Comment feut meu entre les fouaciers de Lerne, et ceulx du pays de Gargantua le grand debat, dont furent faictes grosses guerres. Chapitre. xxv.

En cestuy temps qui fut la saison de vendanges au commencement de automne, les bergiers de la contree

Page [72v]
estoient a guarder les vines, et empescher que les estourneaux ne mangeassent les raisins.

Onquel temps les fouaciers de Lerné passoient le grand quarroy menans dix ou douze charges de fouaces a la ville.

Lesdictz bergiers les requirent courtoisement leurs en bailler pour leur argent, au pris du marche.

Car notez que c'est viande celeste, manger a desjeuner raisins avec fouace fraiche, mesmement des pineaulx, des fiers, des muscadeaulx, de la bicane, et des foyrars pour ceulx qui sont constipez de ventre. Car ilz les font aller long comme un vouge: et souvent cuidans peter ilz se conchient, dont sont nommez les cuideurs des vendanges.

A leur requeste ne feurent aulcunement enclinez les fouaciers, mais (que pis est) les oultragerent grandement les appellans Trop diteulx, Breschedens, Plaisans rousseaulx, Galliers, Chienlictz, Averlans, Limessourdes, Faictneans,

Page Fu.73.
Friandeaulx, Bustarins, Talvassiers, Riennevaulx, Rustres, Challans, Hapelopins, Trainneguainnes, gentilz Flocquetz, Copieux, Landores, Malotruz, Dendins, Baugears, Tezez Gaubregeux, Gogueluz, Claquedans Boyers d'etrons, Bergiers de merde: et aultres telz epithetes diffamatoires, adjoustans que poinct a eulx n'apartenoit manger de ces belles fouaces: mais qu'ilz se debvoient contenter de gros pain, balle, et de tourte.

Auquel oultraige un d'entr'eulx nomme Frogier, bien honneste homme de sa personne, et notable bacchelier respondit doulcement. Depuis quand avez vous prins cornes, qu'estes tant rogues devenuz? Dea vous nous en souliez voluntiers bailler, et maintenant y refusez? Ce n'est faict de bons voisins, et ainsi ne vous faisons nous, quand venez icy achapter nostre beau frument duquel vous faictes voz gasteaux et fouaces: encores par le marché, vous eussions

Page [73v]
nous donné de noz raisins: mais par la mer de vous en pourriez repentir, et aurez quelque jour affaire de nous, lors nous ferons envers vous a la pareille, et vous en soubvienne.

Adoncq Marquet grand bastonnier de la confrairie des fouaciers luy dist. Vrayement tu es bien acresté a ce matin: tu mengeas her soir trop de mil. Vien ca, vien ca, je te donneray de ma fouace Lors Forgier en toute simplesse approcha tirant un unzain de son baudrier, pensant que Marquet luy deust deposcher de ses fouaces, mais il luy bailla de son fouet a travers les jambes si rudement que les noudz y apparoissoient: puis voulut gaigner a la fuyte: mais Forgier s'escria au meurtre: et a la force tant qu'il peut, en semble luy getta un gros tribard qu'il portoit soubz son escelle, et le attainct par la joincture coronale de la teste, sus l'artere crotaphique, du couste dextre: en telle sorte que Marquet tomba de sa jument: mieulx sembloit homme mort que vif.

Page Fu.74.

Ce pendent les mestaiers, qui la aupres challoient les noiz, accoururent avec leurs grandes gaules et frapperent sus ces fouaciers comme sus seigle verd. Les aultres bergiers et bergieres, ouyans le cry de Forgier, y vindrent avec leurs fondes et brassiers, et les suyvirent a grands coups de pierres tant menuz qu'il sembloit que ce feust gresle Finablement les aconceurent, et cousterent de leurs fouaces environ quatre ou cinq douzeines, toutesfoys ilz les payerent au pris acoustumé, et leurs donnerent un cens de quecas, et troys panerees de Francs aubiers. Puis les fouaciers ayderent a monter Marquet, qui estoit villainement blesse. et retournerent a Lerne sans poursuivre le chemin de Pareille menassans fort et ferme les boviers, bergiers, et mestaiers de Seuille et de Synays.

Ce faict et bergiers et bergieres feirent chere lye avecques ces fouaces et beaulx raisins, et se rigollerent ensemble au son de la belle bouzine: se mocquans de ces beaulx fouaciers glorieux, qui avoient

Page [74v]
trouve male encontre, par faulte de s'estre seignez de la bonne main au matin Et avec gros raisins chenins estuverent les jambes de Forgier mignonnement, si bien qu'il feut tantost guery.

Réel    Hypothétique    Fictif    Mythique   
Région, contrée    Ville, village    Bâtiment    Étendue, cours d'eau    Montagne, île, ...    Autre