis la ville nommee Paris laquelle au paravant on appelloit Leucece. Comme dist Strabo lib. iiij. C'est a dire en Grec, Blanchette, pour les blanches cuisses des dames dudict lieu.

Et par autant que a ceste nouvelle

imposition du nom tous les assistans jurerent chascun les saincts de sa paroisse: les Parisiens, qui sont faictz de toutes gens et toutes pieces, sont par nature et bons jureurs et bons juristes, et quelque peu oultrecuydez. Dont estime Joaninus de Barranco, libro, de copiositate reverentiarum, que sont dictz Parrhesiens en Grecisme, c'est a dire fiers en parler.

Ce faict considera les grosses cloches que estoient esdictes tours: et les feist sonner bien harmonieusement. Ce que faisant luy vint en pensee qu'elles serviroient bien de campanes au coul de sa jument, laquelle il vouloit renvoier a son pere toute chargee de froumaiges de Brye et de harans frays. De faict les emporta en son logis.

Ce pendent vint un commandeur jambonnier de sainct Antoine pour faire sa queste suille: lequel pour se faire entendre de loing, et faire trembler le lard, au charnier, les voulut emporter furtivement.

Mais par honnesteté les laissa, non par ce qu'elles estoient trop chauldes, mais par ce qu'elles estoient quelque peu trop pesantes a la portee. Cil ne fut pas celluy de Bourg. Car il est trop de mes amys.

Toute la ville feut esmeue en sedition comme vous scavez que a ce ilz sont tant faciles, que les nations estranges s'esbahissent de la patience des Roys de France, lesquelz aultrement par bonne justice ne les refrenent: veuz les inconveniens qui en sortent de jour en jour. Pleust a dieu, que je sceusse l'officine en laquelle sont forgez ces chismes et monopoles, pour les mettre en evidence es confraries de ma paroisse. Croyez que le lieu auquel convint le peuple tout folfre et habaline, feut Nesle ou lors estoit, maintenant n'est plus, l'oracle de Lucece. La feut proposé le cas, et remonstré l'inconvenient des cloches transportees.

Apres avoir bien ergote pro et contra feut conclud en Baralipton, que l'on en

voyroit le plus vieux et suffisant de la faculté vers Gargantua pour luy remonstrer l'horrible inconvenient de la perte d'icelles cloches. Et nonobstant la remonstrance d'aulcuns de l'universit, qui alleguoient que ceste charge mieulx competoit a un orateur, que a un Sophiste, feut a cest affaire esleu nostre maistre Janotus de Bragmardo.