Comment Grandgousier manda querir ses legions, et comment Toucquedillon tua Hastiveau, puis fut tue par le commandement de Picrochole. Chap. xlvij.

En ces mesmes jours, ceulx de Besse, du Marche vieux, du bourg sainct Jacques du Trainneau,

de Parille, de riviere, des roches sainct Paoul, du Vau breton, de Pautille, du Brehemont, du pont de Clam, de Cravant, de Grandmont, des Bourdes de la ville au Mere, de Huymes de Serge, de Husse, de sainct Louant, de Panzoust, des Coldreaux, de Verron, de Coulaines, de chose, de Varenes, de Bourgueil, de l'isle Boucard, du Croulay, de Narsy, de Cande, de Montsoreau, et aultres lieux confins en voierent devers Grandgousier ambassades, pour luy dire qu'ilz estoient advertis des tordz que luy faisoit Picrochole et pour leur ancienne confederation, ilz luy offroient tout leur povoir tant de gens, que d'argent, et aultres munitions de guerre. L'argent de tous montoit par les pactes qu'ilz luy avoient, six vingt quatorze millions deux escuz et demy d'or. Les gens estoient quinze mille hommes d'armes, trente et deux mille chevaux legiers, quatre vingtz neuf mille harquebousiers, cent quarante mille adventuriers, unze mille deux cens canons, doubles canons, basilicz et spiroles. Pionniers quarante sept mille, le tout souldoye et avitaille pour six moys et quatre jours. Lequel offre Gargantua ne refusa, ny accepta du tout.

Mais grandement les remerciant, dist, qu'il composeroit ceste guerre par tel engin que besoing ne seroit tant empescher de gens de bien. Seulement envoya qui ameneroit en ordre les legions lesquelles entretenoit ordinairement en ses places de la deviniere, de Chaviny, de Gravot, et Quinquenays montant en nombre deux mille cinq cens hommes d'armes soixante et six mille hommes de pied vingt et six mille arquebuziers, deux cens grosses pieces d'artillerye, vingt et deux mille Pionniers, et six mille chevaulx legiers, tous par bandes, tant bien assorties de leurs thesauriers, de vivandiers, de mareschaulx de armuriers, et aultres gens necessaires au trac de bataille: tant bien instruict

en art militaire, tant bien armez, tant bien recongnoissans et suivans leurs enseignes, tant soubdains a entendre et obeir a leurs capitaines. tant expediez a courir, tant fors a chocquer, tant prudens a l'adventure, que mieulx ressembloient une harmonie d'orgues et concordante d'horologe, q'une armee, ou gensdarmerie Toucquedillon arrive se presenta a Picrochole, et luy compta au long ce qu'il avoit et faict et veu. A la fin conseilloit par fortes parolles qu'on feist apoinctement avecques Grandgousier lequel il avoit esprouve le plus homme de bien du monde, adjoustant que ce n'estoit ny preu, ny raison molester ainsi ses voisins, desquelz jamais n'avoient eu que tout bien. Et au reguard du principal: que jamais ne sortiroient de ceste entreprinse que a leur grand dommaige et malheur Car la puissance de Picrochole n'estoit telle, que aisement ne les peust Grandgousier mettre a sac. Il n'eust acheve ceste parolle, que Hastiveau dist tout hault. Bien malheureux est le prince qui est de telz gens servy, qui tant facilement sont corrompuz comme je congnoys Toucquedillon. Car je voy son couraige tant change que voluntiers se feust adjoinct a noz ennemys pour contre nous batailler et nous trahir, s'ilz l'eussent voulu retenir: mais comme vertus est de tous tant amys que ennemys louee et estimee, aussi meschante est tost congneue et suspecte. Et pose que d'icelle les ennemys se servent a leur profit si ont ilz tousjours les meschans et traistres en abhomination. A ces parolles Toucquedillon impatient tyra son espee, et en transperca Hastiveau un peu au dessus de la mammelle guauche dont mourut incontinent. Et tyrant son coup du corps, dist franchement. Ainsi perisse qui feaulx serviteurs blasmera. Picrochole soubdain entra en fureur, et voyant l'espee et fourreau tant diapre, dist. Te avoit on donne ce baston, pour en ma presence tuer maligne ment mon tant bon amy Hastiveau.

Lors commenda a ses archiers qu'ilz le meissent en pieces. Ce que feut faict sus l'heure, tant cruellement que la chambre estoit toute pavee de sang. Puis feist honorablement inhumer le corps de Hastiveau et celluy de Toucquedillon getter par sus les murailles en la vallee. Les nouvelles de ces oultraiges feurent sceues par toute l'arme, dont plusieurs commencerent murmurer contre Picrochole, tant que Grippe pinault luy dist. Seigneur je ne scay quelle yssue sera de ceste entreprinse. Je voy voz gens peu confermes en leurs couraiges. Ilz considerent que sommes icy mal pourveuz de vivres, et ja beaucoup diminuez en nombre, par deux ou troys yssues.

Davantaige il vient grand renfort de gens a voz ennemys. Si nous sommes assiegez une foys, je ne voy poinct comment ce ne soit a nostre ruyne totale. Bren, bren, dist Picrochole, vous semblez les anguillez de Melun. vous

criez davant qu'on vous escorche, laisses les seulement venir.